أووف
وليي
أول شي ابن العم بتصور عطيتني كتير أكتر من حقي
بس يعني بما أنو من العيلة, فبتصور مسموح تمدحني زيادة مهيك......... منشان سمعة العيلة
كمان مقوي النار تحتي عا الآخر
ايه لنبلش
بالأول يا سيدي لما قطعت عن الأخوية, كان في شوية مشاكل ما كلها بتنحكى و كان في أكتر من عامل خلوني وقف كتابة بالأخوية, يعني بهداك الوقت كانت في شوية شغلات معقدة و في ظروف أساتها مستمرة لهلاء , فما مناسب أحكي عن الموضوع كتير.
غبت و كنت أرجع فوت كل فترة لسبب, أنو ما كان بدي الناس تعرف أنو أنا زعلان من شي, و ما كان ما بدي تركتي تسبب أي أزمة بالأخوية منشان هيك كانت الفوتات المتقطعة أنو أنا هون, كمان كان في كتير من الأصدقاء وقتا عم يطلبو أنو أرجع, فكنت فوت كل فترة و فترة منشان ما حدا يزعل
هلاء اي كان في شي دايقني, و دايقني كتير كمان, بس الفترة اللي كانت عم تمر فيها الأخوية كانت فترة قاسية كتير, كانت فترة مشاكل بين الأعضاء و خلافات محتدمة بشكل رهيب, كانت الأخوية بصراحة مقسومة على بعضا, و الأعضاء عم تخبص شروي غروي, و المشاكل مع الإدارة شغالة عا الـ 24 , ها الوضع اللي دخلت فيه الأخوية خلاني حط المشكلة اللي صارت معي ورا ضهري و ما أحكي عننا, لأنو أي شي كنت رح ساويه كان رح يشعل مشاكل زيادة و يزيد الهوة بين الطرفين اللي كانو عم يتقاتلو , بينما أنا بنفس الوقت و عا السكت كنت عم حاول هدي الأمور بين الشباب, و لحسن الحظ بتصور قدرت أعمل شي منشان خفف ها المشاكل, يمكن ما حدا بيعرف شو صار بس المهم أنو المشاكل أنحلت بالآخر , و بما أنو مشكلتي حطيتا ورا ضهري بلحظة من اللحظات فهي دايما رح تضل ورا ضهري.
هلاء بهداك الوقت كان في تقريبا شي أربعين عضو فعال بالأخوية, وكانت الأخوية متل الحارة الصغيرة اللي كتير حميمة و كل الناس فيها بتحب بعض, متعودين عا بعض, و عم تتفاعل مع بعضا بطريقة كتير حلوة و حضارية, كانت الأخوية تخلو من المهاترات بالمواضيع, و المشاكل فيها كانت معدومة من ناحية الاختلافات الفكرية, يعني الكل كان يطرح وجهة نظرو برواق مهما كانت و الكل يتقبل وجهة نظر التاني حتى ولو ما كان يتبناها
هلاء الأخوية كبرت كتير, توسعت بكل الاتجاهات, يعني انا هلاء بضيع فيها
كل شي بها الحياة لازم يتقدم لقدام , اللي بيضل بمحلو بيموت, و أنو تكبر الأخوية كان الشي الطبيعي, بس ها الشي إجا عا حساب النوعية, يعني الوضع الحالي بالأخوية أنو ما حدا عم يسمع لحدا, كلو عم يعيط بصوت عالي كتير , و ما حدا عم يسمع غير حالو, يعني مستوى الحوار بالأخوية تراجع كتير, بس كمان تنوع كتير و ها الشي مافينا ننكرو, مع الوقت بتصور الأمور للأحسن, اذا الأعضاء شوي بتروق , و بتقدر تتقبل الفكر المضاد.
أكيد بحن للأخوية القديمة, بس ما بتخيل بتمنى أنو ترجع , بدي الأخوية تضل تكبر و ترتقي, أكيد 40 عضو ما رح يقدرو يعملو أي شي يأثر عا مجتمعنا اللي هدف الأخوية أصلا أنو ترتقي فيه و تغيرو للأفضل.
بصراحة ما بعرف شو رجعني عا الأخوية, يمكن ياس
أو يمكن حنيت للأخوية , في شي بالأخوية الجديدة عم يشدني, و بتخيل أنا مشتاق أرجع أكتب, يعني بصراحة ما فيني كون أكيد
على راسي ابن العم مرة تانية
و آسف عا الإطالة
يا عبد متى رأيتني في الضدين رؤية واحدة, اصطفيتك لنفسي.