[Syrian__Angel]

يعني معقول هي صورة النقاش عند الشعب السوري ؟

عند نسبة لا بأس بها ، - للأسف - اي ..


بيحزّ بنفسي انّــي ادخل ع حيـّاالله موقع او نتوورك بيحكي عن سوريا - ايّ شي عن سوريا ، ولو على مستوى صور لمناظر طبيعية فيها - ، و ما لاقي انــّو الموضوع كمــّل بنفس الهدف اللي انحطّ مشانو ..
آخرتو - بأغلب الاحيان - تحريف مسار الموضوع لاتــّجاه بعيد كل البعد عن الهدف ... وهالشي اكيد بيولــّد مشاكل ..
يعني كـ مثال النتوورك اللي حكيت عنــّو ، اسمو " سوريا " ، هيك "سوريا " حاف !!
معناها - بتصوّري - ما بدّو اللي اسّس هالنتوورك ، الا يكون مجرّد مساحة للتواصل بين المغتربين برّا سوريا ، ليحطّو صور عنها .. يتذكــّرو مواقف فيها ، يحنــّو لاهلون ورفقاتون فيها ..
القصد من حكيي ، انــّو يتطلــّعو عالجانب الـمشرق بالبلد ويتذكــّروه .. و بس .. بغضّ النظر عن كل شي - كل العالم بتعرفو مسبقاً ، في حال ما كانت عايشتو اصلاً .. -
ليش كل شي بدنا نحملو اكتر من ما هو عليه !؟ ما عاد فينا نذكر سوريا بدون ما نقرن الاسم بشغلة بالسياسة؟ او بالوضع الاقتصادي ؟؟ او نقعد نترحــّم !؟
لبنان - على الوضع المأساوي اللي واصلتو هلأ - ، ما بتلاقيهن نازلين ببعض كل ما جابو سيرة البلد !
يعني جبتو سيرة اليوتوب ، باليوتوب بيكون الفيديو عن طبيعة سوريا ، بيجي واحد بيعلّق " يا حيف عليكي يا بلد سرقوكي ! " ، انــّو ما فهمت ، شو دخل !؟؟ حتى الطبيعة صارت ممنوعة عنــّا مثلاً ؟!
ما في داعي كل ما دق الكوز بالجرّة تدخلو السياسة بالقصــّة ..
اي ما اختلفنا ، قلبكن محروق من الوضع ... ما كلنا هيك ! بس مو ضروري بكل حزّة ولزّة نسمّع نفس الحكي !!

في كتيـــر نتووركس بالفيس بوك - او غيرو - عن السياسة ، الاقتصاد ، الادب والثقافة ،الفنّ و الفنانين بسوريا ..
هالتخصيص هاد ما اجى من فراغ !
خلــّو كل شي بمطرحو ، احسن .. و أركز ... و أريح للبال ..
انا شو الله جابرني اقعد اقرأ المهاترات اللي بتصير بين الموالاة والمعارضة كل ما اجى ع بالي طلّع شغلة عن سوريا ؟؟
تأكــّدو لو اجى ع بالي هيك شي ، بروح لشي قسم سياسي ، و بتنعــّم بهيك رفاهية ..


بنجي للنقطة التانية ..
ولنفرض انــّو اي ، بدّي اتنعــّم بالسياسة وقصصا ..
ما بيصير يكون الحديث على مستوى من الرقيّ والاحترام المتبادل !؟
قول رأيك ، وبقول رأيي ... بدون ما تسبني وتطعميني بهدلة لانـّك ما بتوافقني عليه .. وبدون ما تتهمني بتمسيح الجوخ و " لعق احذية " النظام لو كنت معون ، او العمالة والخيانة لو كنت ضدّون ...
ما في داعي لهالشي !!
اذا مانــّك قد مستوى النقاش وما بتقدر تتحكــّم باعصابك و لسانك ، لا تدخل يا اخي!!
بس هالحكي اللي عم يصير عيب ..
عنجد عيب ..