[Nirvana]

أخوية ..
أول ما دخلت عأخوية .. كنت عم دور على شي موضوع على البحث في الانترنت.. ودخلت على أخوية بالصدفة ..
كانت أول مرة بدخل على منتدى ..
عجبني أسلوب الكتابة اللي فيو .. وعجبني انو موقع سوري ..
فتت .. تفتلت ..
لقيت مواضيع لفتت انتباهي ..
لقيت مواضيع خلتني اقرا واقرا واقرا ..
ولقيت مواضيع مست احساسي ..
وحبيت شارك .. أحكي .. اتفاعل مع الناس اللي عم يحكو ويتناقشو ويتخانقو ..
وكأنو في شي فعلا بحركهم ليعملو هالشي ..

بتزكر اني بالوقت هداك .. كنت فقدت اي حافز بخليني فكر .. أكتب .. اتحاور مع ناس ..

ورجعت أحكي وأكتب وأفكر هون باخوية ..
واتعرفت على ناس حسسوني انو الدنيا لسا بخير ..
أنو في عالم لسا عم تفكر وعم تهتم
وصارت أخوية بكل شي فيها جزء من عالمي ..
وصارت ببعض الأحيان تشجعني وتحفزني ..
لما كون زعلانة تبسطني ..
ولما كون يأسانة ترجعلي الامل ..
ولما كون مستسلمة تحفزني ..

حاصلو .. اللي بدي قولو .. نحنا مو رقم .. نحنا كلمة ..
ولما يجي الوقت اللي صير فيو أنا باخوية عبارة عن رقم .. رح أتركها واترحم عأيامها الحلوة ..
عم يعز علي انو شوف أنو عم نتحول لرقم ..
ليش ما نضل كلمة ..
كلمة حلوة ..
كلمة مفيدة ..
كلمة ذات معنى ..
كلمة معبّرة ..
كلمة حق ..
كلمة مبدأ ..

وهون بلاقي حالي مضطرة اني انهي كلامي بتبرير حسيت بوجوبو ..
التحشيش .. التحشيش .. كل الهدف منو كان انو نعكس آلامنا وهمومنا وأفكارنا بقالب خفيف معبر ..ساخر احيانا .. مضحك أحيانا .. ومؤلم أحياناً .. ويوصل لأكبر عدد من العالم ..

نتمرد بالفكرة .. لانو مو قادرين نتمرد بالواقع ..

رح تقولو شو عم بتخبص هالبنت .. بس .. هيك حسيت ولما حس لازم عبر .. وشو في أحلى من الكلمة ..


Nirvana