[Danito]

مرحبا شباب و صبايا

من ناحية الزوارج و تكاملا مع اللي قالتو ري مي ، الزواج بالفهم الاجتماعي العام عنا بمجتمعاتنا بينبع من كونه مرحلة من مراحل الحياة "الطبيعية" و تعليق أبو مزيد على جارتهم العذراء بسن الخمسين (بعرف أنو فكاهي و ضحكني كتير) بس هوي في مسخرة على إنسانه من وضع ربما يكون بسببلها معاناة شديدة (بعرف أنو ممكن مزحة و الإنسانة ما ألها وجود و أنو أنت بجوز ما بترضى بالسخرية من هيك حالة) بس يعني هي المزحة بحد ذاتها انعكاس لمفهوم اجتماعي سائد ضمنيا هوي : للذكور: ولادة مدرسة شغل خدمة عسكرية زواج موت، للأنثى : ولادة مدرسة زواج موت

و ضمن نفس الفهم الاجتماعي عنا: النظرة السائدة أنو الرجال لو كبر لازم يتجوز وحدة بعمر العشرين للـ 26 كحد أقصى لأسباب مختلفة:
* لازم تكون غضة و طرية و شهية
* لازم ما تخلص صلاحيتها بسرعة أنو الفهم العام الزلمة بيضل شغال (ناشط جنسيا) لعمر متقدم (80- 90 نفسه خضرة ماشالله) بينما المرأة بتنتهي صلاحيتها كحد أقصى بحدود منتصفات الأربعين، و من هون سن الثلاثين يعني بيكون فوت العشر سنوات الأهم من "الطبق الشهي"

من البداية هي النظرة هي نتيجة رواسب بعمر الآلاف من السنين من قمع المرأة و تحويلها إلى سعلة متعة يبتاعه الرجل بجاهه و ماله أو غيره لفترة مؤقته (أقل من ساعة) أو أطول تصل إلى (العمر كله) و ساعتها يطلب منها مهام إضافية ، تنشأة الذرية الصالحة بعني بيكون مطلوب منها مهام خاصة (السرير) حتى عمر معني بعدين بتتفرغ لأعمال المنزلة و بناء الأجيال و بتجي زميلة أصغر و تازا (طازجة) بتشيل عنها عبء المهام الخاصة

هلق وين المغالطة؟ أو بالأحرى وين المغالطات؟ الأنثى بالنهاية إنسان و عندها مشاعرها كمان هي أولا
بعدين الأنثى عادة ما بتخمل جنسيا بسن الأربعين و ما بعده و إنما تصبح أقل جاذبية للذكور اللي اعتادو أنو ينظروا للمرأة كسلعة متاحة بطرق مشروعة (زواج) أو غير مشروعة (مصاحبة و اللذي منو) حتى لو كانت بعمر أولادهن
بجميع الأحوال كل هي مغالطات و مفاهم شائعة لو ضمنية لكنها غير واقعية ، و غالبا بتكون مصدر المعارضة الشديدة و التهجم على أي إنسان يتطرق لقضية حرية المرأة و حقوق المرأة ، يعني كتير ناس بيدافعو عن السلطة الذكورية حتى لو ما كانو مستفيدين من مزاياها أو متضطرين للاستفادة ، بس هني ضد زعزعة هذا الاستقرار و انتزاع المزايا شبه الأزلية و بيلبسو معارضتهن لباس التدين و الأخلاق و بالحقيقة هني عم يحاولو ا يحفزوا موضع الأعراف

هلق المشكلة أنو مجتمعنا للأسف و لأسباب سياسية (بشكل أساسي) و اجتماعية و نفسية صار خارج إطار الزمن ، لأنو بالعالم الآن الحديث عن أنو الحياة بتبدأ بعد التقاعد (سن الخمسين أو الستين) طبعا الحديث بيشمل الجنسين لأنو الناس الفهمانة صارت تفهم المساوة قولا و فعلا، معدل الأعمار صار أطول و الناس صار عندها وقت اطول تستخدمو بالإنتاج الفكري و المادي و ما عاد تقبل تتنحى "بديهيا" بناءً على عمرها أو جنسها (هون منتذكر موضوع مهم لامرأتنا عن التقاعد)

هلق قد يقول القائل أنو هاد الكلام نظري و عند الواقع كل هالتنظير بيروح بشدة سيفون بالبلوعة.. ممكن يكون معو حق أنو الواحد بيجوز ما ينجذب لبنت بسهولة مقارنة ببنت أقل جمالا بس، كمان ممكن لا شعوريا يلغي الخيارات الأكثر تقدم بالعمر لما بيكون بحالة عزوبية و عم يدور على شريك حياة أو حبيبة
ما فينا نقرر هالشي لأنو بالنهاية القلب و مايريد و يعني لو أنو المبدأ هاد بينطبق على الواقع بشكل تام و نهائي ما كان طلعلنا مين يقول "خودو عيني شوفو بيها" يعني الجمال نسبي و الجاذبية نسبية و لما الواحد بيكون من حيث المبدأ قبلان أنو الأنثى إنسانة بعواطفها و بنيتها النفسية ما بتخضع لقواعد ملكية الأشياء و انخفاض قيمتها بالتقادم بل العكس متل العود كل ما عاتق صوتو بيحلى و بيحن ، يعني هيك الإنسان بيطلع من الكليشة تبع التلاتين أو الأربعين و أقدر أنو يشوف الجوهر

بالنهاية و بعد كل هاللت و العجن وجب التنويه أنو: الحب ما بيعرف عمر يعني الفرق بالعمر قد لايكون حاجز أبدا في كثير من الحالات بالاتجاهين (يعني مرأة أكبر أو رجل أكبر) هاد خيار العشاق طبعا ما بيشمل لما بيكون أحد الطرفين أصغر بكتير و تحت الـ18 (غالبا بيكون انتهاز و استغلال)