\\\\\\\\\\\\\\\\\\\\\\\\\\\\\\\\\\\
آهٍ يا شآم المجد
سقى الله أيام كان الشام عندا هويّة
هويّة خضرة بلون خضار الغوطة أيام الشتي ,
و بلون وراق النارنج و الكبّاد ببحرة بيت العيلة يلي عم تخدق فيها فيجة صافية متل صفاوة الدهب الأبيض,
و بلون صحن العوجة إدام أبو سليم يلي مالك الدنيا و هوعم يشفط بأرجيلتو وينفخ دخان أبيض من بين فتحات شواربو السماك,
خضرة متل قلب صبية صغيرة رايحة عند الخياطة وهي عم تحلم أنو تفصّل أول روب مشان تحرئص ابن الجيران.
هويّة بيضة بلون الياسمين تبع نزار قباني,
و بلون الزنبق تبع محمد الماغوط,
بيضة بلون الطبشورة يلي بيرسموا فيها الولاد على أرض الحارة,
و بلون الغبرة على خشب بواب جنة الشام السبعة,
و بلون القشطة البلدي على وش المدلوقة يلي "الله وكيلك هلآ اجتنا تازة من حماة".
هويّة حمرة بلون الورد الجوري عطول السنة بدال بس 14 شباط,
و بلون الياسمين بعيون صبية حلوة لما تحس حالا مجروحة و تقول "ياسمين دمشق تلوث بدمي"
و بلون طبعات دم الخواريف المعمولة بإيدين اللحام و مكتوب تحتها بخط مجعلك و لغة أجعلك "ربّي بارك هاذا لبيت , عين لحسود تبلى بلعمى",
حمرة بلون ليلة أبو سليم و هي مرتو عم تتغنج و تغنيلو "بعد العشا يا سيدي , قبل العشا لا لا", قبل ما يطب عليهن المسحر و يجعلكلون مجازون.
هويّة زرقة بلون السما لما الولاد منشورين عل الأساطيح ليطيروا طيارات الورق المعمولة من غرا أبيض و ورق لميع,
بلون طيارة و أحلام حدّو يلي صار أد الشنتير و لسّع عم يعطوط عالأساطيح و يعككن الجو على أبو سليم يلي بيشلفو بكيلة زرقة و يزعأ في صوت "نزيييييل و لك"
زرقة متل منظر بحرة نبع بردى و منظرالسما الصافي من قاسيون و منظر البحر يلي بترسمو ببالك و أنتا عم تسمع فيروز بقهوة النوفرة عم تغني بس إلك "شايف البحر شو كبير, مدري أد مدري كبر البحر بحبّك"
لك هوية ملونة بمية لون و لون, متل لون القضامة ع سكر و الملبّس قبل يوم العيد و انت فايت عالبزورية و عم تنتعر يمين و شمال بين أبو سليم و أبو حدّو, و ريحة الأطايب معششة بكل مخك, و كل نشاز العالم عم يهاجمك من بياعين التماري كعك حتى صوت الراديو المسكج و طالع منو صوت "المساعد جميل تبع حكم العدالة الله يبعدنا عنو"
هويّة مهرتكة عليها صورة ختيارة كلها ملامح صبا و شقاوة,
عيونا سود متل الليل بس عم يلمعوا متل ضو الكاز و صوبية الفحم بشي ليلة من آدار
وشا أبيض متل التلج , راسا مرفوع , كتافا جالس, شعراتا مدهدرين و ريحتون غار حلبي أصلي
هويّة عليها عنوان كتير صغير بس كتير كبير
"بقلب كل واحد شافك و حبّك يا شام بدون ما يحاول يغيّر هويتك"
لك أه يا شام , بس لو تعرفي شو عم يصير,شكلو ضاعت الهوية و ما رضيو بالمخفر يكتبوا ضبط لأنو مدري نزلو عالدبكة تبع علي الديك أو راحوا يفكوا العراقية من الخناءة و نسيوكي يا شام.
\\\\\\\\\\\\\\\\\\\\\\\\\\\\\\\\\\\\\
