اقتباس:
وقت عم تفوتي على موضوع فيو مزح .. عمي كون التكفير عماد الموضوع الاساسي .. وقت عم تفوتي على موضوع .. ما معين .. بتلاقي من ضمن سياق الحديث انو تم سب الله بشكل عادي وعالماشي ..
بكون الواحد بدو يعبر عن سخرية ما .. بيدحش كلمة معينة .. بكون انو بدال ما يتوجه للمسخرة للعضو او شي
بما انو ممنوع المسخرة على العضو بتم المسخرة على " الله " !!
انو ما بعرف .. معقول يكون الكل شايف وما منتبه .. او اتعودنا على الكلمة .. وصارت اعتبارا كلمة عادية ..
ما في الها ايا مشكلة !!!
|
اي ...
معك انا بهالنقطة ... عنجد كتير بتدايق - بالمناسبة انا من الاشخاص اللي بتدايق منها كتير - ، ونبــّهت عليها كتير ... بس في مين يسمع !؟ ( وللمرة التانية ، الحكي عام ، عالاعضاء والمشرفين )
فعلاً اللي عم يصير ( واللي عم ينزع الجو تبع اخوية سنة عن سنة ) هيي هالقصص ، ليش؟
لانو بيدخل العضو الجديد ، بيعملـّو فتلة بالاقسام ، بيلاقي التيب العام للمنتدى هيك ، وهالشغلات مسموح فيها - مسموح فيها من حيث انو عم تصير قدام عيون المشرفين وما عم يعملو شي الاّ في حالة صار اعتراض من الاعضاء ووقتا بيتحرّكو ليحذفو او يعدلو - وكل العالم عم تقولها عااادي وبضحك ومسخرة ، فـ هو بياخد هالفكرة وبيكمّل معون ليدخل بالجو .. بيجي اللي بعدو نفس الشي .. واللي بعدو نفس الشي ... وبدل ما نحاول نحلّ المشكلة ونلمــّا ، عم نلاقيها عم تكبر يوم عن يوم وتزيد .. وبعدين بنجي بنقول " لك ليش هيك عم يصير !؟"
نقطة تانية عالسريع ..
انا من شوي حاولت بحبش ع رد للحكيم ، ما بعرف وين نزل او بأي قسم ، المهم ، كان ذاكر فيه انو لو بدّك تسب عالشيطان فـ ما بيحقّلك ، بركي يا اخي الشيطان الو اتباعو اللي بينزعجو اذا سبيت عليه !؟ لو بدّك تسب عالبقر ، فـ في عالم بيعبدوها .. بأي حق تغلط بحقّــون !؟
هو بالبداية ، الواحد بيتضحك ع الرد .. بس بعدين لو تجي للحق ، الافضل ما تسبّ ع شي لانــّو ما بتعرف مين بيقدسو ..
بس مو هون نقطتنا ... النقطة انو العالم تركو كل شي ، ولحقو الله .. ومع انو هالبند موجود ( متأكدة متأكدة يا جماعة واللي بيلاقيه يا ريت يحط اللينك وبكون ممنونة .. ) ، اي .. مع انو هالبند موجود بس العالم ضاربينها طناش ... ما بعرف يعني ليش مسموح للكل يغلطو بحق العالم اللي بتآمن فيه ، والمفروض فيهون - للي بيآمنو - ياخدوها بروح رياضية وانو " مزح عمي مزح " و " يعني الله رح ينزعج لو قلنا عليه هيك ؟ " .. لاء اتطمنــّو الله ما رح ينزعج ، بس في عالم بتحبّو بتنزعج ..
متل ما في عالم ما بتفرق معون اذا لعنت X من اهلها ، في عالم تانية ممكن تقتلك لو " مزحت " معون بهيك قصة ...
فـ الواجب فيك ، متل مو الطرف التاني محترمك ومحترم معتقداتك ، انت كمان بدورك تحترمو وما تغلط ع مقدّساتو..
وللمناسبة بما انو حكينا وحكينا ، من فترة صار بيني وبين واحد من الزملاء المشرفين " احتكاك " عالخفيف مشان هالقصة .. وانتهت بانــو قللي " حقكون علينا " .. هيي صح الشغلة صارت وصارت ، بس ما في مانع الواحد ينبّه التاني ع شغلة قالها ودايقتو ، وحتى لو ما كان الشخص التاني مقتنع بانو غلطان ، بس احتراماً لمشاعرك المفروض يوقّف عن هالفعل او القول بالمنتدى لانو مافيه يمنعك ما تشوف ردودو ...
وهاد اللي صار .. ع حدّ علمي لهلأ .. بس كمان ما كتير متابعة لاجزم !
اي اي كمان تذكرت شغلة ..
نقطـــة حكت عنها لمــّوش ، واللي هيي يكون الشخص اللي عم يمزح الو مكانة ولا ما بعرف شو ، اسمعي منــّي .. لو مين ما كان ، ابعتي تقرير مشاركة عاطلة ، لانو التقرير بيشوفو كل المشرفين ، مو بس مشرف القسم - للعلم فقط - .. يعني لو مثلاً وصل التقرير للمسؤول عن القسم وما عمل شي ، يمكن يكون بنفس الوقت شافو واحد تاني من المشرفين او الامناء وشاف انو المشرف ما عمل شي ...
فـ هون بيصير حكي بيناتون ليوصلو لنتيجة ..
بقي شي نسيت اذكرو ؟؟
بتمنــّى لاء .. لاني دخلت لاكتب كلمتين عالسريع وما بعرف شلون طلعو ، ما معي وقت راجعو ..
سلام
~*¤ô§ô¤*~ No Pain ... No Gain ~*¤ô§ô¤*~
المقاومة مخاطبة الحكّام العرب : لعن الله أناس مثلكم ، فقد أردت لكم الحياة فأردتم لي الموت ...
نسيَ الطينُ ساعةً أنــّه طينُُ ُ حقيــرُ ُ ... فـصالَ تيهاً وعربـــَد ...