خطر على بالي هالرد انا وبالجامعة وبنص حصة الرياضيات كانت حصة محششة الله وكيلكن (في حدا بالدنيا كلها بياخد بالفحص 98 من 95
انا اخدتا اليوم ) المهم ما بعرف قديش في اسا من الافكار في براسي بس انشالله اقدر اتزكرا كلها واكتبا (خصوصي بعد ما فتت هلأ ولقيت مخموخة قليلة الزوق باعتلي رسالة
انو قال شو في اعجاب خفي فيني بس مو حارق قلبي غير اني مو قدران اعرف مين
)
رسالة من ابو حشيشة الى نيرفانا (بالانكليزي ) :
مرحبا نيرفانا اول الشي كل عام وانتي بخير وانشالله عقبال المية وانشالله سنة الجاي بتحققي كل امانيكي
نيرفانا انا بعرف انو انتي عم تفوتي على اخوية (ما تقليلي كيف بعرف مصادري الخاصة
) وحتى اذا ما عم تفوتي بدي قول للشباب اللي عم يحكو معاها يوصلولا الحكي :
يا نيرفانا بدي قلك رجعي فوتي باسمك رجعي حطي ايديكي بايدين الشباب بايدين وائل وذا لايت وفراشة وذا مورنينغ وغازيتا والقلب المنادي ومرسيل وليلى وتوت مكعب وسيزار رجعي خلينا نرجع اخوية متل ما كانت
كلنا عنا نفس الشعور كلنا بدنا اخوية ترجع متل ما كانت بس اذا ضلينا نحكي ونحكي ما رح نستفيد شي لازم نشتغل شو بتستفيدي اذا ضليتي تاركة شو رح نستفيد اذا ترك واحد من الشباب او الصبايا اللي هني عمدة اخوية شو بدنا نعتمد على هالجداد اللي مانن شايفين باخوية غير محل للعب او للعشق مانن شايفين باخوية متل نحنا مو شايفين مانن حاسين شو هيي اخوية متل نحنا مو حاسين
خلونا نرد ايام
الحقيبة السرية لطارق
افكار تحشيشة لهاني
يوريكا الجريدة اللي تعبنا عليها كلياتنا
ما هو تعريف النقطة وكم نقطة تانية لحرقصة المخ لJoe
القتل الرحيم لامراة من ورق
خلونا نرد ايام ما كانت العالم على قولة blade
اقتباس:
|
هديك الايام كان الواحد ينتظر الرد على نار اما هلق كل الردود مشان زيادة عدد المشاركات مو اكتر يعني كم بلا نوع
|
خلينا نقلو ل blade طارق ودياب وحسام (الله يفك اسرن ) مواضيعن مانها احسن من مواضيعنا وردودن مانها احسن من ردودنا وانو نحنا كمان منعرف نزل مواضيع قوية و نرد ردود عليها القيمة
بس بدي قلك هيك يا نيرفانا
رسالة مني للكل :
انا بجوز اترك بعد فترة اخوية طبعا كلكن رح تتفاجأو انو كل هالحكي اللي حكيتو فوق ورح تترك اخوية اي نعم رح اترك اخوية لانو صار دوامي بالجامعة وبالشغل طويل وبجوز ما يصير عندي وقت ادرس لحتى فوت على اخوية
بس اكيد اني رح ارجع يعني كلها شهر واسبوع انشالله وبرجع وبقول انشالله ارجع اقوى من اول
انا قدمت استقالة من الاشراف يعني كلها شغلة كم يوم رح تلاقو تحت اسمي مشرف متقاعد بدال مشرف وبس ارجع رح ارجع مشرف متقاعد بس اكيد مو معناتا انو ختيرت وانو وقفت هون اكيد رح نكفي سوا
بس ايد لوحدا ما بتزقف بدنا نكون كلنا سوا
بزكر ايام كنت مر بفترات صعبة كتير وكنت كتير قول بدي اترك اخوية ومرة فعلا تركتا لمدة اسبوع كامل بس رجعت
وهلأ عنجد بعد ما قريت الموضوع اللي نكشتو لنيرفانا وبعد ما قريت رد ذا لايت تحديدا تزكرت كيف كانت مرسيل تقلي انو انتو شاطرين بالحكي وبس بدال مانكن عم تحكو اشتغلو وهلا تاكدت انو معاها حق
رح اقتبس قول للحكيم قديم كتير بس حبيتو من وقت ما قريتو (هوي صاير حشيش على ثوري غير مسلح ) بيقول فيه :
اقتباس:
ناطر بهمتكم نشوف الحركة التصحيحة الأولى بالمنتدى هذا .. بدون راديكالية .. وبدون اسلحلة وبدون صريخ وعياط ..
بدنا مظاهرة سلمية بالشموع والقبلات امام باب الرسائل الخاصة لكل عضو دخل وما تركنالو مجال يشارك.. ولكل عضو شارك وما تركاناه يكفي كبتناه .. ولكل عضو طل ولما ما لقى شي مفيد هرب لمحل افضل
بدنا مظاهرة سلمية بالقناديل .. امام باب موضوع فيه سوال ,,, وما اجاوب عليه بالاقسام التعليمية .. وامام باب كل مشاركة فيها قبلة انطبعت وما تم نشرها بالاقسام الادبية ,,,
بدنا مظاهرة سلمية بالقداحات متل ايام زمان ,.,. مو بالموبايلات حالة اليوم
ومظاهرة بيافظات مكتوبة بايدينا مو طباعة كمبيوتر وموزعة علينا ..
بدنا بالنهاية مظاهرة متل الي بيطلعو بالافلام الابيض والاسود لما يتظاهرو الناس وماسكين ايدن بعض .. وشادين .. اي شادين ..
وبعدها اذا اذا نجحت المظاهرة وحققت اهدافها منضل ما سكين ايدين بعض ومننزل على الدبكة ..و مندق بقوة على الارض .. دقة وحدة .. وبكل قوتنا .. دقة وحدة .
|
عنجد بدنا لافتات مكتوب عليها بايدينا
بدنا مواضيع كاتبينها بايدينا بدنا نبعد عن النقل من منتديات تانية لانو اخوية بعمرها ما كانت نسخة من منتدى تاني ولا بعمرها رح تكون لازم المواقع التانية هيي اللي تنسخ عنا بس مو نحنا اللي ننسخ عنها
كنت متفاءل بموضوع الشلل انو يساعدونا بس الشباب على ما يبدو ما كان الها نفس تشتغل فخلونا نحنا نشتغل بايدينا
بعتقد حكيت كتير خارج الموضوع
بس بيبقى سؤال واحد نحنا كفو ؟ نحنا قدها لهالشغلة ؟
انا بآمن انو اذا اتفقنا انو نحنا مع بعض اذا نسيت انا شو ديانة وائل او شو ديانة منوشة
اذا نسي وائل انو مرسيل سورية وهوي فلسطيني
اذا نست منوشة انو جاد ومريومة مسيحيين
اذا تركنا انتماءاتنا وطوائفنا برات المنتدى ووقت فتنا فتنا كانو عيلة وحدة الها ديانة وحدة وطائفة وحدة وقومية وحدة وقتا منكون قدها
وقت مناقش لناقش مو لنجرح بعضنا ومهما كان الموضوع بيجرحنا (كمثال بسيط في موضوع عم يخطر على بالي نزلو بس بجوز يجرح بعض المتدينين ) وقت منتناقش باي موضوع كان مشان نحاول نقنع بعضنا مو مشان قلو للي مقابيلي انو انا افهم منك وهوي مشان ياثبتلي انو لاء يبا يبلش يسبسب فيني واعلق انا ويا
وقتا رح تنجح المظاهرة السلمية ورح ننزل على الدبكة ورح ندبك كلنا سوا
بعرف انو حكيت كتير بتمنى اوصل لنتيجة
