[*Marwa*]

كاتب النص الأصلي : ويجا

السلام عليكم
انا تابعت الموضوع من الاول ورح قول رايي
فاقد الشيء لا يعطيه
والي ايده بالمي مو متل الي ايدو بالنار
يعني في ناس مع احترامي الكامل الها قاعدة عم تحكي وتفسر وتلاقي الاسباب وهاد
بقول السبب مو بيولوجي هو نفسي
والتاني بقول ما بعرف ايش
انا بحب اقلكن الانسان العارف هو الي مابيعطي رايه الا بالشي الي بيعرفه
يعني اذا المشكلة مو معكن فمستحيل تقدرو تحكمو على الي معه المشكلة
يعني انا بعترف اني هي المشكلة عندي وبعاني منها كتير وبدي اتغير وحاولت
بكل الطرق الطب مانفع لان اصلا لسا ما عرف السبب ليعرف الدواء
والصلاة صليت لوفيت
الصيام لا تحدث
الدعاء بكيت دم مو دموع وانا عم ادعي ربنا
الابتعاد عن المثيرات وابتعدت
محاولة اشغال النفس وما قصرت
وبقدر بقلكن اني شاب كامل الصحة
ومتعلم يعني مالي جاهل واهبل
ومنخرط في المجتمع يعني مو منعزل ووحيد
واتربيت احسن ترباية
ولا اغتصبت ولا حدا اتعدى علي
يعني ما حدا يقلي نفسي
وبالمقابل اعضاء جسمي كاملة وصحيحة كذكر ولحية وشارب وصوت خشن واش بدكن
بس البنات مالي علاقة فيهن لو كيف ماشفت البنت كاني عم شوف حيطة ما في
بس لو شفت شب جذاب او حلو راسا استثار جنسيا مابعرف ليش وكيف بس هيك حالة جسمي بتتغير من دون اي تدخل مني ولا بكون الي اي قدرة على السيطرة على الموضوع
وانا بعرف انه حرام بس مالي مقتنع ان ربنا رح يعاقبني لان انا بعرف وهو بيعرف ان مابايدي شي اعمله
جربت كل شي كل شي ما نفع
فياريت تتركو الناس بحالها ومايقعد كل واحد وهو مو فهمان عن هيك حالات شي الا القشور ما يقعد يحكم ويقول بقبل ولا برفض ولا الله يشفيهن لان الله مو منتظر دعائكن اولا وماحدا منتظر تقبل او ترفض تانيا
واحسن ما تحكمو على الناس دورا جواكم على مشاكلكن وحلوها
عذرا لو ازعجت حدا
بس الي بياكل العصي مو متل الي بيعدها



ورجاء من صاحب الموضوع يضيف للاستفتاء
انا منهم ومابيدي اعمل شي فحلو عني

كلامك كتير مؤثر .. انو حسيتك صادق
يعني هو بشكل عام وبكل صراحة المثليين اللي شفتهن بحياتي كانوا من اطيب الناس وارقهن واحيان بشعر انهن مظلومين..بس من جهة تانية عندي وعند كتير ناس في قناعات دينية ومبادىء ياللي صعب يستغنوا عنها ..انا عن نفسي بتمنى انو يكون في حل للمثلية الجنسية بحيث تتوافق مع الدين ومع المثليين انفسهم..لانو في كتير جوانب حلوة بالدين والله كتير منيح ومحب وانا ما بؤمن انو الله معقول يظلمكوا وانو يعاقبكوا على شي مش بايدكو.. انو ليه بدّو يكون قاسي هيك؟!! ..
مسالة المثلية الجنسية هية من اكتر المسائل اللي بتسببلي تخبط وارتباك بين القيم والمبادىء وبين الشخصيات المثلية والتعاطف معها

ومية اهلا فيك