هلوسات .. تحت خط الفقر بشحطة !
---------------------------------
لا مهو اسمحلي احكيلك شغلة .. مفهوم الطفر عندك كثير مغلوط!
ليش؟ أنا بقلّك ...
الطفر يا عزيزي هو حالة من انعدام التوازن المادي الآني، الآني بين قوسين، وهذه الحالة غالبا ما نتنج عن شيء عرضي،يعني عملت حادث بالسيارة لا سمح الله، لزمك كم قطعة تغيّرهم، نزّلت نشافة و كولرعلى حساب الراتب، المهم انه في النهاية راح تسكّر التزاماتك وترجع للوضع الطبيعي
بس لمّا يكون صارلك 10 سنين بتشتغل وتحرث زي الحصان، وكل مالوا راتبك بزيد ووضعك بتحسّن، ومع هيك، ما بيجي نص الشهر إلا وأنت ما معك حق بكيت دخّان، اسمحلي اقلّك انه هاد صار فقر مش طفر !
طب خلص روّق! مش مستاهلة تسمّ بدنكوالله، يعني احمد ربّك انه بينك وبين خط الفقر فشخة كعب، يعني لو تبحبح امورك شوي وتبطّل كم عادة من العادات السيّئة اللي بتمارسها، وتبطّل هال جخّة الكذّابةوالعرط، بيجوز تطلع شوي وتقعد على خط الفقر "بلا قافية" وتدندل إجريك، وساعتها،بتكون أغنى من حوالي 80% من الشعب اللي ما زالوا تحت الخط وبدهم مراحل ومعجزات عشانينطّوا عنّوا...
مهو أنت إحسبها صح! نص الألفخمسميّة يا عمّي، شيل 16% ضريبة بيضل 430 ليرة، كمان 30 ليرة موبايل وتأمين صحّي "لأ مهو صحتك بالدنيا يعني"، هاي 400، قول 250 إيجار وكهربه ومي وتلفون ونثرياتأخرى، بيضل 150، 60 ليرة بنزينوزيت وفردات كاوشوك، هاي 90، بدّك 40 ليرة دخّانومنتوس وساندويشات جبنة صفرا، ال50 ليرة اللي ضلّوا مش راح يفتحوا بيت، بس ممكن يفتحولك قنّينة ويسكي من النوع الهامل عشان تسكر وتنسى
طبعا هاد الحكي إذا! "وأذا فقط !" ما طلعلك خوازيق! وما أكثر الخوازيق هاي الأيام، وزي ما قالت إمّي "الخوازيق لا تأتي فرادى" .. يعني بتكون أمورك وحاسبها إنه ما ييجي اخر الشهر إلا ووضعك تمام، ويا دوب تتداين 30 ليرة مش أكثر، بيطلعك خازوق بيجيبك كتاف، يعني حبكت مرتخالك تخّلف!! ولا فوزي ابن أم فوزي ينجح بالتوجيهي!! ما صارلوا خمس سنين بيعيد فيه،اخدوا بالخبرة مش بالعلامات يعني، وحلّي وبارك ونقّط وجيب هدايا، بس مهو بينيوبينك، حتّى لو ما طلعلك ولا خازوق، راح تروح تدوّر على خازوق، تركّب سيستم ولا تجنّط السيارة ولا حتّى تركّب دي في دي، ما انت تعوّدت خلص