[MORBID ANGEL]

يسعد مساكم :صبايا و شباب,مشرفين و اعضاء
و بدي حقيقة اشكركم قبل كل شي ع جهودكم المشتركة المشكورة اللي عطت هالمنتدى قيمته المهمة و سمعته الطيبة اللي خلتني سجل فيه
و انا عم اتصفح المنتدى لفت انتباهي منتدى فرعي اسمه حوار الاديان
و من باب الفضول دخلت لشوف ...
للاسف....
اسمحولي...
مع كل محبتي و احترامي للجميع (و باتمنى بدون زعل ) لازم تغيروا اسمه الى : صراع الاديان !!!
ليش ؟
يا جماعة :
حوار الاديان بيعني التوصل لصيغة تعايش مشتركة و للعدد الاكبر من نقاط الالتقاء و العمل الجماعي لكسر الحواجز بين الاديان على اختلاف مصادرها و مناشئها و طقوسها و اهدافها.و الهدف النهائي هو ارتقاء بمستوى المجتمع ككل كامل لا تمكن تجزئته, اي ازالة كل ما يمكن ان يهدد وحدة المجتمع و حمايته من التفكك.
يعني ما هي شغلة : مين دينه صح و مين دينه غلط
الدين للله و الوطن للجميع

كلنا هون سوريين, او على الاقل عرب, ما شفت حدا كتب مشاركة بالالماني او بالاسباني مثلا
فهي باعتقد نقطة بداية بسيطة و جيدة بنقدر ننطلق منها

بعدين دخلكم ؟ بدي اسال معلشي ؟
شو الاميركان و الاوروبيين زايدين عنا نحنا راس ولا ايد و لا اجر ؟
الجماعة نبشوا المريخ و القمر فبله, و من يومين نزلوا محطة تتبع و دراسة ع مذنب من شان يحموا الارض من شي مذنب طايش....
شو نحنا ما بنخاف من المذنبات يعني؟
ما عم نعاني كمان من الاحتباس الحراري؟
ما ممكن نموت من الجوع نحنا كمان ؟
((مكتوب شي ع اسناننا ممنوع التسوس يعني ؟ ))
(( ع باب نيويورك المشعل عندن و الحرية عندنا؟ ))
و لا ما دخلنا بكل هالقصص السخيفة...المهم هلق نعرف فلان شو دينه ؟ و هل دينه صح ام خطا ؟ ....هيك بيظبط كل شي وبننام و نحنا مرتاحين

قالولكم اميركا شعب بلا دين يعني ؟
اميركا فيها فوق المية و عشرين دين نحنا بنعرف منهم 3 بس ( اليهودية و المسيحية و الاسلام ...بكل طوائفهم و مذاهبهم ) طيب و الباقي ؟ شووو ؟ هدوله صح ولا خطا ؟
الاميركان قالوا: انتوا اميركان و هدا المهم (( فلان رح يروح عالجنة ولا عالنار هي مشكلته....نحنا هلق بدنا نبني البلد و الامور الشخصية هي بتيجي بالدرجة التانية من الاهمية.. المهم البلد هلق ))

رح بتقولولي المؤامرة تبع الاستعمار؟
عفوا باقصد الاستحمار !!
جربوا اسالوا جدودكم او الكبارية عندكم بالحارة او البلد..كان في هيك تعصب و حوارات مالها لازمة ع زمانهم ؟
رح بيقولولكم: لا !!!

باحبكم كلكم و لو ماباحبكم ما كتبت اللي كتبته
بس ما بدي يجيي يوم و يمسك حدا من احفادنا الخريطة تبع المنطقة و يسال: جدوو ؟ هون شو كان في من زمان ؟
كان في عالم ساكنة هون؟ ولا هي هيك صحرا بالاساس ؟

تقبلوا مني كل الاحترام و التقدير
و العفو منكم
و باتمنى ما تزعلوا