[hanny dagher]

من اقوال الحكيم القديمة المأثورة بتصرف

صار في باخوية 52610 اعضاء وما زال باب التسجيل مفتوح للي بيحب
شي ظريف .. يعني في حركة .. والحركة بركة متل ما بيقول ابونا .. بس الحركة الي شفتها الظاهر ما فيها بركة ولا شو ما بعرف !!!
انو لكن يا منظومين .. ما في قصيدة غزل متل الخلق من شهر لهلق ..
انو ما في لكن واحد حط شرح لبرنامج واحد من شهر لهلق ..
ما في غير النكت .. والالعاب .. والتحيات والسلامات .. وتمسيح الجوخ والحركات !!
لك شي حزورة من تبعوت العقل .. وحدي بس ..بيكفي
انو شي موضوع عن الصحة واحد متل الخلق ..

انو شو القصة .. معقول يكون صار الي بيبالي !!!!!
معقول يكون " فَسَدَ المِلح " .. - انشاء الله لاء-

ما بعرف وين تكمن المشكلة .. ما بعرف بيجوز ما في مشكلة .. او ما حاسين بالمشكلة .. بيجوز منحب انقول انو ما في مشكلة .. لانو الهروب مريح دائما ..

المنتدى هذا تحديدا ودونا عن اي منتدى ونادي اخر .. ليه خط عريض واحد ومميز وعليه قام المنتدى وكرمالو حيستمر .. وكرمالو عم نشتغل وكرمالو بدنا الي بدو يدخل يدخل
المنتدى هذا بهدف البناء .. وبس وبس وبس ..
والما بيحب يبني .. والما بيحس انو بيحاجة لينبنى فيه .. يزح على جنب .. ويبعد .. كتير ..

ناطر بهمتكم نشوف الحركة التصحيحة الأولى بالمنتدى هذا .. بدون راديكالية .. وبدون اسلحلة وبدون صريخ وعياط ..
بدنا مظاهرة سلمية بالشموع والقبلات امام باب الرسائل الخاصة لكل عضو دخل وما تركنالو مجال يشارك.. ولكل عضو شارك وما تركاناه يكفي كبتناه .. ولكل عضو طل ولما ما لقى شي مفيد هرب لمحل افضل
بدنا مظاهرة سلمية بالقناديل .. امام باب موضوع فيه سوال ,,, وما اجاوب عليه بالاقسام التعليمية .. وامام باب كل مشاركة فيها قبلة انطبعت وما تم نشرها بالاقسام الادبية ,,,
بدنا مظاهرة سلمية بالقداحات متل ايام زمان ,.,. مو بالموبايلات حالة اليوم
ومظاهرة بيافظات مكتوبة بايدينا مو طباعة كمبيوتر وموزعة علينا ..
بدنا بالنهاية مظاهرة متل الي بيطلعو بالافلام الابيض والاسود لما يتظاهرو الناس وماسكين ايدن بعض .. وشادين .. اي شادين ..

وبعدها اذا اذا نجحت المظاهرة وحققت اهدافها منضل ما سكين ايدين بعض ومننزل على الدبكة ..و مندق بقوة على الارض .. دقة وحدة .. وبكل قوتنا .. دقة وحدة .