اقتباس:
كاتب النص الأصلي : maged-syrian
أنا لااحمل الرئيس بشار المسؤولية الكاملة عن الفساد المطلق بسوريا باعتبار ان يد واحدة مابتصفق والحرس القديم بيلعبوا دور بانتشار الفساد... لكن بشكل عام الفساد والرشاوي والواسطات بسوريا من أعلى النسب في الشرق الاوسط وشمال افريقيا ...
يا صديقي هي قصة الحرس القديم والجديد من اختراع النظام نفسو صدقني يعني حافظ اسد لما ورث لابنو الحكم مهدلو الطريق تمام وما خلا بالبلد ولا راس كبيرة بيخاف منها على ابنو يعني من لما بشار استلم الحكم وهو الحاكم بامره وما حدا بيسترجي يعارضو او يقلو على اي قرار بياخدو لاء.
تصوروا مشان ادفع بدل اضطريت ادفع رشوى ... حتى على ايام طلاس هالحكي جماعة عرفوني على ابن اختو لطلاس قال بيمشيلي المعاملة بس مقابل 10 الاف ليرة ؟؟؟
ومعاملتي تبع دفع البدل اتعطلت بس بسبب ان اسمي بسندات الاقامة غير مطابق مع اسمي بدفتر الجيش باعتبار ان اسم جدي مو مكتوب وكانوا بدهم يرجعوني عالسفارة السورية بالسعودية لهالسبب!!! لو مااني دفعت رشوة 5000 ليرة لمدير شعبة التجنيد
و 1000 ليرة للموظف ليمشيلي الاوراق الباقية ...ماكان مشي الحال وكنت اتبهدلت لسبب فاضي
يييي الشباب كانو عاملينلك تخفيض هي بدل ما تتشكرن 
هدول اللي بيخربوا البلد ... هيك شكيلات انجس خلق الله ... هم اللي بيشوهوا سمعة سوريا وبيعطوا انطباع سيء عن سوريا ..
انا فقط الوم الرئيس بشار على عدم انشائه لجنة مراقبة وتفتيش تتميز بالشفافية مهمتها مراقبة الدوائر والمكاتب الحكومية بشكل كامل ... لأن للاسف الموظف السوري بشكل عام تعود على الرشاوي واكل المال الحرام لدرجة ان الزبال صار يدفع رشوى ليتم فرزه على مناطق راقية وارستقراطية ليطلع بشي
مثال اخر : مكتب في الشام عليه فواتير كهربا تقدر باكثر من 30000 ليرة ... فكان كل مايجي موظف الكهربا ليفصل الساعة ... يقوم صاحب المكتب ويعطيه رشوة 500 او 1000 ليرة وعلى هذا المنوال كل مرة ... الى ان تم اكتشاف وفضح هذا الموظف بالصدفة!! وتم التحقيق معه وبعد التحقيق تبين انه آخد مايقارب النصف مليون ليرة رشاوي من عدة اماكن بالمنطقة اللي هو مستلمها ... وتم فصله من عمله وحطوه بالسجن
يعني بشكل عام هاد نموذج للموظف السوري للاسف شعبنا اتعود ياكل مال حرام
برجع وبقول ان الحق مو عاالرئيس لحاله بشكل كامل الحق ايضا عالشعب اللي بيرضى بهالشيء .. بيجيك واحد مابيرضى الرشوة عحالو ان هو يكون ضحية ويدفع الرشوة للغير وبيقعد بيشكي وبيبكي ... بس بالمقابل هو بيرضاها على غيرو وبيقبل ان يكون هو الجزار وياخد رشاوي وللاسف الدولة بتلعب دور باعطاء المجال للاشخاص بأن يكونو ضحايا أو أن يكونو جزارين على حسب المنصب!! |
طيب خليني اسألك سؤال طالما انو بشار بايدو سلطات مطلقة يعني ما في بسوريا لا برلمان ولا صحافة ولا رئيس وزراء بيسترجي حتى ينتقد اي قرار بياخدو مظبوط؟؟؟ طيب وطالما انو اي انسان سوري من شفير السرفيس (مع احترامي لشفير السرفيس يعني) وانتهاء بدكتور الجامعة بيعرف الفاسدين بالاسم وبيعرف انن معبايين كل المراكز المهمة بالدولة فمقعول بشار ما بيعرفن؟؟؟؟ اي في بسوريا اجهزة امن اكتر من الجامعات وشغلتن الوحيدة مراقبة كل شي من الجيش للموظفين للوزراء والمسؤولين وصدقني ما في مدير ولا موظف كبير بالدولة بيسرق ليرة الا وملفو عند الامن وبيخلو يسرق تحت عيونن والامن بكل افرعو تابع مباشرة لبشار الاسد يعني لا لوزير الدفاع ولا الداخلية ولا غيرو وكل التقارير عن حالات الفساد بتنرفع مباشرة لعند بشار الاسد وهو بيعرف كل شي ورح اعطيك مثال صغير
بسنة 1998 كان لسا الوريث عم يتدرب على الحكم قام راح على حلب وهو حامل شعار مكافحة الفساد ,الناس ببساطتن صدقو وصارو يهتفولو يا ابو حافظ غيرلنا المحافظ والمحافظ كان مصطفى ميرو وكان معروف للجميع بنظافة الكف يعني حتى مصاري البلدية بحلب ما سلمت منو المهم بعد سنة غيرلن ابو حافظ المحافظ و حطو رئيس وزراء شو رأيك؟؟؟؟؟
ببساطة يعني احد اهم وسائل الحكم عند بيت الاسد الاب والابن حاليا هي وضع افسد الناس واقلن ضميرا باعلى المناصب مشان تضمن انو ما حدا يفكر يعمل ضدك اي حركة لانو المسؤول الحرامي مو فاضي يتامر او يفكر بمصلحة البلد وانما بدو بس يعبي قد ما بيقدر ونتيجة هالسياسة الجهنمية تخرب كل شي بالبلد الجيش والاقتصاد والتعليم وشو بدي عدلك لعدلك .................................................