كأنو انتقل النقاش من قض المضاجع لحياة ستالين
.
هلأ باختصار رح يكون ردي
.
ما حدا بينكر إنو الرفيق ستالين أعدم ناس كتير أو بالأحرى مات كتير ناس بالعهد السوفياتي
بس هاد ما بيعني إنو حكمه مو فعال
.
يعني ئصـّـة المجاعة هي قضاء و قدر يعني ما حدا بيتحكم فيها خصوصاً إنو كانت بعد فترة قصيرة كتير من قيام الاتـّـحاد
.
تاني شغلة الناس اللي ماتو بالحرب مو ذنب ستالين يا أخي لو كان الزلمة ئلهن بلا ما تموتوا روحو ائعدو ببيوتكن كان
الألمان احتلو روسيا و وصلو للصين ؛؛ يا أخي انتبه هي حرب يعني كان في مقولة معروفة بالحرب "الشيوعي آخر من
يأكل آخر من ينام أوّل من يموت" و إلا ما كانو انتصروا على الألمان اللي كان ولائهن للفوهرر عظيم و تضحياتهن موازية
لتضحيات السوفييت بس الفرق بيناتهن أنو كانت قضية السوفييت أقوى و عادلة أكتر بحكم إنهم كانو عم يدافعو مو عم
يهاجمو
.
هلأ شغلة الإحصائيات بشرفي شغلة بتضحك يعني هلأ عدد سكان الاتحاد الروسي الفيدرالي حوالي 140 مليون و
لنفترض إنو ما زاد من 100 سنة بكون صاحبنا ستالين أعدم من كل شخصين واحد يا سلام و الله قويّ!
طيب حبيبي هلأ بما انو انتهينا من فرضية موت مدري كم مليون واحد على ايدين ستالين اسمعلي شو بئول المرشد
الأعلى للثورة الإيرانية "إذا كانت الاشتراكية تعطي رغيف الخبز فقط فإن الرأسمالية تعطي نصف الرغيف فقط" هلأ هيك
متذكر معنى القول بئا يا ريت إذا حدا بيعرفو حرفياً ينقله
بئا يا سادة هاد زلمة مسلم و بتعرفو في عداوة بين الشيوعيين و المسلمين للسما
بس كان حكيه في مجال المقارنة بين الرأسمالية و الشيوعية و هيك طلع معو
.
كمان شغلة ذكروها كتير إنو الشيوعية كانت عم تعاني من ضغوط الحرب الباردة و الهجمة الغربية و مدري شوو ؛؛ هون
بختلف معكن ؛؛ يعني مزبووط الحكي بس الشيوعية كمان ما كانت ساكتة كانت عم تحاربهن يعني الطرفين كانو
متعالين بهاد المجال ؛؛ بس مشكلة الشيوعية إنو كانت فكرة جديدة خصوصاً إنو كانت عم تحارب الدين (وهاد مافيه
شك) و انتشرت بمناطق سكانها إما مسيحيين أو مسلمين على الأغلب يعني ناس متدينين و بغض النظر عن
التزامهن بس كان هالخيط الرفيع من الالتزام بدينهم كافي ليوئف ضد فكرة الإلحاد و رغم مرور مية سنة لهلأ نفس
المشكلة عم تعاني منها الشيوعية ؛؛ مشكلة الدين و لذلك بتلائي أفكار جديدة عم تدخل للشيوعية و هالأفكار عم
تحاول تندمج مع الوسط المتدين بس كمان رجعت هالشغلة خلئت مشكلة جديدة و للأسف مشكلة داخلية بين
الرفاق الشيوعيين نفسهن يعني بأي تجمع شيوعي بتلائي على الأقل تيارين الأول محافظ كلاسيكي بذكرني
بأسامة بن لادن و التاني منفتح مجدّد حسب السوق بسوق و سوريا و أحزابها الشيوعية الأربعة مدري الخمسة أكبر
مثال ؛؛ يعني بعرف رفاق بصلوا و بصوموا و كل شي و رفاق بئولوا مين هاد الله و ناس تخلوا عن اسمهن كشيوعيين و
ضلوا يشتغلو بنفس الوتيرة و ناس تركو كل التنظيمات لأن ما عادت عبت معهن و ضلوا شيوعيين بالفكر فقط دون عمل
حزبي يعني الشغلة بدها ثورة تانية بس هالمرة ثورة داخلية لتوحدهن لأن بالفعل أمر مخجل إنو واحد يئول لرفيق ما
روحو وحدو حالكن بعدين تعال احكيلي عن توحيد البشر!
.
على كل حال
.
يمكن فهمتو من كلامي إني عم دافع عن الشيوعية ؛؛ بس لأ أنا مالي مع الشيوعية تماماً ؛؛ أيضاً مالي مع
الرأسمالية ؛؛ يعني بعبارة أخرى مالي مع اي اتجاه راديكالي!
لأن من وجهة نظري رغم إنو الشيوعية تدعو للعدل المطلق بين الناس يعني ياخد كل واحد على ئد حاجتو ؛ فهاد
برأي مو عدل ؛ لأن إذا هيك لازم نعيش على الحاجيات فقط و ننسى شي بالدنيا اسمو كماليات و إذا كل واحد صار
بدو ياخد كماليات على ئد حاجتو بتخرب الدنيا لأن الكماليات ما بتخلص مثلاً بدي اطلع سياحة على القمر معناها
لازم تأمنلي الشيوعية التكاليف لأ هيك بصير الحكاية شوربة لذلك بلائي إنو الاشتراكية المعتدلة أحسن يعني يكون
في بيت بدون أجرة لكل عيلة و يكون في تموين متل اللي عندنا بسوريا لكل شخص بس يكتروهن شوي يعني مو
بس رز و سكر و يكون مي و كهربا و اتصالات بأسعار معئولة و جمعيات استهلاكية بتشرف عليها الدولة لتأمين
الاحتياجات التانية او الكماليات بحسب درجة المواطنين اللي ما في فيها فروقات كبيرة بس أكيد مو متل بعض لأن مو
معئول يكون اللي دارس تعليم الزامي بس بنفس درجة اللي دارس ماجستير
يعني هيك شغلات بدون تطرف كبير بتخلي الناس هي تركد وراها مو بالعكس متل ما صار بالاتحاد السوفياتي ؛؛
يعني عدم المؤاخذة من الأخ ابو الوليد كل الناس بكل الدنيا بيعرفو إنو في بداية الحكم الشيوعي كان الفلاح يشتغل و
السلاح فوق راسو ؛؛ هو ما هاد موضوعي يعني بكل انقلاب و أي ثورة أكيد في ضحايا يعني الحياة مو بيضا فيها سواد
و فيها عذاب ؛؛ و لأن العيشة سودا و مش بيضا قررنا نجتمع ببيت واحد و نسلق بيضة شو رأيك ؟!
®