[Nirvana]

كاتب النص الأصلي : وائل 76

خالتو نيرفانا / نص جميل إلى حد كبير بس بننتظر من نيرفانا ما هو أروع من ذلك .. إسمحيلي علق على نقطة نيرفانا من بعد إذنك .. بعتقد أنو وقت حددوا الموضوع ما إشترطوا أنو تحكي بلسان الأم ؟! بمعنى أنو كان فيكي تحكي وصف أو أنو تروي قصة أم و إبنها و ما تكوني أم أنتي !! الشب وقت عم يروي الغربة و هوي بطل القصيدة ممكن يعيش الحالة و يطلع بشي معبر .. لكن مستحيل تتقمص البنت دور الأم يلي ما عاشته و تروي وجع الأم لازم تعيشيه حتى تفهمي تفاصيله .. الوجع يلي بيمس الأم كتير عميق .. حالة شعورية مو سهل أن نتقمصها ..
طبعاً مو معنى كلامي أنو نصك سيئ لا سمح الله .. بالعكس نص جميل و راقي لكن لو كانت نيرفانا عم تروي القصة من بعيد بدون ما تتقمص دور البطل يلي صعب حدا يجسده كان أروع راح تكون .. أسف لو كنت تفلسفت زيادة عن اللازم و تدخلت

بالعكس وائل اهلا وسهلا فيك وبرأيك .. نحنا اصلا عاملين المسابقة لنستفيد ونتسلى ولتنشيط القسم وهالشي ما بصير غير بالأفكار والمشاركة والتعليق والنقد وكل شي .. وخصوصا لما يطلع من شخص عندو خبرة وفكر واسلوب متلك ...

بالنسبة لنصي ..
اول شي وهالنقطة كتير مهمة .. انو انفرض على البنت دور الأم وعلى الشب دور الابن .. وما كان فينا نطلع من هالاطار ..
الشغلة التانية واللي بحب وضحها لانو اثرت على النص بالشكل العام .. واللي هي انو البنت أو انا يعني لازم اتقمص دور الأم اللي بدها ابنها يسافر وابنها ما بدو يسافر .. وانا ما قدرت لا أتواصل ولا أتقمص هالدور .. ما حسيتو يعني .. بس حاولت قدر الإمكان اني اتخيل واني شوف شو المسببات اللي ممكن تخلي الأم تعمل هيك شي .. بصراحة اكتر أنا مو قادرة اقنع حالي بأني سافر ... فما بالك باقناع أو حث شخص آخر على السفر .. وهالشي هوي أكتر شي أثر على النص .
وتالت شي .. نصي وأي نص ممكن اكتبو أو كتبتو هوي تجارب ولا أدعي أكثر من هذا .. مجرد تجربة شخصية في الكتابة وبصراحة أكتر هيي تجربة مو مصقولة .. عم حاول لاني كتير بحب الكتابة والنثر على وجه الخصوص وحابة اعمل شي بهالمجال اذا اجتهدت أكتر واذا من الاساس بيطلع معي شي احسن .. بقا انت لا تفلسفت ولا اتدخلت بالعكس عن نفسي أنا أكثر من سعيدة انو انت أخدت من وقتك وجهدك لتقرأ نصي وتعلق عليه .. لاني هيك بستفيد .. وبستمتع بالنقاش معك ..