[karim94]

كاتب النص الأصلي : أبو طريق

أول شي أخ كريم أنا من حمص، وأهل حمص هيك اللهجة تبعهن، بعدين عنجد حزنتني، يا سيدي أنا ما قللت ادبي، بس رديت عليك بأسلوبك، حضرتك آخد مقلب كتير كبير بالشيوخ والفتاوي تبعوهن، وآكل مقلب أكبر بالجماعات الإسلامية، أنا ما بعرف قديش عمرك وشو طبيعة تجاربك بالحياة، بس صدقني أنا وغيري من الشباب عايشين وحاملين طموحاتنا عالفاضي، إنتي ما تعاملت مع هدول الجماعات الإسلامية متل ما نحنا تعاملنا معها، أو بالأحرى خليني احكي عن حالي، صدقني ما بيعرفوا بالإسلام غير اسمو وكلشي بيدعم مصالحهن الشخصية فقط، بعدين شوف العالم وين عايش، روح شوف الغرب وين وصلوا بعلوم الفضاء، بكفي نضحك على حالنا، ليك بأواخر ال2008 بدهن يبلشوا يسيروا رحلات سياحية عالفضاء، ومع نهاية ال2020 رح يكونوا بنوا قاعدة عالقمر استعدادا للهبوط على المريخ، غير الأسلحة وأقمار التجسس والأقمار العسكرية الفضائية يللي معباية الفضاء، بعرف رح تقللي في شغلات أولى بس عمبحكي عن المبدأ، إنو تطوروا بالعلم، وهادا العلم نحنا يللي عطيناهن أساسو، ونحنا أخدنا كمان الأساس من الحضارات يللي قبلنا، أنا برأيي قلب المؤمن هوي شيخك والمفتي تبعك، حضرتك يا أخي متسرع بإطلاق الأحكام على العالم، بالذات لما حكيت إني مسلم "إسلام ماشي حالك"، هي القوقعة يللي إنتي بنفسك حاطط حالك فيها اطلع منها، وشوف العالم والعلم كيف عميركضوا ونحنا مو بالقائمة أساسا، وأكبر همنا والله إزا الغني حرام ولا حلال، أو الحكي مع النسوان حلال ولا حرام. ما عمقللك روح ازني ولا تصللي ولا تصوم، بالعكس، ادي واجباتك الدينية، بس عطي أسباب وجودك على الأرض حقها، الله خلقك مشان تكتشف عظمة خلقو، مشان تكتشف قوة قدرتو وجلال عظمتو، مو مشان تقعد تسمع لشيوخ مهمتهن بهالحياة تضليل الشباب وتنويمن. ما بتوافقني إنو طالب الشريعة لازم يكون دارس قبلها شي تخصص علمي مشان يفهم الشريعة صح؟؟ أصلا لازم ممنوع حدا يدرس دين وشريعة إزا ما كان معو شهادة علمية بالرياضيات أو الفلك أو الفيزيا أو الكيميا أو...أو... مو والله واحد فشل بمجال تخصصو أو جاب معدل واطي بالثانوية العامة يروح عالشريعة مشان يطلع مفتي على شي قناة أو فضائية ويكسب الملايين، يا صاحبي هيك الواقع، ولازم نفتح عيوننا منيح، وما رح يفيدنا غير علمنا مشان نحتل العالم، وعلمنا ما رح يفيدنا إزا ما كان جواتنا إيمان بديننا وثقة بربنا، مشان هيك أميركا حاطة على العملة تبعها "In God we trust" بالله مو شي بجنن؟؟
المهم، أنا بعتذر من كل قلبي إزا جرحتك بكلامي، بس يا ريت هالطاقة الرائعة يللي فيك تصرفها على شي مفيد لدينك وشعبك، مو تهديها على طبق من ألماس للصهيونية.

أخي العزيز أبو طريق أنا كمان بعتذر عن شدة اللهجة معك التي هي نابعة من حرقتي على هذا الدين العظيم وما آل إليه.....أخي الإسلام لا يتعارض مع ما ذكرته...الإسلام لا يمنعك من طلب العلم, بالعكس طلب العلم فريضة على كل مسلم ومسلمة....والعلماء يؤكدون على ذلك ....السلف الصالح كانو رهبانا باليل و فرسانا بالنهار....يجمعون بين العلم الديني و العلم الدنيوي....
أما بالنسبة للجماعات الإسلامية فمن الحيف ,تعميم تجربة شخصية مع جماعة معينة على جميع الجماعات....ويا سيدي أنا تعاملت مع جماعات إسلامية من الصوفية إلى السلفية ولا أتكلم من فراغ.....

وميت وردة