أنا ماني فهمان ليش يا باشق عم تعطي لنفسك الحق انو تحوّل الامر الى شخصي و عم تمنع او تحرّم هالأمر علينا... يعني انت عم تقول انو أنك شفت بردي متكبّر, مستغرب فعلا
أول شي اسمحلي قلك على اعتبار عم نحكي على بساط أحمدي (أحلى انواع الكلام عندي بصراحة) انو ردودك على ذالايت ظالمة بل و ظالمة جدا.... هاد رأي أخي تعا نحكي آراء. انت زعلك على رفيقك ما خلاك تشوف الغلط تبعو... يا أخي طيب غلطو واضح وهو بيعرف انو غلطان, ليش لكل هالمسرحية, و تركة المنتدى ليش؟؟؟ يعني أنا صارلي بالمنتدى من فتح تقريبا, و الشهر الماضي أكلت مخالفة من زميلنا كهربجي اللي لما هو فات عالمنتدى أنا كنت متقاعد من الاشراف... أي مزبوط انزعجت بس اترك المنتدى؟؟؟ شقفة مخالفة, و اساسا ما مبينة للاعضاء يعني اذا ما بتحكي فيها ما حدا بيعرف, شو المشكلة؟ بيعرف حالو غلطان.....وين المشكلة؟؟
ذالايت مجرد عمل سرد لوقائع موجودة أمامنا جميعا, يعني معليش أنا متفهّم انو الاخ صديقك و متألم على تركو للمنتدى ( و على فكرة تركو للمنتدى تم بارادتو, ما حدا جبرو, يعني لو كل اللي بياكلو مخالفات بيتركو المنتدى كان كلنا تركنا و أنا أولهون) بس يا ترى الألم هاد بيمنعك تقدّر انو أنا أو ذا لايت أو بلاك كمان نحب مرسيل و ما بدنا تنمس بسوء و خاصة لما ما تستحق هالسوء متل هالحالة؟
هلأ برجع على قضية التكبّر, صديقي انت مركّز على ردي هاد:
اقتباس:
|
و بالنسبة للسيدة أو آنسة اللي جاية على ما يبدو يعلمنا اشراف
|
اللي سبق و قلتلك انو كان ردا على
اقتباس:
|
وبعدين هيي اللي اختارت تكون مشرفة والاشراف مو هالقصة الكبيرة يعني بلا ما نكبر روس بعض
|
طيب أنا عندي تعليق على هالشغلة: يعني اذا هيي مشرفة لازم تتحمّل اهانات؟؟؟ أو لازم تتحمّل اتهامات باطلة؟؟ أنا بعرف انو سياسيي الدول الغربية في برواتبهون قسم من المال تعويض عن الجانب الشخصي من الاهانات, و في اهانات ما بيسكتو عليها متل الاتهام الغير مثبت بالفساد.... نحنا لا راتب عنا و لا شي, بالعكس جهد و مال الله وكيلك بيكلفنا, و أكيد مرسيل بقد أغلبنا مجتمعين (كمشرفين) تشتغل و تتعب و الجهد واضح بأقسامها... و بعرف لأنو مريت بمرحلة شبيهة سابقا كمشرف انو هاد عمل تطوعي, بيعملو الواحد لأنو بدو يفيد, الاشراف مو منصب و لا جاه و لا سيارة, الاشراف مجهود مضاف يقوم فيه ناس متطوعين, و لما تكون متطوع غالبا تعرف انو ما حدا راح يشكرك ( و بصراحة هو الشكر حلو و لو مو منتظرو) و ما بدنا انو العالم تشكر المشرفين... بس انو اساءة هيك متل اتهام باطل الله وكيلك مؤلمة, يعني اللي بدو يزت حكي ع مرسيل بس بدي ياه يفكر بالكتاب اللي نزلو من المكتبة من وصلة خارجية قديه قعدت مرسيل تنقل كتب على وصلات خارجية كرمال مشكلة المرفقات, و على سرعة النت بسوريا قديه اخد معها وقت و جهد نقل كل هالكتب.... اخي لا تشكر... بس انو كمان لا تتهم باطل..
برجع على ردود بيتي... انا لما رديت ردي اللي زعجك كانت هي رادة ما يلي
اقتباس:
روح عنا ياه كلك مشرف ما تفكر حالك شي وزير وبتخوفنا
وانت اللي بتكزب ما بسمحلك حط لحكيك حدود احسنلك
|
هاد كان رد بعد مرتين تأكيد انو مو مخالفة انما تنويه, و حابب تنسى غضب و تقلي انو اذا ما فيو اساءة هالرد, انا ما غلطت عليها.... عم قلها انو عم تفتري لأنو ما أكلت مخالفة و الاثبات سهل و جابو ذالايت... و انا حابب أعرف بشو
لأنو هاي الكلمة بدون اثبات اهانة كبرى بحقي, و لأ ماني مجبور استحملها و اسكت لأني مشرف... لا و براس امي
غير هيك أنا معتبر انو عدا كذَاب نعتتني بالغبي لما قالت
اقتباس:
|
يييييييييي باينتو فهمك بطيء عيني لك
|
و كمان فيك تعتبر ردي رد على قولها
اقتباس:
وعلى شو هيي بتعطي خلق الله تنويهات وهالتخابيص اه كل راس ابوها تنئلو للموضوع
او تحكيلي ما تحطي هاد هون ولا الشغلة بس تنويهات وهالقصص وانت كمان اطلع من الموضوع احسن
|
هاي مو دروس اشراف اخي باشق؟؟ و بتقلي متكبّر أنا؟
لما للمرة الثالثة أصريت انو هي مو آخدة مخالفة انما تنويه و قلتلها معليش جل من لا يخطئ اعترفي بغلطك و اعتذري ردت
اقتباس:
هههههههههه ضحكتني عمو ما بعتزر انا منيييييييح ما بعتزر وما رح اعتزر وما بدي رد عليك
زهئتني
|
شو يعني الاعتذار بس واجب عالمشرفين يا شباب؟؟؟
عموما أنا ما عندي مشكلة اني اعتذر عن جملتي اذا كتير معتبرها مزعجة بعد كل هالحكي مو مشكلة... بشرط انو كل من اساء لمشرف بدون وجه حق يعتذر, و اللي عندو شكوى يحطها بالبريد لأنو هنيك مكانها. ما عندي أي مشكلة أبدا اني اعتذر, و كلامي هلأ بهاللحظة ماني معتبرو خاطئ بنوب, بس اذا تم سحب الاساءات و الاعتذار عنها أنا أول المعتذرين و بدون أي مشكلة...
كختام لهالرد بس حابب قول انو المشرفين قبل ما يكونو مشرفين هنن أعضاء, و عندهم نفس مشاكل الاعضاء و عليهم أضعاف مضاعفة من الالتزامات ( مو منية أبدا... بس تذكير) و في من اللي بهالموضوع عاجلا أم آجلا كمان راح يصيرو مشرفين (اذا حبو) و بتمنى بس يصيرو مشرفين و يعودو ما يلحقو رسائل خاصة و تبليغات يتذكرونا... بس هيك
راح وقّف كلام لأنو رغم انو في كلام كتير تاني أعتقد انو هالحكي كافي لشرح موقفنا كمشرفين (هو ماني ناطق باسمهون... بس انو)
آسف جدا للاطالة
