اقتباس:
كاتب النص الأصلي : ايمان عادل
كفّارة يا بنت عم .. ولا بلاش
اخيرا حنيتى ورجعتى تانى
اخ منك اخ
نورتى يا مرمورة  |
حسابى معاكى لما اشوفك
بس اشتقتلك
المهم انا بقى دورت على القصيدة ولقيتها
ياريت تعجبكم
حاتجن...!
حاتجن ياريت ياخوانا مارحتش لندن ولا باريز
دى بلاد تمدين ونضافة وذوق ولطافه وحاجة تغيظ
***
مالاقيتش جدع متعافى، وحافى، وماشى يقشر خص
ولا شحط مشمرخ افندى معاه عود خلفه ونازل مص
ولا لب اسمر وسودانى وحمص وانزل ياتقزقيز
حاتجن ياريت ياخوانا مارحتش لندن ولا باريز
***
ولا عركة فى نص الليل دايره بالحيل وساحبها بوليس
قدامها جدع متجرجر وشه معور قال دا عريس
الخلق ماهى بتتجوز واشمعنى احنا مفيش تمييز
حاتجن ياريت ياخوانا مارحتش لندن ولا باريز
***
ولا واحده فى وش الفجر تبرطع ماليه الدنيا صوات
قال إيه جوز خالتى ام احمد سلفة اخوها السيد مات
سبحانك ما أعظم شانك والله الموت دا مفيد ولذيذ
حاتجن ياريت ياخوانا مارحتش لندن ولا باريز
***
ولا واحد طالع يجرى وواحد تانى بيجرى وراه
ويقول هاهع حصلتك يابن اللى ابصر إيه عاملاه
لا الشارع غيط ياخوانا ولا احنا بداره ولا احنا معيز
حاتجن ياريت ياخوانا مارحتش لندن ولا باريز
***
ولا واحد بيبيع حاجة يقول بريال وتاخدها بصاغ
ياخوانا دى حتى الإبره تاخدها بدوشه وقلب دماغ
حلفان وعراك ومناهده ويمكن ضرب كفوف ياحفيظ
حاتجن ياريت ياخوانا مارحتش لندن ولا باريز
***
ولا فيش ميت ألف صعيدى بتوع يانصيب هاجمين ولا فيش
ميت ألف معوض داعس جاى معاه صندوق ورنيش
والله كرهت القهوه وحرمت اقعد عالأفاريز
حاتجن ياريت ياخوانا مارحتش لندن ولا باريز