[Echo]

بصراحة انا عادة ما بآمن بهالقصص لانو بالنسبة الي هيك نوع من القصص مرتبط بوجود عالم تاني او حياة تانية...وهالعالم بشكل او بأخر مرتبط بوجود الله...وانا من ناحيتي ما كتير بأمن بفكرة وجود الله بالشكل يللي بينحكا عنو بالدين...
بس يللي حبيت زيدو او قولو هو قصة سمعتها عن أبي...ومنشان حطكن بجو القصة..رح خبركن انو ضيعة أبي فيها قلعة...هلق القلعة مهدمة وباقي منها جزء...المهم...أبي عندو أخ اكبر منو ويللي هو عمي الكبير وعندو ابن عم كمان لسى اكبر من عمي الكبير...

المهم انو عمي وابن عمو لأبي بيحكولي هالقصة...

اول ما بلش ابي يحكي وكان عمرو صغير يعني بيجوز سنتين او تلت سنين...كان عمي وابن عمو لأبي ييقعدو ع سطح بيت جدي...وسطح بيت جدي مانو اعلى سطح بالضيعة متل سطح بيت هاني بضيعتهن بس من هالسطح الواحد بيقدر يشوف بقايا القلعة...

وبلا طول سيرة..بمرة من المرات كان ابي مع عمي وابن عمه قاعدين العصريات ع سطح بيت جدي وكان عم يتناقشوا وابي عم ينطوط حواليهن...وفجأة بيقلهن...هاي القلعة نحنا عمرناها...هون بتجيهن الصفنة وبيندارو عليه...بيقولولو...مين انتو....بيقلهن نحنا...اي نحنا كنا نشتغل بايد وناكل بايد وكانو يجلدونا.....

طبعا هالقصة اكيد صارت والكلمات منقولة بحرفيتها لانو الكلمات كانت كتير قوية وفجة ولحد هلق عمي وابن عمو بيقولوها بحذافيرها متل ما انا كتبتها فوق بالعريض...

هلق اذا افترضنا انو ابي ما كان يحضر تلفزيون وما كان يتابع افلام متل فيلم اللامرئي لانو ع ايامهن ما كان في تلفزيونات...واذا افترضنا انو ما كان لسة بيقرا بكتب بتحكي عن التقمص...وما كان لسة بعمر يسمحلو انو يختلق هيك قصة....فهل فينا نقول انو التقمص موجود؟؟؟

اذا كان الجواب مظبوط...فقصة هاني مظبوطة...ومعناتها في الله...وبالتالي أكلنا هوا....

ودمتم...