[samsoum]

كاتب النص الأصلي : *Marwa*

الصراحة انا لست سورية وما بعرف شي عن هالجماعة وسياستها..بس باكتر من موضوع كان في معارضة كبيرة لهالجماعة من قبل الاعضاء..وسمعت عنها اشيا ما بتسر لكن ما بعرف ازا كان في مصداقية في الاشيا اللي انحكت!..وخاصة اني بعرف ناس من هون عرب ال 48 اللي متلك بفتخروا في هالحركة
انا عن نفسي رح اكتفي بالقول اني ما عندي شي ضد او مع جماعة الاخوان المسلمين تماما كما انو ما عندي شي ضد او مع بشار الاسد..بالنهاية ما عشت تحت حكمها وما بعرف شو استراتيجيتها..so يا ريت ازا فيك تحكيلنا انتي ليه بتفتخر فيها؟


تحياتي

مرحبا اخت مروى
رح احكيلك حادثة واحدة يمكن تكوني من خلالها فكرة عن الاخوان المسلمين، وبنفس الوقت بكون أبديت رأيي بهالجماعة بحسب طلب صاحب الموضوع، باعتباري كنت شاهد عيان على مجزرة الازبكية التي ذهب ضحيتها المئات من المدنيين
اناكنت أيامها تلميذ بالمدرسة وكانت مدرستي في وسط دمشق، سمعنا انفجار هائل اهتزت المدرسة على اثره،وطبعا دبت الفوضى بالمدرسة وخرجنا الى الشوارع مذعورين وشفنا كل الناس عم تركض باتجاه مكان الانفجار، وبحكم انو كنا صغار لحقنا هالناس ووصلنا على مكان الانفجار وشفنا مناظر مو ممكن انساها بحياتي، الاطفال والنساء والشباب وأشلاء القتلى التي تطايرت مئات الامتار بسبب قوة الانفجار، اضافة الى الدمار الهائل الذي لحق بمنطقة الانفجار وما حولها. وطبعا كانت الدنيا متل مابيقولو قايمة قاعدة.
ومنطقة الازبكية تقع في وسط المدينة ، وهي مكان حيوي جدا ومزدحمة بشكل دائم ،معروفة بأنها خليط من السكان المسلمين والمسيحيين، والانفجار كان بسبب سيارة مفخخة وضعت مقابل شعبة التجنيد العامة الموجودة هناك، حيث يجتمع هناك يوميا المئات من الشباب المطلوبين للخدمة العسكرية الالزامية، يعني هالشباب لسا ما صارو عساكر أصلا،وليس لهم اي ذنب وليسو طرف فيما يجري بين الحكومة وجماعة الاخوان.
ومن هداك الوقت كل ما بسمع ذكر الاخوان المسلمين، بستحضر الاحداث اللي شفتها بعيوني وكأنها صارت مبارح وبشعر تماما بنفس الشعور اللي انتابني لما شفت مكان الحادثة اول مرة.
طبعا هي حادثة واحدة من مئات الحوادث التي قام بها الاخوان للضغط على الحكومة، تخيلي انو الاسلام اللي حرم قتل النفس البشرية بغير حق، عم يستخدم لقتل المئات والالاف من الابرياء، لنشر فكر ما بالقوة،(هي ديمقراطيتهم) وطبعا هذه الاعمال الارهابية هي مادعت الحكومة لسحق هذه الجماعة وطردها من سوريا وحظر انشطتها، وبرأيي لو ما عملو هيك كانت صارت سورية متل أفغانستان واكتر
ومالازم ننغر لما بنسمع كلمة الاخوان المسلمين، ونظن بأنهم مسلمون بالمفهوم الحقيقي للإسلام.. انهم ابعد مايكونو عن الاسلام الحقيقي.
بتمنى ماكون أطلت.. وبتمنى كمان يكون رأيي وصل بهالجماعة لصاحب الموضوع
سلامات