[shasho]

أخي الغالي آش
بدي حاول وضّحلك وجهة نظري من جديد, ورجاءً تفكّر فيها بتجرّد من العاطفة الدينيّة, ياريت نفكّر تاريخ وسياسة فقط

كاتب النص الأصلي : ASH

رجعة حكية الغزو الأسلامي ؟ بس هي فتوحات يعني الاسلام لما فات ما راح باد الكل و رجع وطن عالم من جديد ؟؟؟؟

حبيبنا ليش إذا المحتل ما أباد الكل ووطّن عالم من جديد بيصير اسمها فتوحات؟
معناتها ليش زعلانين من الغبي بوش؟ ما أباد الأفغان والعراقيين, هو بس عم يبيد يللي عم يقاوموا فتوحاته!!!! وليكه ما جاب أميركان وعمللهم مستوطنات بالعراق!!!!!
معقول كلامك هاد يا حبيب؟
الغزو لمّا ناس آمنين وعندهن نظام وكيان وبيجي حدا من غير بلد -مو شرط من غير قارّة- وإلاّ كانت الأمم المتحدة ذكرت هالشي بالمواد يللي بتشرح الإحتلال.
هلأ ممكن حدا يقول انه بلاد الشام كانت تحت حكم المحتلين الروم, وجاء الإسلام وحررهم!!!
مين طلب منهن هالشي؟ مثلا يعني
وليش استولى الغزاة عالأراضي وصار يوهبها ويهديها ويبيعها ويتصرّف فيها؟
و بالمناسبة كيف صاروا بيملكوا أراضِ؟
هاد احتلال يا غالي

هلأ النقطة التانية:

كاتب النص الأصلي : ASH

بعدين يا اخي كان في شي اسمو الجزيه يعني ما غصب اخوانا المسيحيه على الاسلام و هل شي باين انو سوريا فيها نسبة مسيحيه كبيره كتير و كلنا شعب واحد و بحياتنا ما ختلفنا مشان موضوع دين
و اخي حقك انا ما بحكي انو الشيخ مدري شو اسمو ما اسقط دور الجامع ككنيسه من قبل ، بس هاد مو معناه انو كلنا من نفس الافكار ..

دخلك؟
شو هي الجزية؟
مو ضريبة إحتلال؟
طيب مو نفس هالشي عم يعمله الكيان الغاصب بالفلسطينيين؟
ليش هون مسموح وهونيك ممنوع؟
لمّا بتكون عايش ببلدك وإلك معتقدك, وبيجي إنسان من بلد تانية بيحتل أرضك وبيستلم القيادة على أرضك وبيخيّرك يا بتعتنق معتقدي يا إمّا بتدفع جزية ( يعني جزاء ما قررت أن تبقى عليه) بيكون هالقرار عادل؟
لما الأميركان بيحتلّوا العراق, بيدوّروا على ناس موالية إلهن تدير شؤون البلد, ويللي بيرفض.... شوف الأخبار بتعرف لحالك الجواب؟

أمّا بخصوص نسبة المسيحيّين واليهود الكبيرة بسوريا (ضل اليهود ساكنين بسوريا لنهاية القرن الماضي):
شو رأيك انه المحتلين ما شجّعوا أهل الأرض على الإسلام بالفترة الأولى للإحتلال؟
لا بل في عندي أدلّة على هالشي, باحتلال بلاد الشام
تقدّم أصحاب الأرض المستضعفين (لأنه احتُلّت أرضن) تقدّموا بعهد على نفسهن لعمر بن الخطّاب مشان ينولوا الأمان من القتل, وزاد عمر على هالعهد بنود إضافيّة لحتّى يوافق عليه, وهالعهد اسمه "العهدة العمريّة", وفي عندي نسخة منها.
أنا مو كتير ميّال انّي انشرها لأنها بتثير الضغائن, وبتدل على عنصريّة وقهر, إذا بتحب ببعتلك ياها عالخاص, والمثير إنه هالعهد ما أعطي لأي بلد احتلّته الجيوش الإسلامية بعد بلاد الشام, بتحب تعرف ليش من وجهة نظري؟
لمّا وصل الإحتلال لسوريا (الطبيعيّة) كان هالجيش متوسط القوّة والتجهيز وحالفه الحظ ببلاد الشام انه امبراطورية الروم كانت بحالة أُفول, وجيشها ضعيف ومشتّت,
وقضيّة الجزية أدخلت الأموال لبيت المال بغزارة (سوريا بلاد خير وتجارة وأموال), ولمّا استولى الغزاة على الأراضي والبساتين والإقطاعات (متل المنطقة الخضراء ببغداد) صاروا ينتفعوا بغلالها ويبيعوها لبلدهن الأم (شبه الجزيرة العربية أو بلاد الحجاز), بس لمّا قوي الجيش بسبب الأموال هي, صارت البلدان المحتلّة ما تنعطى عهد, أسلم وبتخدم بجيش المسلمين, وبيطلعلك حصّة من الغنائم والسبايا والغلمان أو إدفع الجزية ولمّا يخلص مالك بدك تأسلم مشان ما تنقتل.
يعني متل ما قال هارون الرشيد للغيمة : أمطري أنّى شئتِ فخراجكِ لي

أخيراً الأستاذ سهيل زكّار مو شيخ, هوّ باحث تاريخي, ومزوّر لتاريخ المسجد الأموي الكبير , طبعاً هاد رأيي الشخصي

وبخصوص "نحنا شعب واحد وبحياتنا ما اختلفنا على دين" فهاد هوّ عين ما أبحث عنّه
وانشالله لهون بدنا نوصل, وهالشي بدّه مقوّمات وحوارنا هاد هوّ واحد من أهم مقوّمات التعايش مشان كلّنا نتعلّم الدرس

سلامي واحترامي إلك وللجميع