[yass]

معليش بس رياض سيف "لمعلوماتك" هو وكيل شركة 400 للألبسة من أكتر من عشرين سنة...

و كلامك عن التمويل بالديمقراطية الغربية مو صحيح... يعني معليش بس تمويل الأحزاب بأوربا من الدولة حصرا و ما فيهون يقبلو فرنك واحد من حدا و لا انو حملتهون تكون على حساب حدا و لا حتى على حسابهون الشخصي... التمويل حكومي و بكشوف مفتوحة.. بأميركا الوضع غير, فيهون يقبلو تبرعات و يصرفو على حالهون

و بأوربا لما تعمل حملة انتخابية بوعود و ما تنفذها.. ما بتطلع بعد أربع سنين.. هيك بكل بساطة. يعني تنفيذ وعودك هو بداية حملتك الانتخابية التالية

و كلامك الثاني عن الديمقراطية بأنو كذبة و ما الى ذلك........ يعني شو بدي أحكي.. ماني معو, فكر شو ما بدك, ما خصني....

و كمان عن القاعدة الفكرية اللازمة لوجود الديمقراطية.. مين بيقرر وجودها و عدمو؟ مين قرر انو نحنا متخلفين و ما خرجنا يعني؟؟ ليش شو ناقصنا؟ عندنا علل؟ أي عنا و كتير منها محصلة "الواقع الذي نعيشه" الاقتصادي والاجتماعي و السياسي... بس ما بقبلها ع حالي انو حدا يقللي أنا حاكمك بالقندرة لأنك ما خرج تنحكم بغير طريقة..ما بقبلها, اهانة الي كانسان قبل كل شي. يعني ما بتزبط عندي انو اللي حاكمني بالقندرة لأنو هيك قدّر التاريخ علي لسا فوقها محمّلني منّية....

متل ما حكيتلك كلامي ليس دفاعا عن اعلان دمشق.. اساسا لما بحكي عن معارضة بحكي عن ناس متلي و متل غيري... مفلسة و مديونة و ما عندها لا مليارات ولا طل الخبر... بس عندها حلم... انو البلد يصير للكل و نعيش بحرية و ننتخب و نتهنّى بخيارنا كأفراد أصحاب سيادة... يعني ما بعرف... جريمة شي هالحكي؟ اذا مو جريمة ليش السجون السياسية معبية؟ ليش مافي حرية رأي؟ ليش مواقع الانترنت محجوبة؟ و ليش وليش وليش.... الخ

ما بقبل كون غنمة... و ما بقبل حدا يجرّم اني ما بقبل كون غنمة.. أنا معارض لنظام حكم بلدي.. و بدي هالنظام يتصلّح.. بدي نقطة انعطاف تصير و ينتهي كل شي سلبي بالبلد و ينتهي كل حرامي ان كان اسمو رياض سيف و ان كان اسمو ميرو أو خدام أو أو أو .... الخيارات كتيرة.. يا ترى أنا مجرم لأنو فكري هيك؟ ليش معناتو ما بقدر قول هالحكي بدون ما يكون في دورية شاحطتني؟ ليش؟

بعدين عندي هيك فضول اعرف تصنيف المعارضة عند السلطة و مواليها... يعني كلو خاين بسعر بعضو وللا كيف؟ لكل واحد سعر شكل؟ كل واحد معارض هو مشروع مسؤول فاسد فاشل مثلا؟


و كختام بصراحة قول افلاطون اللي ذكرتو أول مرة بسمع فيه