[TheLight]

كاتب النص الأصلي : GOVERMENT

سؤالين هيك خفاف ع السريع
مارح طول عليك فين



رأيك بهالاعضاء التاليين ..
وبصــــراحة تـــامة ..
وبدون مجاملات

بصراحة تامة وبدون مجاملات؟؟
أوكي...ولا تقولو رفع السقف...
راح احكي يللي الي ويللي علي....وبتمنى ما يصير زعل بس متأكد أنو حيصير...



Gazita
ما سبق وصار حكي بيناتنا وما في أي معرفة شخصية مع أنها عتيقة بالمنتدى...بس بيعجبني قديشها مزوقة ودبلوماسية بردودها...من القلائل يللي ما قريتلهن رد مسيء...يتحسها سعيدة ومليانة ورود
Reemi
أم الريم....مؤخرا جدا لحكينا ببرايفت مع أنو نحن بدفعة منسقين وحدة...يعني طلعنا ع التنسيق بنفس الدفعة...هالبنت من القلائل يللي بيحس الواحد أنو أخوية أثرت فيهم...شخصيتها قوية...مرتبة بأفكارها...ما شفتها معصبة من زمان كتير...وكمان مؤخرا جدا عرفت انو صياد الطيور مو أخوها متل ما صرلي مفكرمن اول ما فتت ع المنتدى لهلق...
هرتني بتعليقاتها ع صوري بالفيس بوك....
marioma alghzayala
كمان من نفس الدفعة التنسيقية بس لحد هلق ما في اي حديث شخصي بيناتنا...عايشة بالفن والطرب...مؤخرا اكتشفت موهبتها الغنائية....الي عتب عليها كمشرفة انو قسمها مظلوم كتير...لأنو من شخص متلها عايش بالفن بتتوقع انو يكون قسم الموسيقى بالعلالي...
hanny dagher
أحد شخصين تفاجئت بعمرهم...الصغير نسبية بالمقارنة مع نوعية مشاركاتهم...أحيانا بستغرب انو هل بيحشش عن جد أو لاء...بيعجبني حس النكتة عندو...بتعجبني مواضيعه التحشيشية جدا...بيعجبني ذوقه بالبنات...عندو كم صورة بالفيس بوك مع كم مانيكان وعارضات بيشهو...ووعدني يخطبلي وما صدق
Willi
هو الشخص التاني يللي عمره العقلي بيسبق كتير عمرو الزمني...صوته متل صوت زلمة عمرو شي اربعين سنة
لما فتت ع اخوية كان مشرف...تعليقاته كتير ذكية ومهضومة...بس عصبي جدا...اسلوبه بالنقد بيكون احيانا قاسي..كتير بيكون معارض بطريقة قاسية...بتمنى منه انو يكون دبلوماسي ويخفف من حدته شوي...عدا عن ذلك ألو مستقبل كتير كبير مهنيا لانو ذكي جدا (بعتبرو عبقري أخوية)
layla
من كبارية وعتاق المنتدى...لما كانت مشرفة كان بدنا واسطة لحتى نخليها تعدل شي شغلة بالمكتبة كونها كانت مشرفة المكتبة...بتحسها بتضل مشغولة...مدري عشقانة مدري محششة...ما في معرفة شخصية بيناتنا ابدا...ومن كم يوم بس صرنا فريندز ع الفيس بوك...
sezar
بيقولو المختار...بس معلوماتي عنو كتير قليلة..بعرف انو بقطر...كان عندي فضول شديد أعرفو اكتر بس ما صار...
sweetbaby
ريتا....لطيفة وحبابة وقلبها طيب...تفاجئت انها عم تدرس طب...كنت متوقعا لساتها بالمدرسة...بتضل تحركشني وتتهمني أني بخوف ومؤخرا نزلت موضوع استفتاء عن المشرف الاكثر تخويفا...وصوتتلي مرتين وحاليا عم اتقاسم الصدارة انا وياس...
الحاج متولي
الو ردود بتعجبني وبحسو كتير فهمان وفي الو ردو ما بتعجبني...بشكل عام واحد من الاعضاء يللي بحترمهم بأخوية...
maged-syrian
مانو من الاعضاء يللي لفتوي نظري وبالتالي ما كتير قريتلو...بس مما قرأتله بتمنى عليه انو يخفف شوي من حدة هجومة ببعض المواضيع...ممكن شاركه بوجهة نظرة ببعض المواضيع بس ما بشاركه اسلوبه ابدا...
butterfly
أكتر شخص عطى ولازال عم يعطي أخوية...حوالي 1800 كتاب بأخوية اكتر من نصهن منها...كنت دايما قلها انو كتير عم تتعب حالها مع أنو ما حدا بيقرا فليش عم تتعبي حالك..كانت تقلي لو واحد بالمية من اخوية عم ينزل هالكتب زيقرا فبيكفيني...نشيطة جدا...وما بتتعب...حساسة جدا...كتير من الاعضاء مقصرين بحقها...بيأذوها بكلامهم بدون ما يحسو..ومع هاد وكلو ما بتوقف عن العطاء...
وشم الجمال
مؤخرا انتبهت ع وجودها بأخوية بس شفت اسألتها بالمقلاية...ما فيني اعطي رأي فيها كوني ما قاريلها شي...لازم اقعد انكش مشاركاتها لاعرفها اكتر....اسمها ملفت للنظر وصورتها الشخصية حلوة...بحسها عايشة بالشعر...بيجوز
Syrian__Angel
بتغيب بتغيب وبترجع...كمان من نفس الدفعة التنسيقية بس ما في اي معرفة شخصية...ردودها معبايين تشكيل..بحسها معلمة عربي...شخصيا بحسها طيوبة بس احيانا عندها ردود مابوافقها عليها مع انها كتير موضوعية بأراءها...
أبو شريك,
ما فيني احكي عنو...ما بعرفو ومو قاريلو شي...بتذكر انو كان حاطط صورة زين الدين زيدان بس ما عم اقدر اتذكر اي شي عن نوعية مشاركاته او اسلوبه...
Hashtnasht
مدخن من الطراز الاول...يللي بيقرا ردوده ومشاركاته القديمة بيقول حشاش نظامي...تعليقاته واسلوبه وافكاره مذهلة...بستمتع بتحشيشاته جدا...عندو ردود مريخية...حكينا ع المسنجر كم مرة...بس بحس بالحسرة انو علاقتنا ما قويت اكتر...من الاشخاص يللي بتدايق بس فكر انهن تركو اخوية....
(عندو صورة بالفيس بوك كل ما شوفها بضحك وبحس بسعادة غريبة...عم يشعل سيجارة من نافورة مي صغير بقلب ساحة وكاتب تحتها " نافورة حمص المركزية '' )...
مثقف جدا....موسيقيا عندو مخزون رائع..هو يللي صنع قسم الموسيقى...من وقت ما تركو ما عاد فتت عليه...وبالفترة يللي حاولت اني ضل رافع لواء هالقسم كوني كنت منسق معو, بلش هو يبعد شوي شوي وبلش هالشي يضعف همتي جدا وبالنهاية كمان تركت القسم....بصراحة قسم الموسيقى انتهى بعد ما تركوا...
ASHعبّود...كتير قلبو طيب...بيفرض عليك بمحبته وشهامته انك تحبّو وتحترمو...كتير فريندلي وبيكسر الحواجز دغري...بعتب عليه بشغلة انو بيحط صورته الشخصية بملفه...بصراحة ما بحب حركات هالكهربا...بس بيحقلو يا عمي...شخصية....
دايما بيبادر نحو التعرف ع الاخرين...هو اول ما تحركش فيني...هو يللي اخد مسنجري..هو الوحيد يللي استفقدني بالفترة يللي غبت فيها عن اخوية من شي شهرين لانو كنت عم انتقل وما كان عندي انترنت...بحبو جدا مع انو ما كتير بنحكي ع مسنجر... ٍٍٍSyrian Gay
أسلوبه كتير رايق...قدر بشخصيته يكسب محبة كل الاعضاء مع انو بالبداية اسمه خلق كتير مشاكل وكتير استيئاء من كتير ناس...
أنا شخصيا بحترم قناعاته...ما بقدر اني لومه عليها بس ما قدرت بسهولة اتقبل انو اسمه لازم يعبر عن ميوله...ولحد هلق ما كتير مقتنع بهالشي...يعني لو كاتب مختار اسم عادي بس معبر بتوقيعه مثلا عن ميوله, كنت اقتنعت اكتر باسلوب طرحه لمشكلته....
قبولنا للأخر أمر كتير مهم بعلاقاتنا الانسانية...انا بحترمه لرامي...
Fares
فارس من كبارية أخوية...عطى كتير للمكتبة...عندو بعض الجمل بالخواطر والخربشات مضيئة...بيأسفني جدا اني ما قدرت اتعرف عليه بشكل شخصي...بتمنى هالشي يصير...بتمنالو التوفيق باختصاصه ودراسته....
Geeny
بعد زمان ما شفناها بأخوية...ما قدرت اعرفها منيح...بس بحترمها...صورتها الرمزية دوختني لقدرت فسر طلاسمها....
yass
ياس قصة تانية...شخصية كتير حلوة...فكر كتير عالي وراقي...ثقافته عالية...ذكي جدا...بشوفه سياسي اكتر ما بشوفه طبيب...جدي كتير بس وقت بنحكي ع المسنجر بستمتع بحديثه...برأي أفضل مين ممكن يرفع لواء المنبر يللي شهد دفعة قوية كتيرة بعد ما رجع عليه وصار يشارك فيه...
بقلو انو مافي شي بيستاهل يعصب منشانه...
كهربجي
بنتقاسم ذوق موسيقي واحد...بحبو وبحترمو كمان بس احيانا متسرع شوي بقراراته...بتمنى انو يفتح اكتر زاوية رؤيته للامور وقرائته للوقائع...عندو الارضية ليكون مميز اكتر رغم اني سلفا بعتبرو من الاشخاص المميزين....
راديا
اول شخص بالمنتدى بتخانق انا وياه بشكل عنيف...تبادينا بعض البرايفتات الصدامية...كانت بدها تبعتلي قرايبينها يللي بفرنسا يقتلوني...بس بعدين تحسنت علاقتنا كتير...طيوبة وهبولة...
حاليا ومؤخرا ما عم اقدر افهم نوعية المواضيع يللي عم تنزلهن بأخوية...صايرة النوعية شوي غريبة...وكلهم منقوليين من منتديات غريبة عجيبة...
SABE
هاد العكيد...هاد...اجا ع باريس ع راس السنة وما دريت انو هون...كنت متمني شوفه...ما قويت علاقتنا بشكل كبير...بس كوني رايح ع المانيا بالشهر الرابع فبدي شوفه اذا كنت قريب من المدينة يللي عايش فيها...
رأي فيه انو شخص كتير طيب وبينحب...
HUS
حسام...
رغم انو أصغر مني بالعمر بس وقت بنحكي ما بقدر الو حسام (حاف)...ما بقدر الا ناديلو حكيم...أحيانا بحاول اني اكسر هالحاجز بس ما بقدر...
ليش بناديله حكيم؟؟
لانه من الاشخاص يللي بدك تحترمهم غصب عنك...مقدار ضخم جدا من الثقافة...سياسيا مثقف...علميا قوي...فكريا بنحنيلو...مبرمج معلوماتية من الطراز الاول والقلائل ع مستوى الوطن العربي علماً أنه دراسته طبّية...اسلوبه بالنكتة رهيب...ردود طويلة جدا لكنها ذكية جدا جدا..محلل بارع...عندو مشروع بالحياة...كتير دقيق بشغله...طاقته لا تنتهي...بتفاجئ انو بيمتلك كل هالمعارف رغم انو عمره صغير...الشخص الوحيد يللي بنكش مواضيعه وردوده منشان اقراها حتى لو كنت قاريها من قبل...
بتمنى أني اقدر حقق لو عشرة بالمية من يللي حققه بحياته....
الله يوفقه...
Barleb
بارليب او عاشق من سوريا...بحبه كتير وبشاطره غالبا بارائه بس عندي مأخذ كتير عليه....
عصبي كتير...أحيانا ردوده كتير قاسية..أسلوب سخريته بيميل بكتير من الاوقات للتجريح...واحيانا بيستعمل ألفاظ سيئة....نصيحتي ألو أنو يبدل أسلوبه شوي وانا واثق انو حيكون من المحبوبين من الكل...عندو الباع ليكون شخص كتي ناجح بالحياة لو انو بيدرس شوي زيادة ولو بيغير أسلوبه....
باشق مجروح
كنت بفضل ما علق او أعطي رأيي فيه...
فهمني بطريقة خاطئة بأحد المواضيع يللي شاركت فيها مؤخرا...ما قرأ بتمعن ردّي وخلاني حاور بطريقة ما بحاور فيها عادة...وبلاقي حالي للمرة الاولى بدير ضهري لنقاش وبمشي...اعتبرني متحيز بموقفي وديكتاتوري بالحوار...
بحترم رآيه فيني...الو الحق يقتنع فيه...بس ماني قادر اني ارجع لحوار معه
وهي وردة
لأنو اختلاف في الرأي لا يفسد للود قضية...
the light
يمكن هو شويه نقد ذاتي...ويمكن فيه شوية مديح...
مهنيا ناجح وسعيد بهالشي...قدر بفترة قصيرة انو يقفز قفزات نوعية كتير كبيرة بس ما بيدرس أبداً..ومطلوب منو جهد أكبر اذا بدو يحافظ ع سويته العلمية...
اجتماعيا..مش قادر انو يطلع من حالة الوحدة يللي بيحبها...رغم أنو نسبيا ناجح...
قلبو طيب لدرجة انو البعض بكتير حالات قدر يستغلو بهالشغلة...حاليا عم يميل للتشاؤمية جدا وفقدان الثقة بالاخرين ويمكن بالنفس...
سرسورة
كنّا بكلية الطب بالشام سوا...وياما مجتمعين بالمكتبة سوا بس ما كنت اعرفها...بعد ما فتت ع اخوية عرفتها وعرفت انو عنّا كتير معارف مشتركين...
بحترمها كتير...قلبها طيب جداً...كطبيبة حتكون ناجحة حكماً...
محمد ابراهيم
محمد ابراهيم ما فيني قيمه كشخص لأنو اكيد سابقني بمراحل وخصوصا فكريا...برأيي انو مثقف جدا...بتمنى شوفه مشرف بأخوية...قادر يستنر بعطاء...
رغم اختلاف قناعاتنا الفكرية بحكم اختلاف الخلفية الدينية...ما بقدر ما ارفعله القبعة...
GOVERMENT
حسووون...رغم صغر سنو ما قدرت اني ما اتعامل معه بأخوية....تعليقاته حلوة..وعندو تخويتات لذيذة...بس مش كتير ناضج...بعتقد بحاجة انو يخفف شوي من الوقت يللي بيضيعو بأخوية بطق الحنك ليقرأ أكتر المواضيع الجدّية يللي حتغنيه فكريا كتير...أنو أخوية مو بس تقفيل وتشات لك حسون...أخوية مشرب من مشارب الثقافة الكبيرة ويللي عم تنقل خبرات ناس كتير مثقفين...
صياد الطيور
كل شي بعرفو عنّه أنو بيحب جورج وسوف...
اسير التشرد
أنا شخصيا بحبه مع أنو مو كتير بيشاركوني الرأي...
رأيي أنو تسرع بكتير مواقف بأخوية خلتنا نخسرو ككادر أشرافي....أحيانا بيستفزك بردوده...بس بضل حبّه
phoenixbird
بحترم أفكاره وطريقة نقاشو...استضافني ببرنامجو وعطاني رغبة أرجع اكتب ولو كانت مؤقتة...أثار بمقلاية كتير من التساؤلات حوله كشخص...ويمكن بعض الشكوك...بتمنى يكون حذر بعلاقاته الشخصية....
the morrning
بتذكرني بمرحلة كتير مهمة من حياتي بأخوية...مذوقة جدا...ذكية...لطيفة...ولذيذة...
ما عندي كتير معلومات عنها كشخص...بس كعضو بأخوية ألها بصمة كتير مهمة...رغم أنها صغيرة بالعمر...
ماعندي أي شي انتقدها فيه...هالبنت كاملة وبتمنى بالمرحلة الجايية نجع نشوفها بأخوية...
COSTA
أول شخص صادقته بأخوية واول شخص عاديته بأخوية....
بيشوفني متسرع...بشوف انو اساء لثقتي يللي كانت عندي فيه...
handsome
وسيم...أخوه لسعيد العكيد...
لطيف..ومحترم جدا...ابن بلد أصيل...
للأسف ما قدرت أتعرف عليه اكتر...بتمنى يرجع لنشوفه...
abosleman
هالزلمة راقي...ناطر شوفه مشرف بأخوية...بحسه كبير...ومميز جدا...بس ما عندي أي معلومات عنو شخصيا...
LiOnHeArT (سابقا)
تائه في النور حاليا...
تصرفه كان خاطئ جدا جدا...غلط بحق مرسيل كمشرفة رغم أنو أخطأ واعترف بخطأه بنفس الوقت...ما كان في داعي للانسحاب بهالطريقة...
بتمنى أني أرجع شوفه بأخوية...
وبقلو...صحيح نحن ممكن نقسى شوي بردودنا بس ما بيعني هاد انو بنكره حدا....بالعكس..بتمنى تكون أخوية تكون بيت للكل...
betty_palestine
غلطت بحق ياس...وبحق البعض...
وأنا رديت ع تعليقاتها بشكل قاسي بس ما قدرت اني شوف واسكت...
بدي قلها شغلة وبتمنى تاخدها من أخ لأخته...يمكن أخوية موقع انترنت بس هو الفرصة الكبرى انو نتعلم من الاخرين...ونتقبل الاخرين...مو غلط ننقد بس عيب نجرّح...
أنا قسيت بردي عليكي لانك غلطتي...واذا اسلوبي كان قاسي فبعتذر...بس لا تنسي انو دايما الانسان بيتعلم من الاكبر منه...
yamen_h
يامن...وما ادراكم ما يامن...
سميع موسيقى رهيب...وعندو مشروع كتير حلوة بالموسيقى..حكينا مرتين ع المسنجر وبكل مرة كان يسهرني للخمسة الصبح...لاني استمتعت كتير بالحديث معه...
بتمنى ما يظلم مشروعه المهني ع خساب حلمه الموسيقي بس ما بدي ياه يتخلى عن الاخير...
BL@CK
الشخص الوحيد من يللي دخل ع اخوية مؤخرا وليللي عبالي راسي...انسان مثقف...ما بعرف ليش تشاؤمي...اسلوبه ذكي...جريء جدا...وما بحب أني شوفه عم يتراجع عن جرأته....
كاتب خواطر ذو اسلوب رائع...من القلائل جدا ليللي بقرالهن اول ما فوت ع اخوية...خصوصا انو مؤخرا ما عم اقدر اقرا شي...بس بنكش ردودخ ومواضيع خص نص لاقراهن...
أحدهم شبه وائل ألي...بالحقيقة ما بقدر شوف أي تشابه بيناتنا...سابقني بكتير...جد...
MadMax
ما بعرفه شخصيا بس واثق انو منّو بيصنعو خلاصة الحشيش...
بتخيله ابن الضيعة الصغيرة ع الساحل السوري يللي عايش ببيت صغير, فيها مكتبة كبيرة بصالون فيه صوبية..وبالزاوية قاعد عم يشرب كاسة متة...ويقرا
بيذكرني كتير بضيعتنا...بحسو متل السمك..اذا طلع من الضيعة بيختنق....
بحترمه جدا...
وائل76
الشخص الوحيد يللي ضليت ع اتصال فيه السنة الماضية...جمعتنا هموم وحدة وقصص مشابهة...
مثقف سياسيا بغض النظر عن توجهه السياسي....عندو المقدرة يوصل لمطارح بعيدة...
صرلي زمان ما حكيت معو...بتمنى يكون منيح وطلع شوي من اكتئابه....
اشتقتلو...
مسطول ع طول
مثير للجدل...حاد احيانا بس جريء وما بتفرق معو شي....رغم انو بسياق كتير ردود بيسب بس بيحترم محاوره....من يللي كان غياب كريم ع المنبر سبب غيابهم عنّو كمان...بحب شوفه عم يرجع
شامي من طوكيو
ما كتير بقدر احكي عنّو...ما كتير بعرفو...
أمرأة من ورق
امرأة من ذهب...
رائعة باخلاقها وثقافتها وحواراتها....
بتمنى تضل معنا باخوية....هيك انسانة صعب تتعوض....
Roaa
مهضومة...وطيوبة....وخرجها الكعوب العالية...
شخصيا مابعرفها ابدا
مايا*
راقية جدا....منفتحة ع الحوار...اسلوبها بيشدني...
خسارة نشوفها بعيدة عن أخوية...
لبندا
ما بعرفها بشكل شخصي...بس قارئة جيد جدا...ومثقفة...ومزوقة....متل ما قيل عنها..الها بصمة بأخوية
fofo besset syria
فاتت ع اخوية بالفترة يللي كننت بعيد...ما بعرفها ابدا...ولحد هلق ما عم اعرف شلون بينلفظ المقطع التاني باسمها ولا بعرف شو بيعني....
بس بيكفي انها صديقة ريمي لكون واثق من رقيها....
Abu Guzef
كمان ما بعرفه....
بس بحسه بيتخوت كتير....وبينق كتير...وما عم يستفيد كتير من اخوية....
الموسيقار,
من المميزين جدا بأخوية...ما حصلي الشرف اني اتعرف عليه...
أكيد مو أنا يللي بقيمه...
كاتب جيد...وقارئ جيد ومحاور محترم جدا....
فاوست
جريء جدا...مثير للجدل باسلوب طرحه للمعارضة...أحيانا بيكون حاد...
المشكلة انو اسلوبه احيانا بيخليك تاخد موقف معارض مع أنو ممكن تكون مقتنع بالشي يللي عم يقولو....واحيانا بيخليك اسلوبو تفكر الف مرة انك تكمل قراية مواضيعه...
عم ينسى أنوالاسلوب أهم بكتير من الفكرة....كبار المفكرين قدرو يتركو بصمة لأنهم كانو محاورين مناورين واذكياء....
ظل جيفارا
عم حك راسي وحاول فكر شو بدي قول....
عندو خلفية ثقافية مميزة....يمكن ما قدرت افهمه اكتر...
ملاك السعودية
ما بقدر لومها انها بالتدافع عن بلدها ومابقدر لومها انها بتتهجم ع سوريا....
كتار من الاعضاء بأهوية عم يتهجمو ع السعودية لمجرد السخرية...مش لاظهار الاخطاء او لنقد نظامها الاجتماعي او السياسي....اكيد هالشي مابيوصل لحوار مفيد....
محمد السعودي
ما حبيته بصراحة...وما كتير حبيت اسلوبه بطرح المواضيع....
التقرير الجوال
بحسو معتدل احيانا واحيانا بحسو شوي متطرف....
اكيد مانو شخص عادي...عندو شي يقدمو بس ما بيعجبني اسلوبه بكتير مواقع...يمكن بسبب اختلاف القناعات الفكرية عند كل واحد منا عن الاخر...
secular سابقا
نجاج تسويق الفكرة هو دايما مرابط بنجاح الاسلوب....
أنا ضد ثم ضد ثم ضد اسلوبه بالمنتدى....مع عندي شك انو هو احد الاعضاء السابقين بأخوية....
اسلوبه مستفز...ما عم اقدر شوف انو عندو رساله او هدف...الا استفزاز الاخرين لاثارة المشاكل...
Nirvana
أنسانة بمعنى الكلمة...راقية...مثقفة...متنو� �ة...
عنا معاناة مشتركة...ثبطتنا...هي قدرت ترجع توقف...أنا ما قدرت....
بأحد المواضيع قالت انها مش حتترك أحوية حتى لو رجعت أخوية ع الورق....بس اختفت...
wasi6m (شفت شلون مانسيتك هالمرة )
عفوا منك وسيم بس ما حلي اعرف عنك غير انك عم تدرس ببولونيا...
لفتت نظري رد ألك من يومين رد مكتوب بخط عريض بنص الصفحة بأحد المواضيع....ما حبيت الطريقة يللي عبرت فيها عن نفسك...

حاج ولا لسى؟؟
ساعتين ونص كرمال سؤال السيد حسووووون....
ع هالحالة بدكون تتعبو كتير معي....وانا كمان بدي اتعب معكون....

صار بدها بريك إن....