[بيلسان]

قصة انو مصطلح العنوسة هيي من خلق البشر وتقاليدهن البالية فهادا اشي اكيد .. لانو انوجد بسبب نظرة الرجل للمرأة على انها مجرد آلة عتقت وانتهت مدة صلاحيتها .. مع انو بطبيعة الحال كل انسان مع التقدم بالعمر بيكبر عقلو وبتزيد خبرتو وبيصير قادر اكتر على تأسيس أسرة ..

الزواج مسؤولية وقرار مصيري لازم يتم بالمرحلة المناسبة .. والبنت قبل ما تتكون شخصيتها بشكل كامل صعب عليها كتير انو تقدر تتحمل مسؤولية هيك قرار مشان تبدا حياة جديدة مع زوج المستقبل ..

بحسش انو مسألة فارق السن الكبير بين الشب والبنت الها علاقة بنجاح الزواج .. يعني ممكن نقول انو الفارق كحد اقصى هوي 15 سنة .. لانو بشكل عام البنت بتنضج قبل الشب وممكن كتير انو عقلها ما يركب على عقل اي شب بجيلها .. بينما مع شخص اكبر منها ممكن تحس بالتفاهم والانسجام اكتر .. ومشان هيك انا بلاقيش مشكلة اذا كان الفرق كبير شوي ..

بكل الاحوال .. العنوسة هادا مصطلح لازم نجتثو من قاموس مجتمعنا لانو بيسيء لمكانة المرأة ولانوثتها ولقدرتها على العطاء .. لازم نتحرر من هالنظرة المهينة للمرأة .. هادا اهم اشي .. وكلشي بيجي بعدين الو حل ..

شكرا كتير عالموضوع المهم والواعي والممتع