[Lotus]

هلأ بشكرك بنوتة حلب على المواضيع الاجتماعية يلي يطيب لي مناقشتا وبحييكي عليها

....الموضوع بالنسبة إلي بينقسم ما بين نzرة عامة ونzرة خاصة....

النzرة عامة: وهية نzرة خاصة بالمجتمع

هلأ إزا كنا عم ندرس حالة المجتمع العامة... ممكن ناخد حالة الحروب أو الأمراض...
بالحروب... بترتفع نسبة الإناث.. والذكور الله بيرحمن بنسبة كبيرة...
طيب هالإناث يلي ما تزوجو وحابين يكونو عيلة ويمارسو حياتن الحميمة يلي هية من طبيعة البشر وما فيك تناقش وجودا في النفس البشرية.. ومشتهيين يسمعو كلمة ماما... ليش منحرمن منها؟!
إزا ما كان في هيك تشريع ممكن كتير يتعرض المجتمع لفساد الأخلاق... وإحساس المرأة بالظلم... كونه رح تحس إنه مالا حئ بتكوين أسرة ولا في حدا يؤفلا بكبرتا... رح تحقد على المجتمع!!!

في حالة إنه امرأة ورجل معينين وبتحصل إنه مالن أمل يجيبو ولاد من بعضن... الرجل بده يدور على حل يتمثل بالزواج من أخرى للإنجاب... والمرأة كذلك... بس أحيانا المرأة بتفضل إنها ما تنفصل عن الرجل حتى لو دخلت بحياته إمرأة تانية... طيب ليه نحرمها تضل مع زوجها إزا هيك بدا؟

وبالنسبة إلي بآمن إنه أي تشريع إلهي أكيد إله حكمه حتى لو أنا بقصر وضحالة بصيرتي ما بفهمله تفسير و هناك إله تفسير مقنع وملبي لحاجة المجتمع كونه الله عزوجل هو يلي خلئنا وهو أخبر فينا ... صحيح هي حالات يلي زكرتا يمكن ما تصيب كل الشعوب (الحرب) ولا كل بيت (العقم) بس أكيد التشريع نزل لحتى يحل حتى هالمشاكل ولو إنها مو أكيدة الحصول بكل مكان وزمان..

النzرة الخاصة في أنا زاتن خص نص مو خاصة بغيري ولا بحكي عن لسان غيري...


أنا كشخصة ما بئدر يكون بحياة شريك حياتي شريك تالت عاطفيا أو غبر زالك .... متل ما أنا لازم كون بالنسبة إله... الإخلاص أهما شي...
وهالحالة هيي الكارسة والدمار العاطفي الشامل والكامل والطامة الكبرى عندي خصوصا إني بكون بحبه!!! ومتعلئة فيه!!!
بس إزا كان في أسباب... الله لا يجيبا .... وهو مضطر مشان الولاد...بشوف إنه من حئه يتزوج... بس أنا ما فيي ضل معه ولا سانية.. حتى لو كانت روحي فيه... وبعرف إنه بيحبني... ما فيي.. والله بطئ وبموت من القهر....

بس السؤال كمان يلي بتمنى تجاوبوني عليه... كيف المرأة بترضى تتزوج من رجل غايته بس الإنجاب!!!! يعني مو لإنه بحبا أو هي عن جد مهمة في حياته؟!!!! ما بئدر استوعب هالشي!!!!