انا رايي انو الكلام عن الصحوة والمد الاسلامي متل العادة مبالغ في كتير يعني كل كم سنة بيطلعولك بنفس النغمة وكلها بتطلع بالاخير تلاعب من اولياء امورنا الله يخلصنا منن
مثلا بزمانو بمصر بعد فترة عبد الناصر اجى السادات اللي لقى انو الد اعدائو هني الناصريين والشيوعيين فقام طالع كل الاسلاميين من السجون وسمحلن يعملو اللي بدن ياه كمان بوقتها انحكي كتيير عن الصحوة الاسلامية وهلق صارت موضة بالدول العربية يعني مثلا سوريا ليش بيسمحوا بكل مظاهر التدين اللي عم تزيد رغم انو نظامنا معروف شو توجهاتو؟؟ ليش سمحوا بظاهرة ابو القعقاع وامثالو؟؟ لسبب بسيط ليوصلوا للعالم الخارجي رسالة واضحة انو شوفوا كل هالمتطرفين بسوريا ما في غيرنا بيقدر يلمن
بقى القصة هي سياسة واستغلال للدين ومو قصة صحوة
وانا بقول انو الصحوة الاسلامية الحقيقية ما بتكون بالمظاهر وانما :
لما بتروح على حي بيسكنوا مسلمين بالشام وبتلاقي انضف من القصاع وباب توما
لما بتنخفض معدلات الطلاق بين المسلمين
لما منشوف الغلط ومنقول انو غلط مو منضل مطنشين لحتى يصير الغلط هو الصح والصح هو الغلط
لما بيطلع واحد مريض نفسيا متل الظواهري وبيحرض المسلمين على التفجير والقتل وقطع الرؤوس منوقف كلنا ومنبزق عليه ومنفهموا انو نحني منعرف دينا صح اكتر منو
لما منحط رجلنا على اول طريق التقدم متل بقية شعوب الارض اللي تصاب بكبوة لفترة معينة وبعدين بترجع للطريق الصحيح
ساعتها فيكن تسموها صحوة وغير هيك رح نضل متل مانكن شايفين
|