[yass]

أنا ما عم قول أنو كل السنة هيك ( متل ما ذكرت قبل ) بس كمان هيك افتاءات استُغلت بشكل كبير من قبل بعض الاحزاب الطائفية لهيك بستغرب لما البعض بطالبوا بتمثيل أكبر للقوى يللي ايديلوجيتها طائفية

طيب الأحزاب هاي الطائفية اللي طبعا موجودة هل يا ترى الها قاعدة شعبية لحتى مخلّين أبناء الأقليات يخافون منها؟ يعني هلأ لو عملنا انتخابات حرة حدا عندو قناعة انو الاخوان راح حدا يصوتلهون؟ أو حتى مو الاخوان... خلينا نقول جهة اصولية أخرى... يعني المهسترين هدول جند الشام الهون قاعدة شعبية ما؟؟

لا .... كان طائفي بامتياز .....
و كونو صراع غير متكافئ القوى نتجت عنو مجازر كتيرة ....
يمكن كونك انت عشت بمنطقة بعيدة عن مناطق الاحتكاك الطائفي
و كون هيك أمور ما بتتوثق .. لأنها شي ما بيرفع الراس ...... ما بظنك تكون تعرف كتير عنها

يعني شو بدي أحكي هون... دبحتني بهاي الجملة... و كمان اعتبرت انو عالأغلب ما بعرف... طيب ما بعرف

بس انو صارت مشاكل ع أساس طائفية ما بيعني انو نظام الحكم كان طائفي.. يعني القول بانو النظام كان عبارة عن ناس ما تؤمن بحق العلوية بالحياة شي كبير. لاحظ ما عم قول انو مافي جحاش يفكرو هيك... انت قلتلي النظام كان طائفي و بامتياز... شكري القوتلي عم يتقلّب بقبرو هلأ من كتر ما وجعتو الضربة... على كل ما بدي أناقش بهالنقطة لأنو محكوم علي سلفا بالجهل و مالها علاقة بموضوعنا.. لذلك ما راح أوقف هون

أنا ما عم احكي عن استلام ادارة و مناصب و هالأمور يللي عم يحكوا عنها هلأ

أنا عم احكي عن الاعتراف بأنهون بني آدمين .....و أحيان كتير اعتراف بحقون بالحياة

طيب مين الحيوان ابن الجحش اللي مو معترف بهيك أمور... و مين قرر انو هالحيوان ابن الجحش راح يسمعو السنة كلمتو, أو انو راح يدعموه, مين قرر هالأمر يعني لحتى العالم خايفة منو

السافل اللي يقول انو العلوية مو بشر و ما بيحقلهون يعيشو هاد عدو الشعب كلو و عدو كل البلد مو بس عدو العلوية, و كل سوري عندو شقفة ضمير بخندق واحد ضد هالسافل بغض النظر عن طائفتو أو حتى اذا ما عندو طائفة... و اهانة كبيرة بحق قسم من اهل البلد اعتبارهون متقبلين بهالشي

خلونا بسؤال الموضوع الاساسي ... هل برأيكون الطائفة السنية حالياً ...مهمّشة بسورية ..؟؟

و الله حسب من أي ناحية مهمشة... انو مخوفين أبناء الأقليات منها الأمر أعتقد واضح

أما انو الطائفة السنية ككيان هاد ما بعترف فيه أنا, انو لازم يكون عندها حضور لأنو "أغلبية" هالأمر كمان ما بؤمن فيه... يعني أغلبية شو؟ مين حط قوالب انو السني هيك بيفكر و العلوي هيك بيفكر؟ كل السوريين مثل بعض و متساوون بالحقوق و الواجبات و كلمة أغلبية مقرونة باسم طائفة هاد اسمو ناقوس خطر.. و هاد وتر لعب عليه الأخوان و ما بيصير حدا يلعبو... أنا شخصيا مناي أشوف رئيس سوريا مسيحي بس نكاية بالتاريخ... أما انو و الله الرئيس لازم يكون سني لأنو أغلبية البلد حدا قرر انو "سنة" هاد أنا شايفو بنفس سخافة القول مثلا بانو رئيس سوريا لازم يكون أسمر و عيونو غامقين لأنو هيك الأغلبية.... بنفس السخافة

هلأ انو النظام طائفي؟؟ كمان لأ... النظام عندو الولاء لألو أول كل شي و آخر كل شي . لكن... انو النظام عم ينصب نفسو كحامي حمى الأقليات و انو لو مو هو موجود كان "الأكثرية" أكلت الأقليات هاد امر واضح...... و رد مرسيل دليل على كلامي. و هالشي هو أكبر عامل لخلق الحساسية الطائفية اللي للأسف موجودة.... و ما بعرف مداها الآن... بس موجودة لأنو بهالمنبر المواضيع اللي فيه نشحذ الردود شحاذة... بس من صار في موضوع ديني أو عن الطائفيه يكبر مثل سرطان الكبد