اقتباس:
كاتب النص الأصلي : fady juventus
بس مو هون المشكلة ... المشكلة بهالعقليات الغريبة اللي عم تهاجم الموضوع و عاملة المصدر متل مسمار جحا و بطريقة ببغائية بيطلب بعض الأعضاء المصدر تقليداً لطلب مرسيل اللي أنا طنشتو بأول الموضوع متعمداً !!!
علماً إنو تبرير العضو المدعو Joe بالنسبة للإلحاح و اللي كتبو قبل شوي مرفوض لأنو ما في موضوع بالمنتدى محطوط فيه المصدر لحتى يطالبني أنا فيه ... بس متل ما قلتلك مسمار و بس !!
و ما بنكر إنو فاجأني بأسلوب إعتراضو اللاحضاري هوي و مرسيل ... لأنو الأخ بيستخدم كلمة "كذب" 3 مرات ب 3 ردود منفصلة !!! بدل ما يستخدم كلمات مهذبة أكتر متل "تضليل , غير صحيح ... "
|
يا ريت تاخد دقيقتين و تقرا كلامي بعقل متفتح و بدون عصبية
شوف لما يكون في تعدي رهيب على حقيقة علمية بسيطة هي "انو العادة السرية ببساطة ما إلها اي اضرار"... و بهادا الشكل الرهيب... فما فيك تتوقع اي شخص عقلاني يتصرف معك تصرف احسن من هيك. بالعكس انا بعتبر حالي كنت لطيف جدا معك و لحد هلق
مطلبي مشروع و طبيعي جدا جدا... و ما مشكلتي اذا ما حدا حاطط مصادر بمواضيع تانية. هاي مشكلة المشرفة و هاي شغلة يمكن لازم ينشغل عليها فورا. انا فتت بس على موضوعك و لاحظت انك عم تحط معلومات "مثيرة للجدل بشكل رهيب"... و بدون اي نوع من المصادر
المطالبة بالمصدر مانها شيء ببغائي... المصدر شيء لا يتجزأ من اي كلام منقول او كلام ما دخل بعد بالكتب العلمية...
يعني...
لما كلام يدخل بالكتب المهمة و الأساسية تبع الطب او الصيدلة او العلوم... منقدر نعتبر الكلام صار حقيقة علمية و لما هادا الكلام ينذكر... ما بقى من الضروري ذكر مصادر
بس اغلبية المعلومات الموجودة حاليا لا تصنف تحت هادا البند... و مازالت مصادرها موجودة و هيي عبارة عن ابحاث علمية فيك تلاقيها بالموقع التالي
http://www.pubmed.org
معلوماتك انت بتناقد المعتقد العلمي السائد... بالتالي اجباري جدا يكون في مصدر للكلام
الحقيقة ما بعرف يمكن انت نيتك كويسة و حابب تعمل خير... بس للأسف طريقة عرضك للموضوع عطتني انطباع مغاير جدا... خاصة مع اصرارك الغريب على عدم وضع المصدر... و بظن اي انسان تاني كان رح يستغرب كمان... و لما تزيد الاصرار... رح يستغرب اكتر و الشكوك تزداد اكتر
يعني انا ما غلطت بحقك... انت جبت لحالك المشكلة
انا محلك بكل بساطة ما بحط هيك موضوع ماني قدران ادعم كلامي او اثبت انو كلامي علمي
مجرد وضعك للموضوع بيعني انك غير محترف و ما بتعرف بأصول الكلام العلمي ... و هالشي واضح من استخفافك بأهمية شيء اسمو مصدر و سخريتك من الموضوع انه شغلة تافهة
بدل ما تحط الموضوع بالتنقيط كان الاحسن تحط الموضوع كامل خاصة بوجود كل الجدلية حول الموضوع... و تقول بنفس الوقت انو الموضوع بلا مصدر... و وقتها الانسان العاقل ببساطة بيتجاهل الموضوع و ما بيضيع وقته فيه... (لأنو اول شي منافي للمعتقد السائد... و تاني شيء بدون مصدر)
لاحظ انو كتير اشياء مثبتة حاليا بالعلم بلشت على تضاد تام مع المعتقد السائد و الكل حاربها... بس هديك كانت مدعومة بالتجارب (يعني مصدر بوضعك)... و قدرت بسبب هالشي تثبت حالها و تصير هيي الحقيقة. انت لاء... بالتالي حالتك ميؤوس منها... و اي منتدى بتوجه علمي بيحترم حالو كان من زمان حذفلك الموضوع او طالبك بإثباتات. انت عم تكتب بمنتدى صحة بمنتدى أخوية و منتدى اخوية كبير و قراؤه كتار. يعني في ناس ممكن يكونوا اطفال او ما بيعرفوا يميزوا الصح من الخطأ يدخلوا و يقروا كلامك هاد و ياخدوا فكرة غلط و هالشي ممكن يسبب ضرر شديد عليهم... و بغياب المصدر... المشرف المسؤول عن المنتدى ما رح يقدرر يتحقق من سلامة كلامك... بالتالي رح يكون في مشكلة كبيرة
تخيل حدا يحط موضوع طويل عم يقول فيه انو الأرض مسطحة... و عم يسرح و يمرح بالكلام و يجيب اسماء علماء و مدري شو ما حدا سمعان فيهم... شو رح تساوي؟ ما رح تقله ابو الشباب شو مصدر كلامك؟ و شو بتعمل في حال انو طنشك و ما رد عليك و رفض يحط مصادر بعد مدري كم صفحة؟ ما بتقول هادا زلمة جاي عم يخرب و يكذب قصدا؟
موضوعك نفس الشي... كروية الأرض... متل عدم ضرر العادة السرية (إلا في حالة الإكثار لدرجة انها بتعيق الحياة اليومية متل ما سبقت و ذكرت انا و رجعت اكدت المشرفة مشكورة)... هو حقيقة صارت جزء من الرصيد العلمي في حال عجبك الحكي او لاء... هاي الحقيقة... يعني اجتازت مرحلة الاثباتات و المناقشة... خلص صارت تعد متل واحد + واحد يساوي تنين... و اي محاولة لتغيير هادا الفكر صارت بتطلب جهد جهيد جدا جدا... لانها رح تجي عكس التيار ... بقى انت جاي عكس التيار... و فوقها بلا اي اثبات
يعني انت ممكن بكل بساطة تكون عم تكتب هالحكي من عقلك... انا شو بيعرفني
حابب تجيب مصدر علمي... فيك تجيب ريبورتات كتيرة حول العادة السرية منشورة بالموقع يلي ذكرتلك ياه فوق... و عميل بحث سريع باستخدام كلمة masturbation و بتلاحظ انو كل الأبحاث بتحكي عن حالات خاصة جدا و لحد اليوم انا ما لقيت اي رفيو بيحكي عن اضرار العادة السرية على العامة... دليل غير كافي, بس بيدعم, فكرة انو القصة من زمان بايتة و خالص كازها
انت لما عم تكتب بمنتدى صحة بتمنى تكون قد مسؤولية هالكتابة و تعرف انو في ناس عم تقرأ ما بتفهم بالموضوع... و انو في ناس بتفهم بالموضوع و ما رح تسكتلك
و اذا بدك الصراحة و الدغري... مصدرك يلي حطيتلنا ياه متل قلتو يا صاحبي و كأنك ما عطيت شي
مين ما كان ممكن يفتح دار نشر و ينشر شو ما كان... بس لحتى ينزل الموضوع بمجلة علمية قصة تانية.
يا ريت تقرا هالكلام و تفهم اني عم حاول احمي قراء اخوية من مشكلة يمكن انت بدون قصد ما انتبهت إلها... و ماني جاي لهاجمك لشخصك.
اهلين
ذكرى مرور عام على وفاة الأديب العالمي سيبيري ماسكوليه 1932 - 2008