معلم خوليو
الاتزان عبنئط تنئيط في كل كلمة حكيتا
بس في الي كم نقطة على حكيك
شفت إنو الله يعني الإله دعم أتباعه اللي هن المتدينين و بعتلهن إنت مشان تكون دليل على حكي الأخ صاحب الموضوع ...
لحظة شوي ... ايه فادي .. ما شا الله الموضوع طويل ... منرجع للحديث .. و ئصدي بحكيي إنو السيد فادي كان عم يحكي مع الملحدين إنو هالجماعة بسبب طريئة تفكيرهن اللي ما بتعترف بوجود الإله و بالتالي الإله عندهن متل العنقاء أو الغول يعني بإمكان الناس إنو تحكي عنهن و تألف ئصص و حكايا و حتى تسبهن ، هالطريئة بتسمحلهن من وجهة نظرهن إنو يستهزؤوا بالإله و يهينوه و بالتالي و النتيجة الطبيعية طبعاً يثيروا المتدينين يعني إنت إذا معجب بـ 50 cent مثلاً و هو اللي ما ممكن يفيدك أو يضرك بس مجرد إعجاب فإنت ما بتئبل إنو ينسب إدامك فكيف بدك يكون موقف شخص عندو شغلة كتير بقدسها و بيستمد منها القوة و يتساعدو على التخلص من مشاكلو و بتكون سند إلو وئت الزنئة ... إلخ و بيجي واحد بيستهزئ منها إدامو ، طبعاً رح ينكت هاد المتدين كل شي عندو من مواقف مخبأة أو معلنة تجاه الملحد اللي أهان أقدس شي بحياته مو بس هيك كمان رح ينظرله متل ما بينظر للحشرة يعني نظرة دونية جداً لأن إذا بتجيب واحد من المدينة الفاضلة و ئعدت تسبه رح يكرهك بئا ما بالك بالبشر اللي موجودين حالياً .
و حضرتك عم تئول إنو الإلحاد مو إيديولوجية يعني لا يصلح ليكون محور لحزب و هاد يؤدي مباشرة لإن من السذاجة يئعد شخص يحارب هيك مبدأ بهالضآلة ، و لو رجعنا للمتدينين منلائي إنو معظم أو كل الأديان اللي بالدنيا إن كانت سماوية أو أرضية بتشترك بشغلة غير الاعتراف بوجود الإله و هيه الدعوة للتسامح و عدم إيذاء الناس اللي من طوائف تانية و في مقولة أو آية ما بعرف شو هيه بئولوها المسلمين (و ادعُ إلى سبيل ربك بالحكمة و الموعظة الحسنة) يعني بظن إنو هالجملة ما فيها دعوة لسب الملحدين أو الاستهزاء فيهن و كمان لما بصير مناظرة بين شخص ملحد و شخص متدين المتدينين ما بيبعتولوا إلا واحد من أحسن العقول عندهن و هاد يدل على اعتراف المتدينين بقوة و ذكاء الملحدين و بالتالي من المستحيل إنو يكونوا بينظرولهن نظرة دونية ، أيضاً شغلة تانية بسمعها بين المسلمين - و عذراً يعني أمثلتي من ناح المسلمين لأن عايش ببلد كلا مسلمين) إنو ما بصير يسبو مقدسات الناس اللي من غير دين ، يعني مراعاة لمشاعر هالخلئ و بتصور إنو كل الديانات بتدعو لنفس الشي ، كمان السيد المسيح بئول ( اذا صفعك شخص على خدك الأيمن أدر له الخد الأيسر انجيل متة 9 : 35 ) يعني دعوة لعدم ملاقاة الإساءة بالإساءة ، و إذا بدي إذكر أمثلة ما رح اخلص اليوم ... لذلك بكتفي بهالقدر ..
و زبدة الحكي إنو من وجهة نظري المتدين لازم يعترف بوجود العقل و التفكير و الأسباب و المسببات و بدون ما يهين الملحد و على العموم ما بيئدر يهينه يعني ما في عند الملحد شي مقدس ممكن ينهان ، فمنلائي الملحدين عم يستغلوا نئطة الضعف عند المتدينين و بيستثيروهن من هالطرف و اللي يؤدي بدوره ليطلع المتدين عن طوره و يصير يخبص و هون بكون الملحد مروء و بيئعد يمسك نئاط على المتدين .
هلأ منرجع لأهم نئطة و هيه إنو من حق الملحد كما من حق المتدين إنو يعبر عن وجهة نظره لكن مع الانتباه لعدم التجريح بالآخر ، و إذا متل ما عم تئول من حقك تنزل الله من السما بتنزلو بس مو ئدام واحد بيؤمن بالله لأن إذا ما بتعرف معنى التجريح و الإساءة هاد مثال عن الإساءة ، فتنزلو ببيتك بمحلك على طاولتك مو وين ما كان ، و شغلة تانية إنو الأمور مو بالبساطة اللي متخيلها بحيث إنو ئلت حضرتك (( وإذا انت بتآمن بالله .. من حقّي أنا نزّل الله من السما .. وإذا أنا بموت بدباديب نيتشة .. روح انت قلعلو دباديبو )) يعني ما فيك مثلاً تئول لواحد خود دوس على رجلي أد ما بدك أنا ئبلان بس بدي دوس على رجلك أد ما بدي ، يعني بجوز الزلمة ما بيتحمل تدوس على رجلو ، فوئتها كمان ما بصير تئول هي مشكلتو إنو أنا بدي دوس و هو يصطفل ، الزبدة إنو اللي بتئبلو انت على حالك و على مقدساتك ما بيئبلو كل الناس .
ببتمنا أكون وصلت للحياد .. في حكيي .. و ئدرت .. أحكي بغض النظر عن وجهة نظري الخاصة و قناعاتي الشخصية
و ممكن يكون إلي رجعة ... لأن الحكي بطول و بطول ...
آسف على الإطالة ،
و بشكركن مسبقاً على رحابة الصدر اللي أكيد رح تكون موجودة .
