[krimbow]

مرحبا حكيم
في كم شغلة حابب ضيفها على كلام جو

اول شي اذا اخدنا ع منجزات حافظ الاسد (هي اذا كان في منجزات) فمو معناتا انو نعملو تمثال بكل ساحة و كل مدينة
عرفت ليش انا ألت عنهم انهم اصنام
يعني لو كان الموضوع موضوع احترام بالاساس كان تمثال او تمثالين بكفي بس لما يوصل عدد التماثيل للعدد يللي عنا منو صار الموضوع استهزاء بالشعوب او استخ*** حتى
يعني مو معقول لحتى عبر عن احترامي لشخص أوم افقد احترامي لنفسي

انت قلت انو في اخطاء بالمرحلة و هاد الشي مو موضوعنا هلأ بس الفكرة انو مو معقول كل واحد منحترمو منعملو تمثال
يعني لازم هاد الزلمة يكون عامل شي منيح و مفيد مو بس يحكم 30 سنة بيصير بيحقلو نعملو تمثال

بالنسبة للقياس بمحمد فالموضوع (رغم انو القياس لا يصح) انو محمد قدر يحول مجموعة من البدو لأمة كبيرة وهي شغلة عظيمة (على الاقل بنظرهم)
جنكيز خان عمل ذات الشي بالقبائل المغولية بتأدر تقللي لازم احترم جنكيز خان لأنو المغول بيتغنوا فيه؟ او لازم احترم هولاكو مع انو دمر حضارتنا بهمجية غير مفهومة؟
يمكن انت تحترمو لجنكيزخان بس هاد ما بيعني انو نعملو تمثال

شو رصيدك الثقافي والتاريخي والفكري الي بيحطك على قدم المساواة والرئيس الأسد !!

ليش لازم يكون عندي دوكتوراة لحتى لاحظ انو في واحد عم يضحك عليي و يعمل كل شوي تماثيل لحالو؟
بعدين على فرض انو رصيدي صفر هاد ما بيعني ابدا انو احترمو

ومشان الصفيحة فألف صحة ع قلبك بس اذا انت ما كنت موجود هاد ما بيلغي انو ابنو قال انو بدو "يحطم تماثيل ابوه" اصلا حتى انا ما كنت موجود بس اليوم صار في شي اسمو ستلايت و وكالات انباء و جرايد و هيك اشيا حتى لو ما كنا موجودين فهيي بتخبرنا شو عم يصير

بعدين بركي انزنقو على اسماء للشوارع .. يعني بتصير .. شو ما بيصير يخلصو اسماء كل قبضايات البلد .. بركي انزنقنا وبدنا انسمي شي شارع شو منسميه كريمبو مثلا يعني انا راضي ضميرك وزمتك .. هلق معقول شارع اسمو كريمبو !!!!!!

هلأ هاد مو موضوعنا اطلاقا بس انا حاسس انو كل هالديباجة لحتى بالآخر ينحط اسمي مع الوجوه الضاحكة لذلك بيحقلي دافع عن نفسي مشان هيك رح ناقش هالنقطة
ما تخاف حبيب ما رح ينزنقوا لأنو في عنا اسامي لماعة لناس بتستاهل و اذا بدك منصدر لغيرنا كمان
و على فرض انو انزنقوا يعني وين المشكلة يحطوا كريمبو ما اصلا في شارع بحلب اسمو موغامبو و الاسمين كتير قراب و سكان موغامبو شايفين حالون كتير باسم الشارع تبعون
و في اسامي العن من هيك متل " كفر بهم" و "زبلطاني" يعني وين المشكلة انو يكون في شارع اسمو كريمبو، و من ناح ضميري لو انحط اسم كريمبو ع شي شارع رح يكون مرتاح كتير كتير ....... و ممنون كمان

بس انا عم بدعو لإحترام الرمـــــــــــــــــــــ ــوز

يا حبيبي يا عيني الاحترام شي و صنع التماثيل شي تاني تماما
لحتى تعمل تمثال لشي حدا لازم يكون عندو انجاز كبير و شو ما كانت انجازات الاسد ما بتستدعي انو نعملو تمثال واحد فما بالك باللآلاف

شو هال الحكي!!
بفهم من حكيك انك عم بتحض الشعب البريطاني نحو عدم احترام الملكة ايليزابيت !! (من باب يابا احنا ما فينا انغيرك هلق سو ما فينا نحترمك !! يا شيــــــــــــــــــخ )

وضحلك هي النقطة جو بس في شغلة انو فعلا الشعب البريطاني مانو مضطر ابدا يحترمها، يعني هيي لازم تبوس ايدها وش و افا لأنو الشعب البريطاني محترمها، و لو أجيت للحقيقة رح تلاقي انو الملكة همّا الشاغل هوي مدى شعبيتها و وقت انقتلت الاميرة ديانا انخفضت كتير هالشعبية و الشعبية بالاساس بتجي من الاحترام
هاد دليل انو فعلا في بريطانيين ما بيحترموها لا كملكة و لا كرمز و ع فكرة هنين كتير احرار وما حدا بيأدر يلومهم

في شي تار قديم شي ؟؟
في شي تصفية حسابات قديمة وما خبرونا عنها ..؟؟
شو الدواعي الي بتوجب الرئيس على تدمير شعبو ؟؟ ليش طيب اش معنى يعني ؟؟
شو الدوافع تبع قتل مواهب الشعب وابداعاتو .. ؟؟
شو الدوافع تبع هزم الشعب داخليا ؟؟
لهقل ما عم لاقي دافع مقنع بيأهل حكومة نحو تدمير شعبها كهدف !!

الصراحة معك حق
بس انت عم تسأل الناس الخطأ
يعني روح اسألهم ألهم ليش هيك عم يعملوا

هلأ خلينا نكون صريحين و مع احترامي لكل الطوائف بس العلويين و البعثيين مانهم ساديين بالفطرة
يعني لو ما كان في تار أديم فعلا بين العلويين والسنة ما كان صارت مجازر حماه، على الاقل مو بالقسوة يللي حصلت فيها

الي كان بدي قولو وقلتو شي الفين مرة بقالي انو الإحترام مالو علاقة بالإتفاق الإيديولوجي ..
الإحترام واجب منشان يمشي النظام وتمشي البلد ..

هلأ يمكن اتفق و يمكن اختلف معك بس يللي انا بدي أولو للمرة المليار انو الاحترام شي و صنع التماثيل شي تاني