[yass]

عزيزي كلامك نظري جدا...

نعم خطة العمل تكون انو نفكر شو عم يصير باطارية الخارجي و الداخلي... و اللي أعتقد انو واضح جدا جدا بشكل مستفز... يعني مو خافي على حدا اتجاهات الدولة نحو الرأسمالية التجارية الليبرالية و خزعبلات "اقتصاد السوق الاجتماعي" . هالأتجاهات اجت مع اشهار رؤوس أموال ناتجة عن عقود من الفساد و يكفي نشوف أسامي "المليونيرية" العصاميين اللي بلشو يطلعو من عشر سنين و انتي جاي و بدهون يستثمرو هالأموال.. هالأمر مفضوح جدا و من زمان... هاد اللي عم بيصير... احتكار لقطاعات حيوية لصالح المتنفذين تحت حماية الحكم... هيك. مزبوط

هاد الحكي اللي أحكيه و أنا على كرسي عم اشرب قهوة و عم دخن سيكارة

الواقع... انو احكي هيك علنا و انت خاين... احكي هيك علنا و انت مزاود و و و و و .... الخ من الالقاب

لما عندك لمبة محروقة و ما فيك تغيرها لأنو عندك واحد جنبك كل ما تطلع عالطربيزة لتوصلها بيدفشك ما كتير بيهم انو بتعرف بشكل نظري كيف اللمبة تتغير... ما بدك أول شي تتخلص من هالتقيل اللي كل ما بدك توصل اللمبة عم يوقعك من الطربيزة؟ ليش عم يوقعك هو؟ لأنو ما بدو ياك تغيّر اللمبة.. بدو عتمة الزلمة

اللي بدو يغيّر اللمبة هو اللي بدو تغيير, و اللي عم يوقعك هو القطّاع الفاسد و الأجهزة الأمنية تبعو

هلأ بيجوز في عدة أشخاص بيهمهون يغيرو اللمبة , و واحد بدو يحط لمبة ستين شمعة, وواحد يقول لأ مية.. و واحد يقول لأ بنشيل السوكة و نحط لمبة نيون بيضا... الخ.. هاي خيارات تغيير و أنا أعتقد انك عم تركز على خيارات التغيير

كل الاقتراحات حول نوع اللمبة مالها أي فائدة طالما في هالواحد اللي قاعد بيدفش كل واحد بدو يطلع يحط اللمبة.. و من المنطقي انو الناس اللي متضررة من الظلام لأنو اللمبة الجديدة ما عم تنحط تعرف انو ياأخي في واحد لا بيغيّر هو اللمبة و لا بيخلي حدا يغيّر


حكيي كمان نظري و بعرف مثال اللمبة فايت بالحيط شوي بس اعتقد ينفع... ترجمة الواقع هي انو بوجود هالقبضة الأمنية اللي بتخلق أقوى مخدر بالتاريخ و اسمو الخوف عم يشل أي قدرة على العمل السياسي.. ما خرج تعمل شي.. و الأمن لما يعتقل عم يعتقل اللي بينادي بالتغيير... عارف دليلة انبرى لسانو, و غيرو كتار... عارف دليلة اعتقل لأنو حكى كتير عن الفساد و عن الفقر بسوريا... و دراساتو موجودة و طلابو اللي كانو هون بيعرفو هالشي و بيشهد بكلامو البعثي قبل المعارض... شو اللي صار؟ انو الزلمة مسجون و صحتو خطيرة و ما عندهون استعداد يكسبو أي نقطة انسانية باطلاق سراحو... قالو بالحرف الواحد انو لن يخرج الا ميتا من السجن

شو معنى هالحكي... انو صار في قضية انسانية من خلال وضع هالانسان اللي عم يعاني, عم يتعذب... يعني البيان ما راح يطالعو... صح, بس البيان معناه انو انت انسان و نحنا معك.. يعني ما فينا نعتبر المعتقل متل رجل الكرسي اذا اعتقل يعني الكرسي انكسر و نجيب غيرو و نزت المكسور... يعني من منطلق انساني بحت ياأخي نتضامن مع هالزلمة المسجون, و مع عيلتو لأنو كمان عم تعاني, يجوز بوجهة نظر عملية براغماتية نقول انو لا يقدم و لا يأخر.... بس انو هالزلمة يظل حدا متذكرو و لما بيطلع بيشوف انو أخي صح كنت مسجون و راح عمري بس انو ما نسوني الناس ... في حدا تذكرني. الأمر نفسي

أقرب مثال هو جيفارا... يعني بعقلية "عملية" راح نقول انو خليك تحكي عنو و تقرالو و و و و... الخ . الزلمة مات من أربعين سنة شو ما حكيت عنو ما راح يرجع. أي بس هو رجل ناضل في سبيل شيئ ما و مات دونه.... و لازم ذكراه تظل

السجن السياسي موت مؤقت صغير, و تذكر السجين و التضامن معو ما بيتعارض مع أي شي تاني و لا بيوقف بوجه أي شي تاني... مبدأ انساني بحت.. اذا الو نفع سياسي أو لأ... ما بيهمني هالأمر كانسان... لو انو نعمل كل شي بس منشان نحنا نستفاد منو كان اسمنا شي تاني ... مو ناس



آسف للاطالة