ليش انا مسلم ؟ ليش انا مسيحي؟
مرحبا
مش رح خوض نقاش عقيم كالعادة بين الاديان
يلي شجعني افتح الموضوع هون هو لحد هلا ما حدا فتح موضوع مباشر ضد الدين الاسلامي او ضد الدين المسيحي
يعني لهجة التعصب الاعمى ما رح لاقيها هون انشا الله
سؤالي هو وكل يوم بسال نفسي
ليش انا مسلم ؟؟؟؟؟؟؟
الجواب بيجي عالسريع لانو ابي مسلم وانا ع دين ابي وخلص بحيا وبموت وبحاسب يوم القيامة بس لاني اتبعت ابي
كذلك الامر بالنسبة لكل الاديان كل شخص بيتدين ع دين ابوه
طيب انا شو ذنبي في حال كان ابي كافر شو ذنبي اني اتبعو اتباع اعمى ؟؟؟؟؟؟
بس لانو ابي خلص بدي قدس الدين يلي هو متبعو ؟؟؟؟؟ وهو ليش اتبعو ؟؟؟؟؟ مشان ابوه كمان ؟؟؟؟
حلقة لا تنتهي ولازم حدا يكسرها
لهيك انا قررت انو بلش اعرف لمحة بسيطة عن كل دين وابتديت بالمذاهب الاسلامية وصار عندي معرفة بمعظمها
بس هلا قررت اني اطلع ع الدين المسيحي بعيدا عن راي الاسلام بهذا الدين وبعيدا عن راي اليهود انا بدي راي الاخوة المسيحين بدينن يعني بطلب من الاخوة يلي بدن يردو ع هادا الموضوع انو يعطوني لمحة عامة عن هالدين
وانا حاليا مجرد من كل الافكار تبع الاديان الاخرى يعني ولدت من جديد
بعقل منفتح ان شاء الله ومتقبل لكل الاراء
ما بدي يصير الموضوع هون ساحة معركة بين الاديان كل مسلم بيلاقي نقاط ضعف بالاديان الاخرى وكل مسيحي بيلاقي نقاط ضعف للاديان الاخرى انا يلي بدي ياه بس هو عود كبريت
يعني ضو بسييييييييييييييط يهديني ويقلي شو الصح وشو الغلط بعيدا عن الاديان التانية
لمحة عامة عن الدين المسيحي
رح تكون كتير كافية
وانشا الله اني اهتدي للصح
وشكرا لاخوة المشتركين بالموضوع
كن مع الله ولا تبالي
|