تحية
هاد موضوع نقاش ثنائي.. يعني مانو موضوع مفتوح, هاد موضوع منبثق من موضوع آخر لذلك ارجو احترام ثنائية الحوار
كلام سابق من الموضوع الأساسي
محمد ابراهيم:
اقتباس:
انا رجعت اقتبست الموضوع وحطيتو بالرد السابق
ومن الموضوع يقدر اي حد يقرا ويستخرج منو اي شيء بدو
تصويت يا جماعة الاشراف (مجرد تصويت )
ليش اخدتو موضوعي بحساسية مفرطة ؟؟
هلاء سؤال عليه جايزة مني (جايزة كبيرة وضخمة ) السؤال موجه للمشرفين .
المشرف اللي شايف حالو ملاك يتفضل يكتب اسمو هون حالا
المشرف اللي شايف حالو مستحيل يغلط يكتب اسمو هون حالا
والجايزة مش لشخص الجايزة لكل شخص رح يجاوب
السؤال للاشراف فقط
|
ردي عليه
اقتباس:
طيب انا راح جاوب رغم انو اسمي مو موجود بالقائمة السودا رغم انو ترجيتك تحطو و بدي ياك تأكد كلامي
ما حدا عم يقول المشرف ما بيغلط... بس يا ترى مين مخوّل يقرر اذا المشرف غلط.. يعني مثال
أول مبارح بنفس اليوم وصلتني رسالة من عضو حذفتلو موضوع ديني عم يقول انو أنا (كلام حرفي) "عدو الله و الاسلام و المسلمين".... بعد ساعتين نزل موضوع بالبريد لسكايبي يقول عني فيه اني "مشرف اسلامي اصولي انبطاحي ذو فكر اسلامي نازي" منيح؟
من كام يوم واحد نزّل مسبة على الرئيس و حذفتها, بموضوع بقسم عناوين الاخبار و خالفتو, فرد علي انو "عليك و على المنتدى و اسيادك البعثية" ... اليوم حذفت موضوع عم يطالب بطرد "المعارضة" من المنتدى بالمنبر, فاجا رد من صاحب الموضوع بموضوع تاني عم يسأل مين المشرف "العميل" اللي حذف موضوعو
خلاصة هالحكي... لو حاط اسمي كان هدول 4 بس بظرف يومين صوتولي و ماني غلطان معهون بحرف واحد و اتحدى أي واحد منهون يثبت انو غلطت معو بحرف واحد بس (سكايبي محظور مؤقتا لأنو تخالف اليوم بحصاد المواقع)... و عم سامح الاهانات اللي عم تجيني عالخاص.. لاحظ.. فتصور من هالموديلات على مدى شهور...
شغلة تانية... و للا قلك.. شغلة تالتة... الشغلة التانية خليها بقلبي
أي سيدي, الشغلة الثالثة: التصويت مفتوح و سري.. يعني عم يصوّت اللي امبارح فات و ما بيعرف مين المشرفين و عم يصوّت اللي صارلو سنة و سنتين... عدا هالعامل هاد, في عالم بتصوت لمرسيل مثلا.. بحياتها مافاتت أقسامها ولا نزّلت كتاب... يعني لو بدنا عن جد نقيّم مشرفين لازم ناخد قائمة احصائيات كل قسم. و تاخد أكتر 20 عضو ناشطين بالشهر الجاري و الشهر السابق و على مدى العام.. و تاخد بعين الاعتبار الأقدمية و تسأل بشكل سري و هو يجاوب بشكل سري... هاي لو بدنا نشتغل بموضوعية, بس هون الشغل الموضوعي ما بيمشي... هون نتسلى بالرجم
هاد الموضوع يفتقد لأقل متطلبات الدقة و الموضوعية... لأنو مثل ما قلت سابقا عم يصوت اللي صارلو يومين بالمنتدى و عم يصوت اللي عندو كذا عضوية, وواحد مو فعّال بقسم ما فينو... ما بيحقلو يقيّم مشرفو.. يعني مثل لو بانتخابات بلدية حمص يصوّت واحد حلبي... ما بيصير
عدا انو الموضوع يفتقد الى أدنى حدود الموضوعية... القسم تحوّل الى هجوم شخصي مباشر جدا... يعني اللي عندو ثار اجا لهون, لأ و المضحك انو اللي يحكي كلمة لصالح مشرف يطلع مسّيح جوخ... يعني هون يا أرجم و انقد يا أما اضوي من هون.... دخيل رب الديمقراطية..
كنقطة أخيرة... على اعتبار الموضوع هون واضح لكل الأعضاء.. يعني اللي راح يفوت جديد و يشوف النتيجة اللامنطقية (دليل لا منطقيتها انو كلا المشرفتين ربحو كمان تصويت أفضل مشرف... اللي ينطبق عليه نفس الكلام هون... لا تفكر جاي انقد هاد لأنو موضوع سلبي).. اي سيدي.. اللي راح يشوف نتيجة هالتصويت برأيك راح يحترم مرسيل أو ريم كمشرفات؟ على أول اجراء اشرافي راح يقول انو لا تتفهمني على ربي انتي أسوء مشرفة بشهادة الاعضاء... هون بدي اطرح تساؤل اخلاقي حول انو اذا نقدر نحنا كمشرفين نقيم مين العضو الأسوء على كيفنا و نشهر فيه و ننزع سمعتو و مصداقيتو متل ما عم ينعمل هون بالمشرفين... اتسائل هيك اذا بيقبلوها الاعضاء
محمد ياريت تحط المعزة الشخصية على طرف... أعتقد انو عندك الخبرة الشخصية الكافية بالمنتدى لحتى تعرف شو كان راح يصير, و يؤسفني جدا انو في ناس فقط بدها تأذي راح تضرب بسيف انو ريم أو مرسيل طلعو أسوء مشرفات بموضوع عملو محمد ابراهيم... مؤسف جدا حقيقة
في نقطة رابعة كمان راح خليها بقلبي
من جهتي اعتبر المشرفتين المذكورتين أفضل مشرفتين, و أكثرهما عملا و نشاطا و تقديما لأخوية... اللي بدو يعملني مسّيح جوخ مو فارقة معي .... هو و آرائو متل رجلي
|
كملاحظات حول الموضوع:
بتمنى من محمد كلام على بساط أحمدي, و المعزة و المحبة على طرف ... كل شي لوحدو
من باقي الاعضاء اتمنى احترام انو هاد نقاش ثنائي.. و انو ما يتدخلو حتى نهايتو