[Aeadh]

مساء الخير جميعاً


قبل حوالي الاربع شهور من اليوم انضميت لأسرة الفيس بوك الكبيرة ، ووقتها حبيت فكرة هالموقع كتير لأنو كان وسيلة تواصل كتير رائعة بين الناس خصوصا انو بيحمل معلومات واخبار عن سوريا ممكن حتى اهل البلد ما يكونوا عرفانين فيها ، لذلك كان بمثابة وسيلة تواصل رائعة الي هون بالغربة وصرت من خلالو حس وكأني مو عايش بغربة أبداً

لكن ... وقبل حوالي شهرين بدأ الاشخاص بتحويل صفحة نتوورك سوريا إلى ساحة للنقاش السياسي ... وياريتو كان نقاش سياسي ... بل كان عبارة عن شوية همج ما بيعرفوا غير السب والشتم على رموز البلد وشخصياتها بأسوأ واحقر الالفاظ بحجة "الدفاع عن الوطن وتحريره ".... وقتها عرفت انو صفحة الـForbidden قادمة عما قريب على شاشات المتصفحين السوريين ..

وللأسف .. الحجب صار وكلنا منعرف

لكن اللي ما توقف هو هدنك الرعاع اللي خليت الهن صفحة النتوورك ليحكوا فيها ويسبوا فيها باسم سوريا من دون ما حدا يردهن او يقلهم شي !!

والسؤال .. إلى متى ؟!؟!؟

ادارة الموقع " وحسب متابعتي للوضع " ما قصّرت ابدا .. وعمتحذف كل الردود والمواضيع اللي بتوصل لها عنهم مشاركات سيئة .. لكن مو من المعقول انو يتابعو كل حرف عمينكتب هنيك !! .... حتى انها قفلت بروفايلات كتير من هالاشخاص .. إلا انهم عادوا وكتبو ببروفايلات جديدة .. ولا كأن صار شي

كتير من الاشخاص حاولوا انهم يصلحوا البعض ويوقفوهم عند حدهم .. لكن ما في أمل!!


طيب وبعدين ؟؟.... شو الحل ؟؟...

المشكلة انو النتوورك هي واجهة البلد عالموقع .. يعني لما بيفوت حدا غريب وبيشوف هالمنظر شو بدو يقول ؟؟؟... تمنيت شوف اي نتوورك عربي بيشبه النتوورك السوري @@.... لك شي بيخزي والله

لذلك حبيت اطرح هالموضوع هون بركي منقدر نلاقي حل لهالمهزلة اللي عمتصير هنيك باسم " النقاش الحر في سوريا" .... لأن الحلول الفردية مستحيل تقدر تجيب نتيجة مع همج وحثالة متل المتواجدين هنيك

بانتظار آرائكم

أخوكم
إيـــاد

رابط النتوورك السوري
http://www.facebook.com/networks/67109366/Syria/