[ما بعرف]

فكرت شي مرة انت وماشي بالشارع وقبل ما تكب الورقة او المحرمة او كيس البطاطا الفاضي او علبة الكولا او .. او.. الخ انك تحملها شي 50 متر لاقرب حاوية او سلة نفايات ؟
خطر ببالك شي مرة انو عامل النظافة يلي عم بيكنس الشارع بشر متلك متلو وانو اذا طرنب الزلمة وحرد و بطل يشتغل لانو نحنا لا نمت للبشر بصلة شو يلي رح يصير فينا ؟
طلع معك شي مرة انو كيس الزبالة المنزلي لازم يكون كتيم و ما بيخرق سوائل منشان ما يطلع ريحة بالشارع ؟
يا ترى انت لما بتكون بالبيت و بدك تكب شي شغلة بتروح تكبا بالسلة ولا بتشلحا علارض محل مانك قاعد ؟
انا ماني احسن منك بس الشغلة اخدت حيز مهم من تفكيري لما اجا قرايبي من اميركا ( صرلو خمسين سنة مهاجر) وقال اكتر شي زعجو بالبلد هو منظر الوسخ بالشارع
هلق انا بحضر افلام اجنبية كتير وبدقق على هيك شغلات بس يكون الفلم مصور خارج الاستديوهات ولاحظت انو الموضوع نسبي يعني عندون شوارع فعلاً نظيفة وعندن كمان شوارع اضرب من عنا ان كان من ناحية الزفت وان كان من ناحية الوسخ بالشارع بس الفرق انو عندن موضوع حاويات الزبالة و سلات القمامة العامة موزعة بشكل مدروس
بس عنا محلات ومحلات يعني مطرح اللي ممكن يتواجد فيه سواح او مسؤولين بيركزو عالنظافة العامة بس غير محلات معدومة او شبه
شو رأيك واحدنا يبلش من حالو ... بتظبط ولا ما بتظبط