[فلسطينية الشتات]

والله يا جماعة انتوا قلبتوا الموضوع وكأني بسب على حسن نصر الله

بداية ما حد فيكم بيعرفني حتى تحكموا علي بهاي الطريقة، وثاني شي انا ما حكيت ولا أي كلمة على حسن نصر الله حتى توجهولي هذا الكلام.

ما بدي ارد على كل واحد بشكل منفصل واخوض بالكلام.

قرأت جميع الردود، وبحب احكي شغلة وحدة بس، المقاومة الشريفة وين ما كانت انا معها وبحطها فوق راسي، وأظن أني وضحت موقفي كويس من المقاومة اللبنانية داخل لبنان.

أما للأخ أو للأخت الي قال انه والله هذا الي ضايل انه يروح يقاتل في العراق كمان، فأنا ما طلبت يقاتل في العراق كل الي بطالب فيه بيان موقف، يعني والله ما بينفع اكون مع المقاومة الفلسطينية بفلسطين لكن اوقف على الحياد لما الموضوع يتعلق في المقاومة العراقية، وليش ؟؟؟ لأنه والله إيران الها دور هناك وأنا ما بدي احكي عن إيران لأنها مرجعيتي وحليفي الأول.

يا أخوان مش هيك الامور بتنقاس.

اما يا محمد أنه أنا والله ما ايران لأني ما بدي اكون مع امريكا، فوالله كلامك ما بعرف كيف أرد عليه، يعني هل بالضرورة انه ننحسب على امريكا أو ايران؟؟؟؟ يا أخي احكي انه فخار يكسر بعضه، ما بدنا لا امريكا ولا بدنا ايران، وامريكا يعني بالضرورة الكيان الصهيوني.

أما بالنسبة للفارسيين والصفويين فأنا كمان عارفة شو بحكي، بتقدر ترجع يا صديقي وتشوف شو يعني الصفويين وتعرف شو تاريخهم، وقتها بس رح تعرف ليش انا حكيت الي حكيته، وإذا ما بدك تروح تتعب شوي وتدور وتقرأ انا بختصر عليك الوقت، وبحكيلك أنه حتى القرن السادس عشر تقريبا كانت ايران دولة مسلمة وسائد فيها النظام الاسلامي السني يعني ماشيين على سنة الرسول.

حتى اجت عائلة كان اسمها الصفوية، وعملوا انقلاب على الحكم الي كان سائد في ايران، ووصلوا لرأس النظام وقتها هدول الصفويين كان همهم زعزعة الإسلام حتى يرجعوا يبنوا الدولة القديمة الي كانت في ايران بعيدا عن حكم الإسلام والمقصود هون دولة فارس الماضية.

وكانوا عارفين وقتها أنه ما في سبيل يقدروا من خلاله يقهروا الإسلام كنظام ودين إلا من داخله، فكان أن نشروا التشيع داخل إيران، يعني تأسلموا في الظاهر وهم بداخلهم يسعوا لتدمير الإسلام، لأنهم كانوا عارفين كويس إنه هزيمة الإسلام مستحيل تكون بتأثير خارجي، فكان الطريق الوحيد انهم يدخلوه ويحاولوا اسقاطه من الداخل، وللأسف هذا الي حصل فعلا، تشيعوا وفرضوا التشيع على كل إيران، وبعد انتهاء حكم عائلتهم كانت ترسخت تعالميهم ونظمهم وظل التشيع في إيران وانغرس اكثر وأكثر مع الوقت. حتى وصلنا لهذا الوقت الي ايران صارت فيه قوة موجودة فعلا على ارض الواقع، وتسعى لبسط نفوذها .

أنا بعرف اني طولت في الحكي، وبعرف كمان اني دخلت لحديث طائفي مع انه من البداية ما كان هدفي الحديث بهذا الموضوع بقصد السني والشيعي، لأنه هذا تماما الاسلوب الي من خلاله قدرت امريكا والكيان الصهيوني وحتى ايران من خلاله اسقاط النظام في العراق،وبعدها خلق الحرب الحالية بين العراقيين أنفسهم.

أما عن فتح وتاريخ فتح يا محمد، ففتح ساقطة ساقطة ساقطة ومن سنة 1974 تحديداً، والواقع الحالي بيثبت أنه فتح التي كانت عام 1965 هي ليست فتح الحالية، بالتالي ما تحكيلي شوفي تاريخ فتح بعدين احكي.

واذا بدك نحكي أكثر بتاريخ فتح وحماس وغيرهم على الساحة انا على استعداد، لكن لا تنسى انه كل شي في المنطقة مرتبط ببعضه، سواء في فلسطين او في العراق او في ايران او في لبنان.....الخ

والي ما بتعرفه انت ولا بيعرفه اي واحد فيكم كلكم يا الي رديتوا علي كأني خونت المقاومة اللبنانية وحسن نصر الله، انه خلال الحرب اللبنانية الأخيرة كان الي الشرف اني اكون ضمن 50 شخصية نزلت على لبنان والتقت مقاتلي حزب الله وطلع مندوبين منا والتقوا السيد حسن نصرالله، والحمد لله علاقتنا لا يشوبها شيء معهم إلا الاختلاف بتعاطيهم مع المقاومة العراقية.

اتمنى ما تاخدوا المواقف نتيجة لجملة او كلمة، واقرؤوا شو بحكي قبل ما تحكموا علي.