[krimbow]

مرحبا جو

مشان المصدر هوي مقال بمجلة نيوز ويك الاميركية (نسخة انكليزية لأنو في نسخ عربية) بس ما بتذكر شو العدد لأنو بصراحة قريت المجلة عند صديق .... اذا كتير بيهمك بحاول شوف اذا بعدو محتفظ فيها او لاء و بجبلك العدد
الفكرة انو نيوز ويك كتبت مقالتين عن الموضوع (ما بعرف اذا في اكتر بس انا قريت بس 2 )
الاولى من سنة تقريبا و بتحكي انو ضحايا الجنود الاميركيين بالعراق (بهداك الوقت) يساوي ضحاياها بالفيتنام خلال 5 سنين

و التانية عم تحكي عن نفقات الحرب على العراق و ع فكرة المقالة ذكرت المصادر بشكل كتير واضح

و بالنسبة للهنود و المكسيكيين فمو كل الجيش هيك ..... مع انو قسم كبير منو متل ما قلت بس مو الكل و لا حتى النص
و بالنهاية فحتى هدول لما يموتوا اكيد ما هنين خسارة للهند او المكسيك ......... اكيد هنين خسارة لأميركا و لو كانت اقل من خسارة مواطن بحت بس بالاخير هيي خسارة و عم تتسجل

أنت فعلا عم تقارن وضع أميركا بالعراق بوضعنا في لبنان او وضع العثمانيين ببلادنا؟ انت هيك فعلا شايف المقارنة ظابطة مثلا؟ مانك شايف فرق بسيط مثلا بنوع المهمة و الهدف و الطريقة؟

مبلا في فرق
الاحتلال السوري للبنان (او التدخل السوري مشان ما يزعل البعض) تمت بموافقة عربية يلي الكل اتفق انوهيي موافقة شرعية و بشبه موافقة اميركية (ما كسنجر كان اساس التدخل) و موافقة اوروبية تتزعمها فرنسا
اما اميركا دخلت العراق (ما روح احتلال مشان ما حدا يزعل مع انو هيي نفسها معترفة انو احتلال) بموافقة بورتوريكو و ملاوي و الفيجي و افغانستان!!!!!!!!!!!! (المحتلة اميركيا طبعا) و بعض دول اوروبا الشرقية الشحادة يلي بيهما قيمة الموافقة المالية
بس بالنسبة لنوع المهمة ما في فرق كبير .... هون في حاكم مستبد و بلبنان في حرب طائفية
و بالنسبة للهدف فتنيناتون هدفهم الظاهر هوي توفير السلام و الامن و هدفهم الحقيقي هوي تحقيق مصالحهم الشخصية

هلأ انا معك انو اميركا هي القطب الوحيد بالعالم بكل المجالات تقريبا و انا معك انو في ظاهرة هيي "حيث يوجد قواعد اميركية يوجد سلام و استقرار و ديمقراطية" و انا معك انو اكتر الدول تطورا عندها قواعد لأميركا (متل اليابان و انكلترا و المانيا)

بس الفكرة هيي التالية
اميركا اعلنت بشكل رسمي انو وجودها بالعراق احتــــــــــــــــــلال و بالتالي من حق العراقيين انهم يقاوموا
يا اخي خلي اميركا تشيل كلمة احتلال و تعمل قواعد متل مانا عاملة باليابان و بعدين تعا حاسبنا اذا وقفنا مع المقاومة (هي اذا ضل في مقاومة اصلا)
بس اميركا يلي عم تعملو هلأ انها مستأثرة بموارد العراق النفطية وغير النفطية و كل همها انو بوكرا اذا عملت هالقاعدة ما يجي كم ياباني ما ضربوا ولا فشكة و ما رحلون ولا قتيل و ياخدوا المشاريع الكبيرة
او كندي او روسي او او ما بيهم

في نقطة
اميركا كانت مستعمرة بريطانية بعدين حاربت بريطانيا ونالت حريتها بس اليوم هيي حليفتها الرئيسية
بلا ما نبعد كتير ..... من خمسين سنة بس اميركا سفقت اليابان قنبلتين ذريات جابت اجلها و لليوم عم يولدوا ناس مشوهين
و مع ذلك اليابان من اكبر حلفاء اميركا اليوم
قصدي قول انو وين المشكلة اذا تحالفنا حتى مع الشيطان طالما هالشي بيحقق مصالحنا الآنية
بالنهاية التحالفات مانها زواج كاثوليكي
المهم تتحقق مصالحي و مصالحي اليوم يمكن تكون مع اميركا بس مو معناتا انها تحتلنا و تركبنا
لأنو شفناها بالعراق

و شغلة كمان
المقاومة الموجودة بالعراق يمكن فيها عناصر غير عراقية بس الغالبية العظمى عرقية
حرام عليك تحرم العراقيين شرف المقاومة و تلزأها بغير العراقيين
بعدين تأكد انو ما في غير النور يلي ممكن انو يعرفوا شو عم يصير بسجن ابوغريب و يضلوا يقولوا انو اميركا منيحة

انت يلي ما عم تشوف الصورة العراقية صح لأنو ما عم تشوف غير يلي بيقدمو الاعلام الاميركي (يلي برهن عدم حياديتو)

بس ضل شغلتين (آسف ع الاطالة)
اول شي انو بنظرة على الاقتصاد الاميركي قبل الحرب ع العراق و بعدها حتشوف حجم الورطة يلي اميركا فيها
ما تتطلع ع كل شي بالاقتصاد (مشان ما تعبك، بس اذا بدك اتطلع ما عندي مشكلة ... حتشوف الصورة اوضح)
اتطلع ع رقمين تنين اساسيين و قارنهم بارقام قبل الحرب أو حتى بفترة حكم كلينتون
الرقم الاول هوي عجز الموازنة يلي وصل لأرقام قياسية (وهو عجز داخلي)
و " " " العجز التجاري " " " " (و هو عجز خارجي)

و آخر شي: أرجوك و رجاء خاص (عن جد عم احكي) لا عاد تنعت عقليتي بالعربية لو سمحت لأني باعتبرها اهانة كبيرة بحقي
فلو سمحت ... رجاء خاص .... لا تنعت عقليتي بالعربية
لو قايل سورية كنت رح اشعر بالفخر
بس عربية ....


و دمتم