اقتباس:
كاتب النص الأصلي : Barleb
الزرقاوي ؟
|
لاء لاء ....أبدا..الاخ ارسلان حاطط صورة / خطاب / ما الزرقاوي و خطاب هو أحد قادة ( المجاهدين ) في الشيشان .
هلأ بنظرة سطحية ممكن نلاقي شبه كبير من حيث السلوك ( الثوري ) بين غيفارا من جهة و عدد كبير من ( المجاهدين ) ... أمثال خطاب ... و الزرقاوي ..وصولاً الى شاكر العبسي و اسامة بن لادن !!!
هدول ( المجاهيدن ) تركوا بلادن و تركوا كلشي وراهن وراحو يعملو ( ثورة )
هدو ل ( المجاهدين ) بيستخدموا اسلوب حرب العصابات ( الغيريلا ) متلن متل غيفارا !!!
هدول ( المجاهدين ) كلن مربايين شعر و دقن ..متل غيفارا و أعز !!!
طيب انو يعني ليش العالم بتحب غيفارا و ما بحبوا خطاب ؟؟؟ ( الغالبية الساحقة قصدي)
و ليش اسامة الرحباني ما بيعمل غنية لاسامة بن لادن
وليش ناتالي كاردون ما بتغنيلو للزرقاوي ؟
بعتقد في سبب ....غير الدقن و الشعر الطويل ......
غير حرب العصابات و حياة ( السيسبينس ) ......
غير البدلة العسكرة و البارودة الروسية......
غير الحالة ( الثورية ) و الممانعة حتى الموت .....
في سبب يمكن يكون الو علاقة مثلا بشي اسمو انسانية ؟؟
هالشي اللي اسمو انسانية ...مبتور ...او مفقود ..او مشوه ...او ممسوخ بخطاب و سلوك الثوار ( المجاهدين ) .
و مع انو امثال هال ( المجاهدين ) الهن تأثير ع عدد كبير من ابناء الجيل الحالي و يمكن ابناء الاجيال القادمة ...تأثير ممتد على مساحات و جنسيات و شعوب مختلفة و كتيرة ...تأثير مانو قليل , مع انو الهن هالتاثير ...بس هالتأثير بضل محدود .
محدود ( بأسوأ ) الأحوال أنو يوصل لكل شخص بيستهدفو ا بتأثيرن ...اي و بعدين ؟
محدود بأحسن الأحوال أنو ما يتجاوز خطوط التوتر العاطفي - الطائفي
محدود بكونو بالاصل........ محدود !!!
غيفارا ( الفرد) كان بيعرف كمان بحكم كونو ( شيوعي , يساري , بروليتاري ...اللي هو يعني ) كان بيعرف انو تأثيرو الفردي محدود و هاد الشي اللي أكدو برسالتو لولادو وقت قال ( إ
ن الواحد منا لا قيمة له بمفرده والأهم من ذلك كله أن تستعدوا للنهوض دائماً ضد الظلم في أي بقعة من العالم ومهما كان الشخص الذي يتعرض للظلم.)...وكان بيعرف كمان أنو التغيير ما ممكن يكون الا جماعي ...جماعي عالاخر يعني !! و في متل غيفارا الاف و الاف الناس اللي ماتو على هالاساس ..و نحنا ما منعرف لا اسمائن و لا عناوينن و لا شو عملو ولا كيف ماتو
وما حدا عندو صورة الهن ..و ما حدا عملن تمثال ...و لا حدا رح يعملن أصلاً .
غيفارا يا شباب ما هو الشخص ....غيفارا هو الرمز , هو المثل .... هو المثال , هو النموذج الشهير للمناضل الشريف الحر , نموذج يصلح لكل زمان و مكان لانو بعبر عن انتصار الارادة , انتصار الفكر , رغم الهزيمة المادية و الفناء الجسدي .
كلنا منعرف انو غيفارا فشل ...غيفارا انهزم بكوبا قبل ما يفشل بالكونغو و يرجع ينهزم ببوليفيا ...
و كلنا منعرف انو غيفارا أعدم ...انقتل ...قتلو جندي بوليفي سكران يمكن .......ما مهم
المهم انو غيفارا مات ...و اللي باقي من غيفارا ما هو الصورة ولا هو الكلمات
اللي باقي من غيفارا اكبر من غيفارا و أهم من غيفارا
اللي باقي من غيفارا ....هو الاجيال الجاية .... الجاية لا محالة يعني
J.S: Death is the solution to all problems. No man = No problem.