[Syrian__Angel]

بس معلش انت حكتي انو النقطه حلوه و اجة بمحلها ، طيب ممكن انك تعلقي عليها ، هلا الموضوع نفتح و نفتح ، فخلينا ناقشو ، وعن جد حاسس انو المفروض لكل شي يكون في حد او مثلا لنحكي خطوط حمرأ ولا شو رايك

مرحبا ..
اليوم لرجعت دخلت عالموضوع فـ سوري عالتأخير

هلأ ما عرفت بلّش من عندك ولا من الموضوع الاساسي .. عملنا طرّة نقش طلع من الموضوع الاساسي احسن مشان ما يتهمونا انو بنردّ عالفرع وبنترك الاصل وبنحوّل الشغلة لاحاديث جانبية ..

فـ لهيك ...

منبلّش ..

واذا كانت الاكترية ضد سياسة المنتدى والادارة الي في من قبل المشرفين ....يعني لازم تغيرو هالاسلوب ...

اول شي .. للتنويه ... انو رح اكتب رأيي الشخصي بالموضوع كـــ عضو ..

بالنسبة لجملتك ، اسمحلي قلك .. خلينا واقعيين ..
مافي شي اسمو " لازم " .. لانو لا انا ولا انت فينا نغيّر سياسة المنتدى ..
اوكي فيك تطلب من الادارة - او للتحديد الاداريين " المشكلجية " - انو فيك تطلب منهون هالشي برسالة خاصة بينك وبينو .. لانو اذا اجيت وحطيت موضوع وقلت " انت يا هالاداري ما عاجبني ، بتضلك عم تعمل هيك هيك وتصرفاتك عم تطفش العالم من المنتدى " .. هداك رح يفهما انو تهجم عليه .. وشو الشغلة تكسير راس يعني؟ اي ما بنردّ بالمرة وبنخلص من القصة . خليهون يعترضو لبكرا ماني رادد

وبيني وبينك .. ومن مبدأ " اللي بيروح بيجي غيرو ..مانها نهاية العالم "
ما حدا بيهمّو لو راح كم واحد ما عم يقدمو شي للموقع غير التسالي والالعاب.. او يمكن جماعة
" الدين والهداية " + تناحر الاديان ( اكيد صرت بتعرف انو they are not welcome ) ..

عالهامش ..
عجبتني كلمة حصيلة .. ضحكتني عليها كتير والله ، حسّيت انو قاعدين بحرب وعالم ماتت - لا سمح الله - ومنزلين "حصيلة " الضحايا بالاخبار وهيك شي ...

النقطة التانية ..

لازم يكون في حرية بالنشر والتعبير....

اي برأيك يعني مافي حرية نشر وتعبير ؟!
انا برأيي في حرية زيادة عن اللزوم .. في حرية لعالم مو فهمانة شو يعني الحرية ..
يعني مابعرف...
من ايمتى كانت تنفهم الحرية بانك تحكي كلام من الزنار ونازل وما حدا بيحقللو يقلك عيب ؟!
من ايمتى كانت تنفهم الحرية انو بيحقلك تسبّ هاد او تتهم هاد او تخوّن هاد واذا حدا قلك ما بيصير هالحكي تقللو شو الك علاقة انت ؟ هي حريّة رأي ما دخلك !
ومن ايمتى كانت الحرية انك تستخدم الفاظ " سوقيّــة " ع سبيل المزح بين بعضكون ؟!
انو اوكي ما اختلفنا الزلمة رفيقك وهالحكي بيناتكن عادي .. بس يا ريت ، يااااااا ريت يضل بيناتكن.. في رسائل خاصة / في ماسنجر .. قعدو تناغشو لتشبعو ... بس مافي داعي تورجونا " اريحيّتكن " كليّاتا هون ..

صحي تذكرت شغلة .. ما بعرف اذا انذكرت هون او لاء - نسيت بصراحة شو قريت هديك المرة بس مالي خلق ارجع عيدو .. مانّي رح امتحن فيه انا -

اي المهم ، انو كأنو كان في اعتراض ع تعديل الردود ؟!
برأيي هالشغلة ما كان لجؤولها الاداريين ( بقصد باداريين امناء ومشرفين ومنسقين...) ، ما كانو لجؤولها لولا انو في عالم عم تتعدى الخطوط الحمرا بالكلام .. ما هيك ولا شلون ؟!
ما بتذكر انو بوقت من الاوقات كان في هالكميّة من تعديل الردود قد اللي عم يصير هلأ ! برأيكـ(ون) شو السبب ؟!
الادارة ماشية ع سياسة محددة .. ما عم تتغير بهالدرجة الكبيرة ... بس بالمقابل عم تجي اعداد مهولة من الاعضاء اللي بتشوف الجو كتير " كول " و"حرية" و"ديمقراطية" . بيقومو بيندمجو بالقصة دغري وبيصير عنا بدل 10 فرضاً عم نعاني من ردودهم اللي " مش ولا بد " ليصيرو 30 واكتر !

بالنهاية ، صدق اللي قال " تنتهي حرّيتك عندما تبدأ حرية الآخرين ".. يا ريت لو كل واحد بيتذكر هالشي قبل ما يكتب ردّو او يبعتو ... و رح نكون بألف خير وقتا