اقتباس:
كاتب النص الأصلي : Nirvana
أنا بآمن انو كل شخص بقدم على قد طاقتو ... اللي بيزعجني فكرتين ..
1. ما يكون عنا طاقات نهائيا ..
2. أو يكون عنا طاقات وما نقدمها ..
كل انسان بحقلو يخاف على حالو ويحب يعيش براحة بال واستقرار .. أنا بخاف .. انت بتخاف .. وكتير ناس بتخاف .. بس بحب فكر انو اقدر احكي .. اعترض .. ارفض .. وعبر ..
بس حتى هالشي ما عم يصير غير من قبل قلة معدودين .. ليش يا ترا .. كل أمور الوطن بخير وعال العال .. ولا ما في غير هالكام واحد ليحكو ..
مو شرط نعمل متل الشباب لنغير .. كنا نحكي قبل شوي بالثقافة .. ايه .. ننشر ثقافة حب الوطن .. ما نمشي مع الغلط يعني اذا في رشوة ما نرشي لتمشي أمورنا .. واذا بموقع عمل ما نمشي امور من تحت الطاولة .. وهيك ..
يعني كل واحد ضمن مسؤولياتو .. ضمن دورو .. وطاقتو ..
أما الناس اللي ممكن تعمل متل الشباب .. فهني قلال وقلال كتييييييييييييير .. يعني انا شخصيا ما بظن انو يطلع ناس متلهم .. هدول يا بريف هارت .. عندهم طاقة كبيرة كتير .. وحماس .. وحلم .. ومثالية .. وبغض النظر عن توجهاتهم .. عندهم ثقة بنفسهم وعندهم احساس كبير بالوطن والحياة ..
هني شكل خطر بس عالفساد السائد .. لانو لو نجحو بمساعيهم رح الناس تلتم حواليهم واذا ما كانو معهم .. رح توعا الناس وتشجع بدورها لتعمل شي ..
الوطن ما احتمل حبهم .. لا الوطن بحبهم متل ما حبو .. بس أولياء أمر الوطن .. ما استهضموهم ..
واللي قالو رئيس الفرع مزبوط .. وأصلاً من وين لوين ليقارن الشباب بالقاعدة .. هاي مقارنة مرفوضة من الاساس ..
وطبعا في حالات كتير غير الشباب بتعبر عن حب الوطن .. ويمكن تكون مختلفة بالطريقة والفكر والاسلوب .. بس الحق دائما واضح .
|
هي الفكرة المزعجة اكتر ...مما ذكرتي انو يكون في طاقات وما نقدمها ...... يعني انو نكون فتحنا عيونا وشفنا الحقيقة العارية والواقع القبيح ...
ونحاول نلبس الحقيقة ثوب مو ثوبها ونجمل الواقع ... بعمليات تجميل ... بس عمليات التجميل رح تفرز واقع ابشع
اكيد الوطن ما هوة يلي ظلم هدول الشباب مستحيل الام تظلم ولادها ...
اعتقال كريم هوة امتداد ...... لاعتقال حسام ورفاقو
واللفت فعلا انو كنا نسمع عن اعتقالات لاشخاص بالمعارضة مخضرمين ....وكبار بالعمر
اما هلق الاعتقالات عم تطال الشباب ..لانو هي الاجهزة وعيت انو هدول الشباب يلي اختارو وطنهم ... ما رح يغفرو ولا يسامحو ....
يمكن يكونو قلال يلي مستعدين يضحو متل الشباب او يكونو بنفس الحماس بس اتأكدي انهم موجودين
ومتل ما بتقول جوليا ان الثورة تولد من رحم الاحزان ...هون ما عم نقصد ثورة مسلحة
عم نقصد ثورة قلم وانتفاضة كرامة ...... ونشر ثقافة وهي شغلة جد جدا مهمة انو تكون الحرية ثقافة ..حب الوطن ثقافة ..النزاهة وعدم الرشوة ثقافة ...
اي لازم نبلش كل واحد من حالو ... نحاول نجرب
وبالاخير شرف التجربة بكفي
اني اخترتك يا قيدي ...
اني اخترتك يا وطني ...
كاسك يا وطن ....
يا دامي العينين والكفين
إن الليل زائل
لا غرفة التوقيف باقية
ولا زرد السلاسل
نيرون مات ولم تمت روما
بعينيها تقاتل
وحبوب سنبلة تجف
ستملأ الوادي سنابل.
______________________
We ask the Syrian government to stop banning Akhawia
|