أنا مواطن غير عادي .. و مفلسف (رح أحكي انشالله بينشرح صدركون)
أنا المواطن اللي اتطلع لفوق و ما انكسرت رقبتو ... بس وجعتو
أنا أخو أختي
و أخو لأخي المواطن
و أخي المو .. واطن
أنا همي الوطني ثلاث غرف و منافعون و أربع دواليب و مسجلة
همي القومي فلسطين و بغداد و نواكشط و عبد الحليم حافظ
أنا مش أنا .. أنا و بعدي الطوفان
أنا اللي أخدوا أمي ما صاروا عمي .. صارو جوزت خالتي (عرفتو لوين أخدوا
)
أنا مواطن صباطي مقفوع و جرابي مقفوع و بنطروني مقفوع و قميصي مقفوع
جيبي مقفوع هرت منو كل الفراطة الحديد و المحارم المهترية
و نتاتيف الورق اللي عليها أرقام منسية
لك كل شي هر من هالجيبة حتى صحتي
بس في شغلة وحدة ما عم تهر
كرامتي
هوي صحي مسحولي فيها الأرض و ضربوها بعرض الحيطان
و باعوها بالمزادات العلنية والسرية
و نفخوها نفسوها لحد ما نشفت و شقشقت
بس أنا محتفظ فيها و هي محتفظة فيني
و بدي صرخ و بدي عيط ليبح صوتي
و لياخدوني عالمعتقل
بس ما رح اسكت و مارح حطها واطية
شبكون ما أنا مواطن غير عادي
