[Gazita]

كاتب النص الأصلي : وائل 76

اول شي بوجه شكرنا العميق باسم كل اخوية الوطن المعنوي للحكيم يلي لبى ندائنا ونقل الموضوع على السيقيفة حتى يقدر كل عضو بيحب كوستا انو يشارك ويعبر عن رفضه لقرار كوستا يمكن نقدر من خلال كلماتنا نوصل لكوستا قيمته بالنسبة النا جميعاً
شكراً حكيم ويديمك الله رمز لاخوية
كوستا انا ما كملت كلامي امبارح بسبب نقل الموضوع على البريد لكن من هلاء بقلك راح علق مشاركاتي بكل شي وما راح يكون مشاركات مني غير هون بموضوعك هذا وبس
اسمحلي ناديك باسمك لانو بيحمل صفاتك ما راح اذكر كوستا رغم انك بتحب الاسم هاد راح قلك نبيل لانك فعلا نبيل
نبيل انا في يوم من الايام انجبرت اني افقد شخص غالي كتير علي الظروف ارادت اني ما اقدر استمر معه وقتها كل الكون صار عندي ظلام ما شايف شي و لا حاسس بشي حولي لا امل ولا حلم بحياتي وصلت معي للموت يمكن هاي اول مرة بحكي عن شغلة خاصة بحياتي ما بعرف لو كان راح تقدر كلامي هذا ولا راح تعتبره قصة طريفة تقرأها وتستمتع فيها او تشوفها كئيبة وما تكملها
في الفترة يلي قلتلك عنها انا وصلت لقرار الموت مو ترك منتدى او اصدقاء وبس لاء وصلت للموت فعلاً وإشتغلت على الموضوع بشكل جدي فبل التنفيذ بيومين وبالصدفة البحتة سمعت اغنية بالتلفزيون لمرسيل خليفة يلي بيقول فيها ( وأعشق عمري لاني اذا مت اخشى من دمع امي ) يمكن تستغرب لو قلتلك انو هاي الكلمتين حركت فيا اشيا كتير بالرغم اني كنت عايش بالبيت وعند اهلي وكل يوم بشوفهم لكن الاغنية هاي جعلتني اتخيل المشهد يلي راح يكون وقت ليستلموا جثتي وممكن ما يستلموها واندفن بال48
راجعت حسباتي ولقيت اني كنت اقذر واحقر من تصور البشر لاني اخدت قرار عن ضعف وجبن وذلة وما حسبت حساب الناس يلي بتحبني و الناس يلي راح تتعذب لو غبت
انا فضلت راحتي على عذاب الاخرين والاخرين يلي بحكي عنهم الهم حقوق عليا متل ما نحنا كلنا هون النا حقوق عليك ومتل ما انتا فضلت راحتك على حساب احساسنا بالعجز انو نحتفظ بناس حبيناها وعشنا معها الحلوة والمرة
كتير ناس ممكن تقرا كلامنا هون وتستغرب شو الرابط يلي بيجمع هاي العالم لدرجة انهم يناضلوا لاخر لحظة في سبيل انو واحد يبقى وما يترك انا فكرت كتير بالرابط يلي بيجمعنا ما لقيت تفسير منطقي مقنع لتحديد هذا الرابط
لقيت عقلي عاجز عن التفسير يمكن لانو الرابط هذا متعلق بالقلب مو بالعقل متله متل الايمان والحب وحب الخير
نبيل اقسم بالله العظيم وانا انسان مؤمن لو أدت اني اطلع الشام حتى اشوف شو قصتك راح اعملها وتلاقيني فوق راسك
اترك كل هالافكار المجنونة و ارتاح يومين من الضغوط يلي انتا عايش فيها وعم ننتظرك لنكمل مشوارنا بعدو في خطوات كتير لازم نمشيها سوا وما راح نتنازل بسهولة
بالنسبة للشخص يلي أسأت اله بعتقد انك بتقول دايماً انو الله هو ضميرك وما عمري سمعت انك بتقول عن نفسك الله وبما انك لست الهاً يبقى لازم تغلط لك كلنا بنغلط وكلنا بنصيب هاي هيا الحياة خطأ وصواب كيف ممكن نشعر بقيمة الصواب لو ما اخطأنا وكيف ممكن نتعلم ونستفيد من تجاربنا لو ما مرينا بالخطأ
ارجوك نبيل ما تجبرني احكي اكتر من هيك بكفي يلي حكيته وما تجبرني اني اخد انا كمان قرار صعب
نبيل ما ممكن انتظر يوم عيد ميلادك لنزل موضوع تهنئة متل ما عملت مع nervana كتير راح يكون صعب وانتا بتعرف كيف كانت نفسيتي يوم عيد ميلادها وشو حكينا انا وانتا
حرامك عليك يلي عم تعمله ارجوك نبيل فكر وركز وتذكر انو هون في ناس بتحبك
اخر شي بعدو في عندي امل ادخل الجنة فيك لما اقنعك ان الاسلام هو الحل او انك تقنعني بمنطقك لانو باقي الشبية هون مو ملحدين ومثقفين متلك يعني لو جادلوني بغلبهم لاني رجال صاحب مبدئ

الله يسعدك نبيل ويخليلنا ياك فكر وتذكر انو راح تتعسنا كلنا لو بتقبل بتعاستنا و احساسنا بالعجز يبقى اترك

بابا وائل اثرت في القصة كتير انشا الله كوستا يقرا اللي كتبتو بابا وائل ويرجع عن قرارو .ما فينا نخسر شخص عزيز علينا متل كوستا.وما راح تفلت من ايدينا متل ما فلتت نيرفانا سكرو الباب يا جماعة مشان ما يروح