هادا يا سادة يا كرام .. ومن سوء حظكم يا هالانام ... انو اليوم دايق خلقي وجاية ع بالي اتفزلك شوي بمواضيع بلا طعمة ...
اي ... هاد اليوم كنت عم فكّــــر وهالشي ما بيحدث غالباً ... بالذات بهالفترة وقت اللي بتكون معجوء و100 فكرة براسك ومانك عرفان كيف هالنهار عم يمضى .. ويخرب بيتو معقول هدول 24 ساعة اللي عم يمرقو ؟!؟ اي العمى ما نلحق نعمل شي ... لك حتى النوم صرنا نقلل ساعاتو للنص .. اي والله اشتقت لنام كل يوم 8 - 9 ساعات .. اي لاء مو كتير ... بعرف انو مفكرين كتير ... بس هئ ... هاد المعدّل الطبيعي للي باعمارنا .... وكل ما تكبر بتقل .. يعني لا تتشاطر انو بتنام 5 ساعات وبتفز متل الحصان .. كاشفين عمرك انت وياه وياها
اي ما علينا ...
المهم ... بما انـــو حاسة بحالة ملل قاتل وما عندي شي اعملو ... بشو بدي اتسلى بشو بدي اتسلى بشو بدي اتسلى !؟؟
كان جاري التفكير ... وإذ بينط قدامي البوم الصور ....
ويحرق اختو من بين الصور !! لك شو هاااااااد !!
شو هالاشكال هي ؟! كيف كانو يخلّونا نطلع عالشارع بهالمناظر !!
لاء والاحلى متى ما قالولنا ابتسمو للصورة بتصير ضحكتنا من هون لهووووووون ... ع قولة واحد بعرفو ..بيصير كل وشنا تم
...
لاء وشو اكتشفت كمان ... انــو ما عندي ولا صورة راكزة ... لازم لازم خربها بحركة سئالة .. يا ملاوقة يا نطوطة يا حط ايدي بــــ وش اللي قدامي لحتى خرّب عليه ...
وبيقلولك احلى ايام وقت اللي كنتو صغار ....
اي بلا ايام طفولة بلا بطيخ .... منيح اللي الصور ما بتنطق كانت كفرت بالعبري !! ... يعني بعد ما شفت الصور صرت افهم الجملة من منظور تاني ... انو اس الله ايام ما كنتو صغار وما تجادلونا بلبسكون وبرأيكون وووو ... عنادكون
كانو يقلولنا اللبن اسود ... اي معلوم اسود ، ولو ليش في حدا قال غير هيك !!؟؟
هلأ : اللبن اسود .... - بالله شو ؟؟؟؟ مين قال هالحكي ؟؟؟ وعللي وفسري ووضحي ؟؟ وليش ما بدكون يانا نعبّر عن رأينا ؟؟ وكل ما حكينا كلمة صار لا تجادلنا نحنا بنفهم بمصلحتك اكتر منك ؟؟ هالحكي ما بيمشي معي .. ع فكرة انتو هيك عم تقمعولنا افكارنا وهي اسمها ديكتاتورية ...واذا انتو ما استحملتونا مين بدّو يقدر ؟؟ وبلابلابلابلا ...
لك اااااخ ... والله مافي اصعب من الجدال العقيم .. بتطق وبتطقق غيرك ..
شيلونا من هالسيرة ما حبيتا ...
اي صحي .. ع سيرة الابتسامة والضحكة ...
من زمان كانت تطلع دعاية معجون اسنان، السيناريو تبعها بيقول ( خليني خبرك خبرية صغيرة ... سر الجمال ما بيتوقف بس ع تسريحة شعرك.. حمرتك .. او اي لون مكياج ... سر الجمال .. الابتسامة الحلوة ) ...
ما بتذكر بالضبط ايمتى طلعت هالدعاية .. بس اللي متأكدة منــو انــو ادماني ع فرشاية الاسنان بدّو يكون بلّش بعدها ... اي عنجد شي مو طبيعي .. كل العالم بتفرشي 3 مرات باليوم - بعد كل وجبة
- ... الا بعض جماعة شي 6 - 7 مرات .. وفي فرشاية اسنان بكل مكان .. بتفتح الخزانة في وحدة .. بالحمام وحدة .. بشنتة الجامعة وحدة .. وفي وحدة "روزيرف " بالسيارة مشان اذا رحنا مشوار واضطرّينا ننام برّا البيت ....
انّو هالدعايات بتحسها للضحك عالواحد وحدة بوحدة ....
يعني مثلاً الشباب بينضحك عليهم بالدخّان وامسك جرّب وشوف كيف هيي دليل الرجولة واتطلع حواليك بهالافلام والدعايات لتعرف عن شو عم نحكي وبتصير كبير وبتصير شغلة عظيمة وما حدا قدّك و و و .... و نفس الشي بالنسبة للصبايا بينضحك عليهون .. بس بأمور اخرى ( بالضمة ولاه
)
برأيي كل شي كوم .. ووقت يضحكو عالناس بمباركة شهابذة العالم اللي انت بتنظرلون ع اساس انــو هنن اسمى من انو يخدعو الشعب بهيك امور كوم تاني ...
يعني مثلاً - وبعدنا بمعجون الاسنان - ... بتجيك دعاية الدكتور الفلاني ( مع زوم على شهاداتو اللي مملية الحيط من الزاوية للزاوية ) و اللي بينصح بالمعجون الفلاني وبيثق فيه من اكتر من 20 سنة ..
اي يخرب بيتك شو كذاب ..ع اساس كان هالمنتج موجود من 20 سنة لحتى تنصح فيه حضرتك
..
هيك اشخاص بحسهم ضمن ( نظرية المؤامرة ) طبعاً بعد التعديل البسيط.. لانو شو جاب لجاب .. بس انّـــو يعني.. شي انّـو ...
ايييييه خلص حاجتي بدي روح عالبيت لاعمل شغلة مفيدة بالحياة ... متمثلةً بالنوم
..
عنجد الحكي بيسلّي ...!! انو غريبة كيف الواحد بيتسلى مع حالو ايام .. مع انو غيرو يمكن يفكرو ........ لا سمح الله !
سي يو ....
~*¤ô§ô¤*~ No Pain ... No Gain ~*¤ô§ô¤*~
المقاومة مخاطبة الحكّام العرب : لعن الله أناس مثلكم ، فقد أردت لكم الحياة فأردتم لي الموت ...
نسيَ الطينُ ساعةً أنــّه طينُُ ُ حقيــرُ ُ ... فـصالَ تيهاً وعربـــَد ...