[Hus]

اهلا ماجد 666 .. كيفك؟

*هامش: الواحد ما بيخلص اذا قلنا البريد لطلبات الدعم الفني "بريد المنتدى" و حزفنا الموضوع بيقلولك شوف شوف .. كيف قمع الحريات .. بطل الواحد يقدر يحكي .. (وبينسو موقع فيه 110 اقسام بتحكي عن حالها كلها).. وان ردينا فكمان ما منخلص بكرا كل شخص عندو قضية حابب يناقشها "خارج اطار الدعم الفني" بيروح طارحها هون ...

عموما رح نعتبر موضوعك هذا استثناء ،، ومنه فضلا فضلا ، ما حدي يطرح موضوع نقاشي بالبريد .. البريد ما بيقدر يرد فيه على المواضيع غير الكاتب الموضوع و فريق العمل وبهذا بيكون ما هون مكان اي موضوع نقاشي من حيث ما حدى قادر من الأعضاء يشارك و يعبر عن رأيو .. ومن ثم رح بنقل الموضوع لقسم آخر مع العلم اني ما رح يتثنى لي الرد بعد ذلك .. ونقله لقسم آخر كرمال اذا حابين الشباب يناقشو الموضوع مو اكتر .. (مع العلم انو تم مناقشة هيك موضوع مرارا .. بس ما علينا )

اما بعد،
* ماني هون بمعرض ابداء رأيي الشخصي او مدى اشمئزازي (غير الإرادي) من اساليب حياة بعض الأفراد او الجماعات و الشرائح بالمجتمع .. و كلامي هنا من منطلق "القائم على اخوية" من منطلق رأي اخوية كجهة ما (ان حبيت تسميها هيك..) بما هو مطلوب ابداء الرأي فيه ..

* كتير كنّا واضحين لمن قلنا "ما عنا موقف مسبق الصنع" وهذا بيعني انّا لا نؤيد ولا نستنكر .. ببساطة ما عنا موقف من هال الموضوع .. ببساطة ما بيهمنا الموضوع بشيئ ..
بالنسبة إلنا هذا الموضوع متل موضوع "إفطارك صباحا" سواء بتفطر الصبح بيض مقلي او بتفطر جبني رومي ، او بتفطر مكدوس .. هاي شغلة ما عنا موقف منها ، ولا رح نتدخل فيها بأي وقت .. و موضوع المثلية الجنسية، خاصة و الي هوي بمصطلحنا بيندرج تحت مفهوم "نمط الحياة الخاصة" ما بيعنينا بشيئ ..اضف على كل ما اسلفت انّا ك "أخوية" لسنا اطلاقااااااا بصدد فرض وصايتنا الإجتماعية او الأخلاقية على اي الأفراد ..

* مفهوم مجتمع سليم ، مجتمع مريض .. مفهوم واسع مطاط .. انت بتشوف المجتمع السليم بإعدام المثليين جنسيا (ولو حتى اعدامهم الإجتماعي و اللوجستي دون الجسدي) و آخرين بيشوفو المجتمع السليم هو الذي لا يطمر رأسه بالرمال كالنعامة وانما يواجه مشاكله الإجتماعية مواجهة الرجال في النزال .. عموما هذا الشأن ما رايد احكي فيه اكتر لما ينفهم كلامنا كموقف .. الي عم قولو مجددا هوي مفهومك او مفهوم من تعبر عنهم كشريحة مـــا .. (بتفكر بنفس تفكيرك وذهنيتك) .. هو ليس المطلق ، هو ليس المنزل ، هوي مفهوم يقتصر عليكم كشريحة ، فهناك بالطرف الآخر (فركة كعب) في شريحة آخرى ترى بمنظور آخر و بتقيم من منظور آخر تماما ..

* بالنسبة للرأي الطبي / العلمي .. قد يكون لم يتسنى لك الوقت لتطلع على ما كتب او كنت على عجالة ما فلم تتيقن لما اشرنا بهذا الصدد .. الرأي العلمي بالزواج بين الأقارب واضح اكثر من وضوح التشريعات السماوية في هذا الشأن .. و علميا طبيا هو مرفوض لما به من نسب جد مرتفعة في الإتيان بمواليد بتشوهات او عاهات او ما هو علميا "رفع للأس X احتمال ظهور الطفرات " اما ما اشرنا اليه فمجددا هو ..
لو لا سمح الله ، لسبب او لآخر حبتك الأقدار بإبن بعاهة جسدية ، وليكن اصم و ابكم .. (هذا الأمر لا شأن لك به ، ولا هو من صنع يدك ، كما ولا هو من صنع يد ابنك ، ولا باع له به ، ولا شأن.. ) هوي ما زنبو انو اجا على الدنيا اصم او ابكم ،، هذه مشيئة الأقدار .. الطبيعة الأم .. هكذا شائت .. (روح حاربها هيي ما تحاربني انا ).. المهم .. هل من حق المجتمع هنا "إعدام هذا الشخص" او محاسبة هذا الشخص لإنه اتى على هذه الصورة ؟؟ هل من حق الناطقين يحاكمو البكم على بكمهم ؟؟ هل من حق السامعين محاسبة الطرش على طرشهم ؟؟ فلا الأبكم اختار ذلك ولا الناطق اختار ذلك ..
مع ان الناطقين يُعتبرون اسوياء
والبكم يُعتبرون غير أسوياء..
كذلك الأمر الي عم يأتي للدنيا بميولات فيسيولوجية (طبيا علميا) هو ميلواته غير سوية ، "الي هيي المثلية الجنسية" هذا لا ذنب له في ذلك ؟؟ هذا شو زنبو بكل الموضوع ، هو اجا على الدنيا لقا حالو هيك ؟؟ فشو المطلوب هلق .. نعدمو ، نحاكمو ؟؟ نحاسبو على ما لا يد له به ؟؟ شو المطلوب؟؟
ولهيك قلنا ووضحنا انه في فرق واسع شاسع بين

الشذوذ الجنسي
و
المثلية الجنسية

موقفنا من المثلية الجنسية متل ما اشرنا هو "اللا موقف"
الشذوذ الجنسي طبعا لنا عليه موقف .. الشذوذ الجنسي (متل النزعة للعنف، للإغتصاب، للممارسة مع الأطفال .. الخ ) هذا لينا بيه موقف رافض طبعا .. لسبب بسيط انه الطرف الآخر إما هو رافض (متل في الإغتصاب والممارسة السادية من طرف واحد .. الخ ) او هو غير مخوّل (متل الأطفال) في القبول او الرفض .. بس هيك ...


اخيرا للأسف قد لا يتثنى لي المشاركة هنا او قرائة الموضوع بعد ذلك (للاسف من حيث برغبتي المتابعة بكثير مواضيع بالموقع وليس هذا على وجه الخصوص ، لكن الظروف والوقت عائق للأسف.. )