[اسبيرانزا]

فؤاد حداد
ينشد على ضي
بيرم التونسي
يا عم بيرم أقول وأنشد على ضيك
مين اللي زيك صاحب الكنز الأصيل
مغني شمس الأصيل
القافية بتطاوع معاه والنيل
والفكر بيطاوع
ولا عمر كلمة في بقه بتلاوع
مين اللي زيك يجيب الخوص في أغنية
جابو الصينية وعليها ورد مزوق
قلت الكريم يتشوق
جبت الصينية
وعليها الارغف والبصل والطماطم
مين اللي زيك عم ومعلم
الشمس بانت وانت بتسلم
والعقل نور لما تتكلم
خانق وعانق في مصر بشرها وخيرها
وبأرضها وطيرها
مالناش غيرها ، أم الكل
رضاك عشان ترضى عني ، قلبي صحبة فل
سلام مربع
( والشيخ زكريا بيغني ياصلاة الزين)
على عم بيرم يا صلاة الزين
عامل في عنبر
شيخ على منبر
في الفن عنتر
وكلامه حد السيف وقلبه بصير
ما يقولش ايدي قصيرة صوتي قصير
كان فارش الدنيا شجر وحصير
لما الفنون بتحاول التمصير
كان هو مصري وهو شيخ العرب
وما ينتهيش العجب
( والشيخ زكريا بيغني ياصلاة الزين)
على عم بيرم يا صلاة الزين

دا كان حديد العين وقلبه عفي
واضح كمثل الشمس ما يختفي
جار الزمن وحكم عليه يتنفي
يا دافيانين الليل وقلبه حفي
على مصر
أيامها كان الزمن باشا
واسمته الغشاشة لابسة البشاشه
لابس في رجل الانجليز متلمع
بيكره الكلمة اللي بتسمع
وزي نور الشمس بتجمع
ليه يا فانوس الحارة بتدمع
قال لي دا بيرم في الليالي اغترب
صحيح يا عيني كل رؤيا بسبب
لكن صحيح ما ينتهيش العجب

( والشيخ زكريا بيغني ياصلاة الزين)
على عم بيرم يا صلاة الزين
يوم القيامة ، أغاني سلامه
خمسين مقامه
ما فيهش أنزه من كدا ولا أجمل
عندك مثل آخر عن الحلو يكمل
دا عم بيرم يا أخي فتأمل
هو اللي سابق في مجال الميدان
هو اللي قايل قبل هذا الأوان
الفلاحين والشعب عين أعيان
مجمع فنون القول ومغني الأدب
وما ينتهيش العجب

( والشيخ زكريا بيغني ياصلاة الزين)
على عم بيرم يا صلاة الزين

-*-
شعر
فؤاد حداد
من ديوان
مصر المصرية بتغني