مرحبااا
شلون الجميع
انا كنت بسوريا اجازة لمدة 5 اسابيع و هلق رجعت على كندا... و عندي هيك كم نصيحة للمغترب لما بدو يرجع ع سوريا
في المطار
إياك أن تنغر بالمظهر الخارجي لمطار دمشق الدولي و تدخل على الحمامات بدون محارم! الغلطة هنا بكفرة.
و الجميل في الموضوع أنك و بعد خروجك من الحمامات ستجد "خالة" قاعدة على كرسي و ستنظر إليك بابتسامة و تناولك محرمتين ... أليس من المفروض ان يعطوك المحارم قبل الدخول إلى الحمام؟؟؟
لا تعتمد على ساعات مطار دمشق الدولي... انا بنفسي ضليت صافن ساعة بإحدى الساعات و لم تتحرك عن الحدعش إلا ربع قيد أنملة
في المطاعم
تحدث إلى الغرسون بكل احترام و خلي صوتك واطي و حط عيونك بالارض... الغراسنة السوريون يتميزون بالحساسية و المشاعر المرهفة و يجب ان تختار كلامك بعناية عندما تتحدث معهم... لانو مثلا اذا قلتله شي مرة إنو الاكل صرلو نص ساعة ما إجا يمكن يقلك: نص ساعة؟ اي نطرلك نص ساعة تاني و بيجي
و اذا أردت الذهاب الى مطعم في مرمريتا او أي من مطاعم الضيع او على جبل السيدة... فخذ معك قتالة دبان مشان النحل. أعتقد ان معظم هذه المطاعم تربي خلية نحل او خليتان
و أوعك تتحمس كتير بالبخشيش!!! متل قلّته. و لا تتفاجأ اذا الغرسون لم يرجع لك الباقي من الحساب و قام باقتطاع البخشيش منو لحالو.صحيح الغرسون إنسان شفاف و حساس... بس طاقق عنده عرق الحياء
في الشارع
قوي قلبك مع سواقين التكاسي و عند قطعة الشارع... انا شخصيا أول كم يوم كنت متلبك كتير من قطعة الشارع خصوصي عند الساعة الجديدة في حمص! و الشباب عم يقطعوا الشارع من نص الساحة و ما سائلين! بس ما تخاف.. مع الوقت بيصير عندك فراسة بالموضوع و بتصير تقدر تتنبأ لوين رح تروح هل سيارة و هية بعيدة
في المعاملات
مشان النبي جيب معك طوابع قبل ما تجي على المعاملة!!! و خليك على يقين انو الطابع أبو الاربع ليرات ما رح يمشي حالو بدل الطابع أبو ليرة
ما تستهوش و تعملي مزوق و أجنباوي بالوقفة على الدور... طاحش يا ابني و خلي معك دايما بجيبتك خمسينات و ميات مشان الحلوان...
الموبايلات
اذا أخدت خط "تشريج"... أوعك تستهوش متل بعض الناس و تحاول تحكي على التلت ثواني.
و خلي قلبك كبير و بالك رايق لأنو في ناس رح تناقش معك مواضيع و تفتح معك سير على التلت ثواني
الشرب و الارغيلة
ما تطلب كوكتيل كحولي اذا المحل ما بتعرفو مية بالمية
مثلا اذا حابب تراجع فتذوق شي كوكتيل فودكا عند جوليا
اذا جعبالك تأرغل و تشربلك كاسة شاي... ما تروح على الروضة ترى بيلطشوك بالسعر... إذهب الى الكواكبي في الوعر... عنده قعدة جميلة و الغراسنة حبابين
هدول باختصار كم نصيحة من هون و هون... واذا فقعت معك كتير كتير حميل حالك و روح على الشاطئ الازرق شي كم يوم.... بس أوعى تفكر تطع لبرا و تتمشى
ذكرى مرور عام على وفاة الأديب العالمي سيبيري ماسكوليه 1932 - 2008