[fady juventus]

صار حكي كتير عن الألحاد والملحدين بأخوية
و من جهتي أنا شخص محايد لا متدين ولا ملحد مع إني مريت بحياتي بمراحل تقلب بين الجهتين قبل ما استقر عالوضع الحالي اللي فيه راحة بال أكتر من خلال نسيان مواضيع الدين قدر الإمكان والتفكير بالحياة اليومية العملية ومن دون إنتقاد هالطرف أو هالطرف إلا الأشخاص المتطرفين.
بس الشي اللي لاحظتو على (بعض) الإخوة الملحدين ومن زمان بدي ناقشن فيه...
هوي مجاهرتن بالألحاد و أحيانا تعمد إهانة الشخصيات الدينية والمتدينين دون تمييز بين صالح وطالح "فقط لمجرد كونه متدين حتى لو ما كان متطرف" بدل ما يكون الإنتقاد بناء ، إيجابي و ديمقراطي
إضافة لإنتظار أي فرصة لإعلان هالإنتماء اللي برأيي ما فيه شي يدعو للفخر متل كون التدين شي عادي ما بيرفع الراس ... الحالتين متل بعض
و لما منطالب المتطرف دينيا(و الأحمق غالبا) إنو يحتفظ بعقيدته وإيمانه بقلبه وما يصرع طي*نا فيهن ...
لازم بالمقابل نطلب من الطرف الآخر الملحد نفس الشي...
وإلا صدقوني ما رح يكون في فرق بين الطرفين!
يعني أنا بعتب على إخوة بيعلنوا بمناسبة وبدون مناسبة إنن ملحدين أو حتى بيحطوها بالتوقيع وكأنو منتظرين منا نقول"ياي شو هالقوة"
أو "شو متحرر و فريي" !!
لاء أبدا ... الإلحاد بعمرو ماكان تميز إلا لناس ما قدروا يتميزوا بشي تاني للأسف...
لأنو الإلحاد بالنهاية مانو فكر أو عقيدة تتبناها و تشهرها للعالم ، فإما إنك تؤمن بالله أو ما بتعترف بوجوده وبالحالتين هاي قناعتك خليها بقلبك ، وأنا ماشفت بالدول الديمقراطية أحزاب للملحدين(لأنو شو هالحزب اللي برنامجو نقض الدين!؟) ، بس متل ما بتعرفوا في أحزاب بتنقض الفكر الديني وبتعتبره عائق أمام تقدم البشرية دون الدعوة لمحاربته لأنو هيك بتصير قمع لحرية الرأي المقدسة بالنظام الديمقراطي .

أنا وجهت كلامي للملحدين لأني بتوقع منن ذهن منفتح أكتر من الطرف التاني.
و يا ريت تتقبلوا كلامي بصدر رحب.
و إذا حدا إلو ملاحظة عليه يناقشني فيها بطريقة حضارية دون تهجم (حاكم دمكن حامي شوي)
تحياتي الصادقة للجميع.