والله ياحبيب عم تحكي مدوزن وأنا اول مشاركة إلي كتبت موضوع اسمو دعوة للتحاور بتلاقيها اذا حبيت وكنت عم احكي كيف ممكن نتلاقى وما نختلف ونعمل سوا لخير بعضنا وبلدنا والعالم بدل ما نبقى نعلك انا معي الحق وانت ضالل وانا اللي بفهم وانت لا وسب وشتم وتحقير ولذع وتهجم ... العالم ماشي ونحن نجتر العبارات نفسها وكأننا غير معنيين بشيء مما يحدث في الدنيا سوى نصرة الله وكأن الله ينتظر نصرتنا لدينه ..
بس تعا معي وانا وانت لقينا حالنا بنص هالمنتدى والناس نازلة ببعضها متل موشايف والشاطر اللي بيبهدل التاني . شو بتعمل ما انا وانت متل ما قلت سوريين بالنهاية يعني شرقيين والشرقي شو ما ادعى ما فيه ينكر انو الدين بدمو .. وفي ظل وضع المجتمعات والدول الشرقية من حيث القوانين الناظمة للناس والمجتمع , بتشعر انو بدك تدور على نقطة تلتقي مع الآخر منشان تحط ايدك بأيدو وتمشو سوا لقدام .. ما بتشوف غير طلعنا وبلشنا انت الصح وانت الغلط وانت بتقول هيك وانت بتقول هيك .. بتجي لتوضح يا جماعة نحنا مو متل ما عم تقولو بيطلعلك شي واحد وبيبعتلك رسالة بيدعوك فيها لتغيير دينك أحسن ما يحسب الله ما خلقك .. شو رأيك ما بيلتعن أبو الحوار اذا كان صار وبدأ أصلاً ؟؟؟
طيب كيف بدي صير انا والتاني متل السمنة والعسل وهوي شايفني هيك وهيك من الصفات اللي يا لطيف حولها وحواليها .. كيف بدي امسك بيدو حتى نبني سوريا ولسا عايشين بعقلية انو الاغلبية لازم يركبو عالاقلية ويحطوا نظرياتهم وكأنو إذا كان وزير من هالدين او الطائفة الفلانية لازم يفني حالو حتى يخدم بس طائفتو ؟ الصحيح انو الشخص بموقع المسؤولية من اصغر لاكبر واحد لازم يمون بخدمة الكل وبيمثل الكل دون تمييز وساعتها ما بيهم مين بالموقع الفلاني ومين مستلم الوظيفة الفلانية .
نحمد الله وضعنا بسوريا بعيد رسميا عن هالمهاترات والعلاك اللي عند كتيرين غيرنا موجود علناً بس اذا بتجي على صدور العالم بتشوف الشي اللي مخبا ومانو مبين .. فضيحة .
أنا بضم صوتي الك من حيث المبدأ وبتمنى لو بدو يستمر الحوار نكون كلنا على مستوى الحوار فعلا.. والا بالناقص منو ونرجع نطحن بعضنا أحسن .. وخلي العالم يفكر عنا ويتقدم نيابة عنا نحنا مو فاضيين لهالعلاك .. مشغولين بمين بينصر دين الله ..التقدم لاحقين عليه بعد ما نخلص فرم ببعضنا والغاء لبعضنا وساعتها منشوف شو عم يصير بهالدنيي
انا هلق عم اسمع اخبار هون بهاللحظة .. بتعرفوا شو عم يقولو ؟ عم يحكوا عن الإرهاب والتطرف الإسلامي اللي عمل هالتفجيرات بلندن , وعم يشيلوا الإسلام ويحطوه على انو كلو ارهاب وهني ما مسيحيين متل ما مفكرين .. هون بيقلولك علنا انو نحنا بلا دين أو كاثوليك او بروتستنت او ... بس نظرتهم وحدة للإسلام لأنو ما حدا فاضي يحاورهن ويثبتلهن انو الاسلام بريء من هالجماعات اللي عم تشوه صورتو .. مشغولين بنتف بعضنا البعض .. احسن
والمصيبة انو هالناس هون شايفين كل الشرق اوسطيين انهم ارهابيين ( معظم الناس هون ثقافتهم بهالمواضيع سطحية ) وقالولي انهن كانو مفكرين الإرهابيين بسوريا منتشرين بالشوارع وناطرين شي اوروبي او اميركي حتى ياكلوه بلا ملح .. هيك عم يوصلهن من وسائل الاعلام .. ونحنا شو بدنا نرقع ونشرح .. والله بيطاع على لسانك شعر حتى تفهمهن عكس هالشي بيهزوا راسهن وما كأنهن فهموا شي .. والباقي عم يشوف وينو الله وشو بدو يعمل بكرة بالمسيحيين والاسلام ....شي بيكفر
بعرف لعيت قلبكن بحكيي بس من الأسف على حالنا .. وأنا بعد ما دخلت بحماس للمنتدى شفت حالي راح صير متل غيري وبلش بالتاني ..قلي بس وين بيوجعك حتى اضربك .. راح حاول ما كون هيك .. بس شو ؟ طقيت
