اقتباس:
كاتب النص الأصلي : أبو طريق
أنا بصراحة تفاجأت كتييير بيللي حكيتيه، بس هالشي مو يعني إني عمكذبك.
أولا أنا ما بعرف شو تخصصك و شو فرعك، و بعدين كتييير مستغرب من إنو الراتب طامرك طمر!!!! معقول كل موظفين سوريا رواتبن من الحكومة طامرتن طمر؟؟؟؟؟؟ إزا طامرتن ليش المواطن السوري و بالذات الموظف الحكومي يعيش على خط الفقر إزا مو تحتو؟؟؟؟؟؟
أنا أبي تغرب مشان الرواتب، و ليكيه بالغربة كلشي جمعو دفعناه أقساط للبيت.
بعدين على أي أساس رحتي منحة؟؟؟؟ أنا هلأ عمإدفع لدراستي بالماجستير 11200 دولار و بدولة عربية كمان، أبي عميدين مشان يخليني كمل دراسة، لا تفكري إني مبسوط، لأ، بس أبي حلموا الوحيد بهالدنيا إنو يشوفني مكمل دراستي، و بالذات إني مسبق عن أغلب يللي من جيلي، و ما خلاني اشتغل بعدين كمل دراستي، وهادا الحلم يللي هوي ما قدر يحققوا من تحت راس حكومتنا الدكتاتورية، لأ، يا حزرك ليش ما قدر يكمل تعليمو؟؟؟ لأن كان ملتهي بجمع لقمة الخبز بعد ما توفى جدي، حالو حال كل مواطن شريف و نزيه بسوريا، و ين كان الرئيس و مخلوف و غيرو و غيراتو لما أبي ضل بالجامعة 10 سنين، مو كسل، بس راح عالعسكرية و طلبوه احتياط(عأساس آل يعني يحرر الجولان و يتبنى القضية) و اشتغل فترة مشان يعيل أهلو، و هلأ بدو ياني كمل تعليمي، للمعلومات العامة أنا راسلت جامعات كتير معتبرة ببريطانيا و أميركا، و عملت الTOEFL و جبت فيه العلامة المطلوبة، و جبت 3 رسائل توصية من أهم دكاترة قسمي، و هنن عفكرة معروفين عمستوى عالمي، كلن دارسين بأميركا و بريطانيا، و إلن أبحاث و مقالات منشورة بأهم المكتبات العالمية و الدوريات العلمية، و قبلوني الجامعات، بس وقف سفري و حلمي على أجرة الجامعة و المعيشة يللي بتوصل لل50000 دولار برياحة. ما تفكري كلشي حكيتو مسلسل درامي، لأ واقع محض.
إنتي لاوديسا إزا كنتي حالة خاصة(مو شرط واسطة) مو يعني إنو الحكومة طامرة الشعب بخيراتا، لو كان صاير نفس الشي معي كنت كمان متل موقفك، بس رح كون حالة خاصة لسبب من الأسباب.
مع كل هالشي أنا ماني ضد أو مع الرئيس، بس كان الأولى فيه إنو يوقف النصابين الكبار من العلويين و غيرن عند حدن، و يحاسبون بتهمة الخيانة العظمى بحق الشعب، و كان الأولى إنو يشيل الموظفين الحكوميين يللي معينين بالواسطة الحزبية أو الواسطة الطائفية أو حتى الواسطة الشخصية، لأن هدول ذلوني ذل لما كنت روح راجع بالدوائر الحكومية،ذلوني إلي و لكل مواطن سوري ما إلو غير الله بسوريا.
و رغم كل هالشي ما عندي حقد لا عالرئيس ولا على طائفة الرئيس، لأن هالطائفة كمان فيها معترين كتيييييير متل حكايتي، دعسهن النظام و أعوانو برجليه.
بالمختصر نحنا لولا سيادتو و سيادة أعوانو ما كنا عرفنا شو صار فينا، كنا غير شي تماااااااااااام.
|
يعني حكيك صح ... شو بدنا نحكي
يا لاوديسا صح في منح دراسية بس قليل ما ينالوا ولاد البلد يللي بحاجة الا , بس طبعا الوضع هلأ أحسن بكتير بالمقارنة مع وقت كان حافظ الأسد ماسك
بس كمان نحنا لازملنا اصلاح جذري , الفساد معشعش فينا عشعشة ما بيعلم فيها الا الله
أنا نفسي اضطريت اتعامل مع المؤسسات هونيك و الله لا يورجي حدا عالفضايح اللي هونيك , لازم تدفعي لتمشي معاملتك و اذا ما دفعتي راحت معك كم سنة كمان
هادا طبعا غير السجون العامرة بالشباب الطيبة و معظمن سجناء رأي , ذنبون الوحيد أنو ما سكتوا , طبعا غير عمليات التعذيب و الاستجواب يللي بتصير بالتعاون مع السي آي اي , يعني شو بدي اذكر لأذكر
الله يصلحنا و يريحنا ...