والله يا جماعة هاي من أحلى الألعاب الموجودة بالموقع مع اني ما بعتبرها لعبة أبداً لأنو فيها اختبار للذات والأهم أنو بيقدر الواحد يراقب تطور تفكيرو مع الوقت .. وهاي الفكرة كانت فكرة رائعة من الحكيم بس انطرحت بوقت كان عندي فحص ولهيك أجلت اشتراكي فيها و بعدين نسيتها .. وخطرت عبالي من يومبن ولهيك حبيت أكتب رأيي ...
1- فتاة صارحتك انها تحبك ,, ما ردة فعلك .. ؟
في حال كنت أنا ببادلها الشعور رح كون بموقف لا أحسد عليه يعني رح أتلبك كتييييير ورح اسكت فترة
وبعدين ما بعرف شو ممكن أعمل يعني رح كون غير مسؤول عن تصرفاتي .. أما بالحالة التاني فأكيد رح أتفاجأ (لأنو ما بتوقع في وحدي رح ينعمى على قلبا لهالدرجة
) وبعدين رح أعتذر منها بطريقة لبقة و رح حاول أنو نبقى أصدقاء ... لأنو أكيد احترامي الها كتييييييير كبير كونها تخطت حاجز كتير من الصبايا ما بيتخطو وهوي مصارحة الشب بعواطفهن ...
2- انت معجب بفتاة ,, لكنها ليست من صديقاتك او من داخل دائرتك ,, كيف تتقرب منها .. ؟
والله المشكلة انو ما عندي الجرأة انو والله روح لعندا واتعرف عليها هيك دجني دجتك العافي .. لهيك اللي رح يصير انو رح اقعد واستنى الفرج ...
3- انت معجب بفتاة ,, لكنك تعلم انها معجبة بشخص اخر ,, ما موقفك .. ؟
اللي رح يصير هون انو رح أتخلى عن هالإعجاب ورح حاول انو ساعدن بعلاقتهن طبعاً اذا كنت بقدر ساعد ... هلأ يمكن تقولو هادا عم يزيدا بس هاد رايي وهاد اللي بعملو بهيك حالة وبكل صراحة
4- انت معجب بفتاة ,, ولديك شعور انها معجبة بك ,,ما موقفك .. ؟
هلأ هون المشكلة ........... لأنو رح يخطر ببالي شي 100 فكرة يعني انو يمكن اللي عم حسو ما مزبوط .. وهاي الأفكار رح تاخد مني وقت طويل (طبعاً بهالوقت هيي بكون داق خلقا مني وبطلت ) بس بعد هالوقت من التفكير اللي أنا أكيد انو ما الو طعمة رح صارحا بمشاعري.. بس بهاي اللحظة سدئوني رح كون بحالة لا أحسد عليها أبداً
..
5- انت مع فتاة في حالة حب ,, لكنك تحس انها باردة ,, ما موقفك .. ؟ بهالحالة أكيد انو في شي غلط صاير ولهيك منقعد قعدة طويييييلة ومنتناقش لحتى نعرف شو هاد الشي الغلط ومنعملّو قتلة مرتبة لأنو نزعلنا مرائنا يعني منلاقي حل مناسب للمشكلة ومنرجع متل ما كنا وأحسن .
6- انت مع فتاة في حالة حب ,, لكن اهلك غير مقتنعين بها ,, ما موقفك .. ؟
والله هاد أسهل سؤال ... لأنو ما بتوقع أنو أهلي رح يفرضو رأين بموضوع إلو علاقة بمستقبلي لأنو عودوني آخد قراراتي بنفسي بس شي أكيد انو رح يقولو رأين بالموضوع بس رأيي وقناعتي هني الحكم بالنهاي .
7- انت مع فتاة في حالة حب ,, لكن مع اكتشافك اكثر لها اكتشفت انها لا تناسبك ,, على الرغم من انها تحبك ,, ما موقفك .. ؟
والله هاد السؤال حالياً ماعندي جواب عليه .. بس أكيد رح أكتب الجواب وقت بلاقيه ...
ولا تواخزوني طولت عليكن بحكيي وديقتلكن خلائكن ...
وآخر شي بحب أشكر الحكيم
على هالموضوع الرائع وتحياتي للجميع ...
ليست حقيقة الإنسان بما يظهره لك بل بما لا يستطيع أن يظهره
لذلك إذا أردت أن تعرفه فلا تصغ إلى ما يقوله بل إلى ما لا يقوله ...