[اسد_الشام]

طبعاً الكل بيعرف المسرح وشو يعني مسرحية.....
والمسرحية إما بتكون كوميدية أو تراجيدية (( يعني نهاية حزينة))
وحتى نساوي مسرحية بدنا شخصيات ومكان وديكور وزمان وحكاية وأحداث.......
والمعروف بأنو لكل مسرحية نهاية
بس المسرحية يلي بدي ألكون ياها لهلأ مالها نهاية ومو معروفة نهايتها......
شخصيات المسرحية هنن هـ الناس (( طلاب مدارس-طلاب جامعات-موظفين-ختايرة-بياعين-عواطلية-شحادين....الخ))
والديكور والمكان هـ الحارات والشوارع والبيوت
وزمان هي المسرحية هو كل يوم من الصبح للمسا سبع أيام بالأسبوع لا مقطوعة ولا ممنوعة
الأحداث هيييي حدث ولا حرج مثلاً مشهد من هـ المسرحية ولاد بعمر الخمس سنين بينضفوا سيارات على لإشارات المرور.....ختايرة كبار عم يمشوا ويسحبوا اجريهون سحب لأنو ما معهم أجرة تكسي أو ميكرو.....زلمة حامل بسطة وعم ينادي من الصبح للمسا حتى ينبح صوته....شب طول بعرض بيفصل منين اثنين ناقع شهادة الجامعة بمي باردة وساند الحيط (( من كثرة الخبرات وخريجين الجامعات)) وغير هـ المشاهد كتير.....
- هلأ أنا بشوف أنو هي المسرحية تراجيدية مو ولا أنت شو رأيك ؟؟؟؟
- طيب كمان بحب الكوميدية وبحب أضحك ليش ما عم شوف مسرحيات كوميدية ؟؟؟؟
- ويلي محيرني أنو هـ المسرحية من وقت ما ولدت وهي مبلشة وما لحقتها من أولها مدري من
أي مشهد بلشت شوفها وما كانت تخلص وحاسس أنو رح موت وما رح تخلص.....؟؟؟
- طيب لما المسرحية تكون تراجيدية ومالها نهاية أو بتكون نهايتها مجهولة شو بيكون أسمها ؟؟

شكراً يا على مرورك وشو رأيك بالمسرحية ؟؟؟؟؟